JENESIS 36 - Khasi CL Bible (BSI)

Ki khun ki ksiew jong u Iso

¹ Kine ki long ki khun ki ksiew jong u Iso, ïa uba la khot ruh u Edom.

² U Iso u la shongkurim ïa ki kynthei Kanaan: ka Adah, ka khun jong u Elon u nong Hit; ka Oholibamah, ka khun jong u Anah u khun jong u Sibeon u nong Hib;

³ bad ka Basemath, ka khun jong u Ishmael bad ka para jong u Nebaïoth.

⁴ Ka Adah ka la kha ïa u Eliphas; ka Basemath ka la kha ïa u Reuel;

⁵ bad ka Oholibamah ka la kha ïa u Jeush, u Jalam, bad u Korah. Kine baroh ki long ki khun shynrang ba la kha ïa u Iso ha ka ri Kanaan.

⁶ Nangta u Iso u la ïalam ïa la ki tnga, ki khun shynrang bad kynthei, bad ïa ki briew baroh kiba na ka ïing jong u, lem bad ki kynhun jingri jong u baroh, bad ki jingdon jingem jong u baroh kiba u la lum ha ka ri Kanaan, bad u la mihnoh na u Jakob u para jong u ban leit sha kawei pat ka ri.

⁷ U la mihnoh kumta namar ba kata ka ri ha kaba ma u bad u Jakob ki shong kam lah shuh ban kyrshan ïa ki; ki jingri jong ki, ki la bun palat, bad kumta kim lah shuh ban ïashong ïasah ryngkat.

⁸ Kumta u Iso u la shong la sah noh ha ka ri lum Edom.

⁹ Kine ki long ki khun ki ksiew jong u Iso, u kpa tymmen jong ki nong Edom.

^10-13 Ka Adah, ka tnga jong u Iso ka la kha uwei u khun shynrang, u Eliphas, bad u Eliphas u la don san ngut ki khun shynrang: u Teman, u Omar, u Sepho, u Gatam, bad u Kenas. Bad na kawei pat ka tnga, ka Timna, u ïoh sa uwei u khun, u Amalek. Ka Basemath, ka tnga jong u Iso ka la kha uwei u khun shynrang, u Reuel, bad u Reuel u la don saw ngut ki khun shynrang: u Nahath, u Serah, u Shammah, bad u Missah.

¹⁴ Ka Oholibamah, ka tnga jong u Iso, ka khun jong u Anah, u khun jong u Sibeon, ka la kha lai ngut ki khun shynrang: u Jeush, u Jalam, bad u Korah.

¹⁵ Kine ki long ki jait kiba la hiarpateng na u Iso. U Eliphas, u khun nyngkong jong u Iso, u dei u kpa tymmen jong kine ki jait: ki Teman, ki Omar, ki Sepho, ki Kenas,

¹⁶ ki Korah, ki Gatam, bad ki Amalek. Kine baroh ki long ki khun ki ksiew na ka Adah ka tnga jong u Iso.

¹⁷ U Reuel u khun jong u Iso u long u kpa tymmen jong kine ki jait: ki Nahath, ki Serah, ki Shammah, bad ki Missah. Kine baroh ki long ki khun ki ksiew na ka Basemath ka tnga jong u Iso.

¹⁸ Kine harum ki long ki jait kiba hiarpateng na ka Oholibamah ka tnga jong u Iso, ka khun jong u Anah: ki Jeush, ki Jalam bad ki Korah.

¹⁹ Kine ki jait baroh ki la hiarpateng na u Iso.

Ki khun ki ksiew jong u Seir

^20-21 La pynïabynta ïa ki traishnong jong ka ri Edom ha ki jait kiba don ka dien hiarpateng na kine harum ki khun ki ksiew jong u Seir u nong Hor: u Lotan, u Shobal, u Sibeon, u Anah, u Dishon, u Eser, bad u Dishan.

²² U Lotan u long u kpa tymmen jong ki jait Hori bad Heman. (U Lotan u don ka para kaba kyrteng ka Timna.)

²³ U Shobal u long u kpa tymmen jong ki jait Alban, u Manahath, Ebal, Shepho, bad Onam.

²⁴ U Sibeon u don ar ngut ki khun shynrang, u Aïah bad u Anah. (Une u dei u Anah uba la lap ïa ki umshit ha ka ri khlaw mynba u dang sumar ïa ki kada jong u kpa jong u.)

^25-26 U Anah u dei u kpa jong u Dishon, uba long u kpa tymmen jong ki jait Hemdan, Eshban, Ithran, bad Kheran. U Anah u la don ruh ka khun kaba kyrteng ka Oholibamah.

²⁷ U Eser u long u kpa tymmen jong ki jait Bilhan, Saaban, bad Akan.

²⁸ U Dishan u long u kpa tymmen jong ki jait Us bad Aran.

^29-30 Kine ki long ki jait Hor ha ka ri Edom: ki Lotan, ki Shobal, ki Sibeon, ki Anah, ki Dishon, ki Eser, bad ki Dishan.

Ki syiem jong ka Edom

^31-39 Shuwa ban don syiem ha Israel, kine harum ki long ki syiem kiba la synshar ha Edom uwei hadien uwei: U Bela u khun jong u Beor na Dinhabah U Jabab u khun jong u Serah na Bosrah U Husham na ka thain Teman U Hadad u khun jong u Bedad na Abith, (u la jop ïa ki Midian ha ka thma ha ka ri Moab) U Samla na Masrekah U Shaul na Rehoboth-halor-ka-Wah U Baal Hanan u khun jong u Akhbor U Hadad na Pau (ka tnga jong u ka dei ka Mehetabel, ka khun jong u Matred bad ka khun ksiew jong u Mesahab)

^40-43 U Iso u long u kpa tymmen jong kine harum ki jait nong Edom: ki Timna, ki Albah, ki Jetheth, ki Oholibamah, ki Elah, ki Pinon, ki Kenas, ki Teman, ki Mibsar, ki Magdiel, bad ki Iram. La tip ïa ka jaka ha kaba kawei kawei ka jait ka shong ka sah da ka kyrteng jong kata hi ka jait.