JENESIS 4 - Khasi CL Bible (BSI)

U Kain bad u Abel

¹ Te u Adam u la ïathiah shongkha bad ka Im ka tnga jong u, bad ka la punkhun. Ka la kha ïa u khun bad ka ong, “Nga la ïoh ïa u khun da ka jingïarap U Trai.” Kumta ka la khot kyrteng ïa u, “u Kain.”

² Hadien ka la kha pat sa uwei u khun, u Abel. U Abel u la long u nongap langbrot, hynrei u Kain u dei u nongrep.

³ Hadien katto katne por, u Kain u wallam katto katne na ka jingot jong u bad u ai ïa ka kum ka jingainguh ïa U Trai.

⁴ Nangta U Abel u wallam ïa u khunlangbrot banyngkong ba la kha na kawei na ki langbrot jong u, u la pynïap ïa u, bad u la ai ïa ki bynta kiba bha tam kum ka jingainguh.

⁵ Te U Trai u la sngewbha eh ïa u Abel bad ïa ka jingainguh jong u; hynrei u la kyntait ïa u Kain bad ïa ka jingainguh jong u. U Kain u la bitar lep, bad ka durkhmat jong u ka la kylla ha ka jingbitar.

⁶ Te U Trai u ong ïa u Kain, “Balei me bitar, bad balei ka durkhmat jong me ka kylla dur?

⁷ Lada me la leh ïa kaba dei, men jin da la phuh samrkhie; hynrei namar ba me la leh ïa kaba sniew, ka pop ka apthap ha ka jingkhang jong me. Ka kwah ban synshar ïa me, hynrei me dei ban jop ïa ka.”

⁸ Nangta u Kain u ong ïa u Abel u para jong u, “Ïa ngin ïaleit sha lyngkha.” Haba ki la don ha lyngkha, u Kain u la shoh ïa la u para bad u la pynïap ïa u.

⁹ Te U Trai u kylli ïa u Kain, “Shano u Abel u para jong me?” U te u jubab, “Ngam tip. Hato dei ma nga u ban sumar ïa u para jong nga?”

¹⁰ Bad U Trai u ong, “Balei me leh ïa kane ka kam kaba shyrkhei? Ka snam u para jong me ka ud ha nga na khyndew kum ka sur kaba khot ïa ka jingpynhiarkput.

¹¹ La buh ïa me hapoh ka jingtim bad men ym lah shuh ban rep ha ka khyndew. Ka la kjit noh ïa ka snam u para jong me, i kumba ka la ang ïa la ka shyntur ban pdiang ïa kata mynba me la pynïap ïa u.

¹² Lada me pyrshang ban thung jingthung, ka khyndew kan ym pynmih ei ei; men long u nongphetwir ha ka pyrthei.”

¹³ Bad u Kain u ong ha U Trai, “Kane ka jingpynshitom ka long palat ïa kaba nga lah ban shah.

¹⁴ Me la beh noh ïa nga na ka khyndew bad na ka jingdon ryngkat ka jong me. Ngan long u nongphetwir ha ka pyrthei, bad uno uno uba lap ïa nga un pynïap ïa nga.”

¹⁵ Te U Trai u jubab, “Em. Lada uno uno ruh u pynïap ïa me, yn sa pynïap hynñiew ki mynsiem ha ka jingpynhiarkput.” Kumta U Trai u buh ka dak ha u Kain ban maham ïano ïano ba ïashem ïa u ban ym pynïap ïa u.

¹⁶ Bad u Kain u leit noh na ka jingdon ryngkat U Trai bad u la shong la sah ha ka ri ba la kyrteng “Ka Nod” kaba don shaphang mihngi na ka Kper Eden.

Ki khun ki ksiew jong u Kain

¹⁷ U Kain bad la ka tnga ki la ïoh khun shynrang bad ki la kyrteng ïa u, “U Enokh.” Nangta u Kain u la tei ka nongbah bad u la kyrteng ïa ka ha ka kyrteng u khun jong u.

¹⁸ U Enokh u la ïoh khun shynrang uba kyrteng u Irad, uba dei u kpa jong u Mehujael, bad u Mehujael u la don u khun uba kyrteng u Methushael, uba dei u kpa jong u Lamekh.

¹⁹ U Lamekh u don ar ngut ki tnga, ka Adah, bad ka Sillah.

²⁰ Ka Adah ka la kha ïa u Jabal, uba dei u kpa tymmen jong kito kiba ri jingri bad kiba shong ha ki ïingjaiñ.

²¹ U para jong u, u dei u Jubal, u kpa tymmen jong ki nongtem jingtem baroh kiba tem ïa ka duitara bad put tangmuri.

²² Ka Sillah ka la kha ïa u Tubal Kain, uba dei u kamar uba shna ïa ki jait tiar baroh na ka rnong bad ka nar. Ka para jong u Tubal Kain ka dei ka Naamah.

²³ Te u Lamekh u ong ha ki tnga jong u, “Ko Adah bad Sillah, to sngap ïa nga: Nga la pynïap ïa uwei u samla namar u la shoh ïa nga.

²⁴ Lada hynñiew ngut ki mynsiem yn pynïap ban siew na ka bynta ka jingpynïap ïa u Kain, Hynñiewphew hynñiew ngut ki mynsiem yn pynïap lada uno uno u pynïap ïa nga.”

U Seth bad u Enosh

²⁵ U Adam bad ka tnga jong u ki la ïoh sa uwei pat u khun. Ka la ong, “U Blei u la ai khun shynrang ïa nga ha ka jaka u Abel, ïa uba u Kain u la pynïap.” Kumta ka la kyrteng ïa u, u Seth.

²⁶ U Seth u la ïoh uwei u khun, ïa uba u la kyrteng, u Enosh. Dei ha kata ka por ba ki briew ki la sdang ban pyndonkam ïa ka kyrteng bakhuid jong U Trai ha ka jingmane Blei.