JENESIS 32 - Khasi CL Bible (BSI)

U Jakob u pynkhreh ban ïashem bad u Iso

¹ Katba u Jakob u nang leit ha la ka lynti, katto katne ngut ki angel ki la wan ïashem ïa u.

² Haba u la ïohi ïa ki, u ong, “Kane ka dei ka jaka sher dara jong U Blei”; kumta u la khot kyrteng ïa kata ka jaka ka Mahanaim.

³ U Jakob u la phah ïa ki nonglamktien ha shuwa jong u sha u Iso u hynmen jong u ha ri Edom.

⁴ U la bthah ïa ki ban ong, “Nga u Jakob, u shakri bakohnguh jong phi, nga pyntip ha u kynrad jong nga u Iso ba nga la shong la sah bad u Laban, bad nga la pynslem ban wan phai haduh mynta.

⁵ Nga don ki masi, ki kada, ki langbrot, ki blang, bad ki mraw. Nga phah ktien sha phi ko kynrad da ka jingkyrmen ba ïoh ïa ka jingsngewbha jong phi.”

⁶ Ynda kita ki nonglamktien ki la wan phai pat sha u Jakob, ki ong, “Ngi la leit ïashem ïa u Iso u hynmen jong phi, bad u la don ha lynti ban wan ïashem ïa phi. U don sawspah ngut ki rangbah bad u.”

⁷ U Jakob u la sheptieng bad khuslai. U la pynbynta ar kynhun ïa ki briew kiba don lem bad u, bad kumjuh ruh ïa ki langbrot, ki blang, ki jingri bad ki ut.

⁸ U la pyrkhat, “Lada u Iso u wan ïaleh ïa kawei ka kynhun bad u pynjot ïa ka, kata kawei pat ka kynhun ka lah ban lait im.”

⁹ Nangta u Jakob u la duwai, “A U Blei jong u parad jong nga u Abraham, bad U Blei jong u kpa jong nga u Isaak, to shahshkor ïa nga! Me la bthah ïa nga, A Trai, ban leit phai pat sha la ka ri bad sha la ki kur ki jait, bad men pynbiang ba kiei kiei baroh kin ïaid beit bad nga.

¹⁰ Ngam long uba bit dor ban ïohpdiang ïa baroh ka jinglehisynei bad ka jingieit baïaineh ba me la pynpaw ha nga, u shakri jong me. Nga la jam ïa ka wah Jordan tang bad u diengduh jong nga, bad mynta pat nga la wan phai bad kine ar ki kynhun.

¹¹ Nga kyrpad ïa me ba men pyllait ïa nga na ka kti u Iso u hynmen jong nga. Nga sheptieng — sheptieng ba u wan ban ïaleh bad pynïap lut ïa ngi baroh, wat ïa ki kynthei bad ki khynnah ruh.

¹² Kynmaw ba me la kular ban pynbiang ba kiei kiei kin ïaid beit bad nga bad ban ai ha nga kham bun ki khun ki ksiew, kiba bun kat u shyiap harud duriaw.”

¹³ Hadien ba u la sahmiet hangta, U Jakob u jied na ki jingri jong u kum ka jingai sngewbha ïa u Iso u hynmen jong u:

¹⁴ arspah tylli ki blang kynthei bad arphew tylli ki 'langsohmoh, arspah tylli ki langbrot kynthei bad arphew tylli ki langbrot shynrang,

¹⁵ laiphew tylli ki ut ai dud lem bad ki khun jong ki, sawphew tylli ki masi kynthei bad shiphew tylli ki masi kyrtong, arphew tylli ki kada kynthei bad shiphew tylli ki kada shynrang.

¹⁶ U la pynbynta ïa ki ha la ka jong ka jong ka kynhun, bad u buh uwei u shakri jong u ba un khmih ïa kawei kawei ka kynhun. U la ong ha ki, “Khie nang ïaid sha khmat jong nga, bad pynjngai khyndiat hapdeng kawei ka kynhun bad kawei pat.”

¹⁷ U la hukum ruh ïa u shakri uba ha khmat eh, “Ynda u Iso u hynmen jong nga u ïakynduh ïa me, bad u kylli, ‘Uei u kynrad jong me? Shano men leit? Uei u trai jong kine ki jingri kiba ha khmat jong me?’

¹⁸ Me dei ban jubab, ‘Ki dei ki jong u Jakob u shakri jong phi. U phah ïa ki kum ka jingai sngewbha sha u kynrad jong u, u Iso. U Jakob hi u hadien jong ngi.’ ”

¹⁹ U la ai kajuh ka hukum ïa uba ar, uba lai, bad ïa kita baroh kiba khmih ïa kita ki kynhun jingri, “Phi dei ban ong kumne ha u Iso haba phi ïakynduh ïa u.

²⁰ Phi dei ban ong, ‘U shakri jong phi u Jakob u hadien jong ngi.’ ” U Jakob u la pyrkhat, “Ngan pynum ïa ka mynsiem jong u da ki jingai sngewbha, bad haba nga ïakynduh ïa u, lehse un map ïa nga.”

²¹ U phah ïa kita ki jingai sngewbha shuwa jong u bad u la sahmiet ha kata ka miet ha ka jaka sher dara.

U Jakob u ïalympat bad u Angel ha Peniel

²² Ha kata kajuh ka miet, u Jakob u la khie, u shim ïa la ki tnga baroh ar ngut, ïa ki tnga kliar jong u ar ngut, bad ïa la ki khun baroh khatwei ngut, bad u la jam ïa ka wah Jabbok.

²³ Ynda u la phah ïa ki sha shiliang, u la phah ruh sha shiliang ïa kiei kiei baroh kat kiba u don,

²⁴ hynrei u la sah shadien marwei. Nangta uwei u briew u wan bad u la ïalympat bad u haduh ban da jan kynjat shai.

²⁵ Haba uta u briew u ïohi ba um lah jop ïa u Jakob, u kura ïa u na ka skhep; bad kata ka skhep jong u ka la lait.

²⁶ Uta u briew u ong, “Pyllait noh ïa nga; ka la sdang kynjat shai.” “Em, ngan ym pyllait, lymda me kyrkhu ïa nga,” ong u Jakob.

²⁷ “Kaei ka kyrteng jong me?” uta u briew u kylli. “U Jakob,” u jubab.

²⁸ Uta u briew u ong, “Ka kyrteng jong me kam long shuh u Jakob. Me la ïaleh bad U Blei bad ki briew, bad me la jop ruh; kumta ka kyrteng jong me kan long noh u Israel.”

²⁹ U Jakob u la ong, “Mynta ïathuh ïa nga ïa ka kyrteng jong me.” Hynrei u la jubab, “Balei me kwah tip ïa ka kyrteng jong nga?” Nangta u la kyrkhu ïa u Jakob.

³⁰ U Jakob u la ong, “Nga la ïohi ïa U Blei markhmat, bad nga dang im hi.” Kumta u la khot kyrteng ïa kata ka jaka, Ka Peniel.

³¹ Ka sngi ka la mih haba u Jakob u mihnoh na Peniel, u da ïaid dkoh namar kata ka skhep.

³² Wat haduh mynta mynne, ki khun ki ksiew jong u Israel kim ju bam ïa ka dohksah kaba halor ka shyieng skhep, namar dei ha kata ka dohksah ba u Jakob u la shah kura.