JENESIS 23 - Khasi CL Bible (BSI)

Ka Sarah ka ïap bad u Abraham u thied jaka tep

¹ Ka Sarah ka la im shispah arphew hynñiew snem.

² Ka la ïap ha Hebron ha ka ri Kanaan, bad u Abraham u ïam sngewsih namar jong ka.

³ U la mihnoh na ka jaka ha kaba la buh ïa ka metïap jong ka tnga jong u, u la leit sha ki Hit, bad u ong,

⁴ “Nga long u nongwei uba im hapdeng jong phi; die ïa nga khyndiat ka jaka ba ngan ïoh ban tep ïa la ka tnga.”

⁵ Ki jubab, “Ko rangbah, to shahshkor ïa ngi.

⁶ Ngi khmih sha phi kum u nongïalam uba khraw; tep ïa la ka tnga ha ka jaka tep kaba bha tam kaba ngi don. Uno uno na ngi un da sngewkmen ban ai jaka tep ha phi, ba phin ïoh ban tep ïa ka.”

⁷ Te u Abraham u la nguh ha khmat jong ki bad u ong,

⁸ “Lada phi shah ïa nga ban tep ïa la ka tnga hangne, to pynkyrpad lem ïa u Ephron u khun jong u Sohar ba un die ha nga ïa ka krem Makhpelah, kaba don ha trai ka lyngkha jong u.

⁹ Ong ïa u ban die ha nga katba ka shongdor haba phi dang ïadon ryngkat, ba ngan ïohkynti ïa ka kum ka jaka tep.”

¹⁰ U Ephron hi u la shong lem bad kita kiwei pat ki Hit ha ka jaka ba ju long dorbar ha ka khyrdop jong ka nongbah; u la jubab ha ka jingïohsngew jong uwei pa uwei baroh hangta,

¹¹ “To shahshkor, ko rangbah, ngan ai ha phi ïa ka lyngkha baroh kawei, bad ïa kata ka krem kaba don hangta. Hangne ha ka jingdon ryngkat ki para jait jong nga, ngan ai ïa ka ha phi khnang ba phin ïoh tep ïa la ka tnga.”

¹² Hynrei u Abraham u nguh ha khmat kita ki Hit

¹³ bad u ong ha u Ephron, ba uwei pa uwei u lah ban ïohsngew, “Sngewbha, shah ngan kyrpad ïa phi, ban shahshkor. Ngan thied ïa ka lyngkha baroh kawei. To pdiang ïa ka jingsiew jong nga, bad ngan tep ïa la ka tnga hangta.”

¹⁴ U Ephron u jubab,

¹⁵ “Ko rangbah, ka khyndew ka shongdor tang sawspah tylli ki sbai rupa — kan long aïu kata hapdeng jong ngi? To tep ïa la ka tnga hangta.”

¹⁶ U Abraham u la mynjur bad u la thew ïa kata ka dor kaba u Ephron u la ong ha ka jingïohsngew lang kita ki briew — sawspah tylli ki sbai rupa kat kum ka jingthew ba la pyndonkam da ki nongkhaïi.

¹⁷ Da kumta keiñ ka khyndew jong u Ephron kaba ha Makhpelah, kaba don shaphang mihngi na Mamre, ka kylla long ka jong u Abraham. Ka kynthup ïa ka lyngkha, ïa ka krem kaba don hangta, bad ïa ki dieng baroh kiba don hapoh ki pud jong ka.

¹⁸ Ki Hit baroh kiba la ïadon ha kata ka jingïalang ki pynthikna ïa ka kum ka jingïohkynti jong u Abraham.

¹⁹ Te u Abraham u la tep ïa ka Sarah ka tnga jong u ha kata ka krem ha ka ri Kanaan.

²⁰ Kumta kata ka lyngkha kaba dei ka jong ki Hit, ryngkat bad ka krem kaba don hangta, ka la kylla long ka jingïohkynti jong u Abraham kum ka jaka tep briew.