JENESIS 38 - Khasi CL Bible (BSI)

U Judah bad ka Tamar

¹ Ha kata ka por, u Judah u la iehnoh ïa la ki hynmen shynrang, bad u la leit sah bad uwei u briew uba kyrteng u Hirah uba na ka shnong Adullam.

² Hangta u Judah u la ïakynduh ïa ka samla nong Kanaan uba u kpa jong ka u kyrteng u Shua.

³ U la shongkurim ïa ka, bad ka la kha khun shynrang ïa u, ïa uba u la khot kyrteng u Er.

⁴ Ka punkhun biang bad ka la kha ïa uwei pat u khun shynrang, la khot kyrteng ïa u, u Onan.

⁵ Sa shisien pat ka la kha khun shynrang bad la khot kyrteng ïa u, u Shelah. U Judah u don ha Akhsib mynba la kha ïa u khunlung.

⁶ Ïa u Er, u khun nyngkong jong u, u Judah u la pynïoh ka tnga kaba kyrteng ka Tamar.

⁷ Ka rukom im jong u Er ka long bymman, bad kata ka la pynsngewsih ïa U Trai, kumta U Trai u la pynïap noh ïa u.

⁸ Nangta u Judah u ong ha u Onan, u para jong u Er, “Khie leit bad thiah bad ka tnga u hynmen jong me uba la ïap. Pyndep ïa ka kamram kaba me dei ban leh kum u para kynsi jong ka, khnang ba u hynmen jong me un ïoh ki nongmih pateng.”

⁹ Hynrei u Onan u la tip ba ki khun kin ym long ki jong u, kumta haba u ïathiah shongkha bad ka tnga u hynmen jong u, u pynhap noh ïa la u symbai sharud, khnang ban yn ym pynïoh khun ïa u hynmen jong u.

¹⁰ Kata kaba u leh ka la pynsngewsih ïa U Trai, bad U Trai u la pynïap noh ïa u ruh.

¹¹ Nangta u Judah u ong ha ka Tamar ka pyrsa kurim jong u, “Khie leit phai noh sha ka ïing u kpa jong pha bad to ïaisah riewkynthei tad haduh ba u Shelah u khun jong nga un da rangbah.” U ong kumta naba u sheptieng ïoh ba u Shelah un shah pynïap kum ki hynmen jong u. Kumta ka Tamar ka la leit phai noh sha la ïing.

¹² Hadien katto katne por, ka tnga jong u Judah ka la ïap. Hadien ba u la pyndep ïa ka por ka jingïam sngewsih, ma u lem bad u paralok jong u, u Hirah uba na Adullam ki la ïaleit sha Timnah, ha kaba la khap shñiuh ïa ki langbrot jong u.

¹³ Don uba la ïathuh ha ka Tamar ba u kthaw kurim jong ka u la leit sha Timnah ban khap shñiuh ïa la ki langbrot.

¹⁴ Kumta ka la kylliang ïa ki jaiñ riewkynthei ba ka phong, ka la tap ïa la ka khmat da ka jingkah khmat, bad ka la leit shong ha ka khyrdop ban rung sha Enaim, ka shnong kaba don ha ka lynti sha Timnah. Kumba ka la tip bha ba u Shelah u khun khatduh jong u Judah, u la rangbah mynta, pynban ym pat shym la ai ïa ka ha u ban shongkurim.

¹⁵ Haba u Judah u ïohi ïa ka, u la pyrkhat ba ka dei ka nuti, namar ba ka la kah ïa la ka durkhmat.

¹⁶ U leit sha ka harud jong ka lynti bad u ong, “To ong, katno phi buh dor?” (Um shym tip ba ka dei ka pyrsa kurim jong u.) Ka ong “Phin ai aïu ïa nga?”

¹⁷ “Ngan phah ïa phi kawei ka blang lud na ka kynhun jong nga,” u jubab. “Ñiuma, lada phin ai ei ei ha nga ban buh kum ka jingkular haduh ba phin da phah ïa ka blang,” ka ong.

¹⁸ “Ngan ai aïu ïa phi kum ka dak ka jingkular?” u phai ktien. Ka jubab, “Ka muhor jong phi bad u ksai jong ka, bad uto u diengduh ba phi rah.” U la ai ïa ki ha ka. Nangta ki la ïathiah shongkha, bad ka la punkhun.

¹⁹ Ka Tamar ka la leit phai pat sha la ïing, ka law noh ïa ka jingkah khmat, bad ka phong biang ïa ki jaiñ riewkynthei.

²⁰ U Judah u la phah ïa u Hirah u paralok jong u, ban leit lam ïa ka blang, bad ban shim noh na ka kynthei ïa ki tiar kiba u la kular, hynrei u Hirah um shym lap ïa ka.

²¹ U la kylli na ki katto katne ki rangbah ha Enaim, “Shano kato ka nuti kaba don hangne harud lynti?” “Ym ju don nuti hangne,” ki jubab.

²² Kumta u leit phai noh sha u Judah, bad u ong, “Ngam shym lap satia ïa ka. Ki rangbah jong kata ka jaka ruh ki ong ba ym ju don nuti hangta.”

²³ U Judah u ong, “Ai kan bat ïa kito ki tiar. Ngim kwah ba ki briew kin rkhie ïa ngi. Nga la pyrshang ban siew ïa ka, hynrei phim shym lap ïa ka.”

²⁴ Kumba lai bnai hadien kane, don ba ïathuh ha u Judah, “Ka pyrsa kurim jong phi ka la leh kum ka nuti, bad mynta ka la punkhun.” “Sei shabar ïa ka, bad thang im ïa ka,” ong u Judah.

²⁵ Katba ka dang shah sei kumta, ka la phah ktien sha la u kthaw kurim: “Nga la punkhun na uta u briew uba long u trai kine ki tiar. Peit ïa ki bad khmih ki dei ki jongno — kane ka muhor bad u ksai jong ka bad une u diengduh.”

²⁶ U Judah u la ithuh ïa kita ki tiar, bad u ong, “Ka don ha ka hok. Ngam shym la pyndep ïa ka kamram ha ka — nga dei ban ai ha ka ïa u Shelah u khun jong nga ha ka jingshongkurim.” Bad u Judah um shym ïathiah shongkha shuh bad ka.

²⁷ Haba ka la dei por ïa ka ban kha, la shem ba kan sa kha khun synrap.

²⁸ Katba ka dang suh kha, uwei na ki u pynmih shabar ïa la ka kti; ka nongpynkha khun ka bat ïa kata ka kti, ka teh ïa ka da u 'saisaw, bad ka ong, “Une u dei uba mih nyngkong.”

²⁹ Hynrei uta u pynran noh pat ïa la ka kti, bad kumta la kha shuwa ïa u para jong u. Kata ka nongpynkha khun ka ong, “Da kumne mo me wan mih!” Kumta la khot kyrteng ïa u, u Peres.

³⁰ Nangta la kha sa ïa u para jong u, uba don 'saisaw ha ka kti jong u, bad la khot kyrteng ïa u, u Serah.