JENESIS 22 - Khasi CL Bible (BSI)

U Blei u hukum ïa u Abraham ban kñia ïa u Isaak

¹ Hadien khyndiat por, U Blei u la tynjuh ïa u Abraham; u khot ïa u, “Abraham!” Bad u Abraham u jubab, “Oi, nga hangne!”

² “Shim ïa u khun jong me,” U Blei u ong, “u Isaak, u khun ba tang marwei jong me, ïa uba me ieit thep mynsiem, bad leit sha ka ri Moraïah. Hangta halor u lum ïa uba ngan sa pyn-i ha me, kñia ïa u kum ka jingainguh ha nga.”

³ Dang step phyrngab ha ka sngi kaba bud u Abraham u thlieh ki dieng na ka bynta ka jingkñia, u la pynkit halor ka kada, bad u la ïalam ïa u Isaak lem bad ar ngut ki shakri. Ki la ïamihnoh ban leit sha ka jaka ba U Blei u la ïathuh ha u.

⁴ Ha ka sngi kaba lai, u Abraham u la ïohi ïa kata ka jaka na jngai.

⁵ Te u ong ha kita ki shakri, “To shong hangne bad ka kada. Ma nga bad u khun ngin leit hangtai ban mane Blei, bad hadien kata ngin sa wan pat sha phi.”

⁶ U Abraham u pynkit ha u Isaak ïa ki dieng na ka bynta ka jingkñia, bad ma u pat u rah ïa ka tari bad ïa ki rnga barhem ban sliew ding. Katba baroh ar ngut ki dang ïa-ïaid,

⁷ u Isaak u ong, “Ko pa!” U jubab, “Oi, khun?” U Isaak u kylli, “Nga ïohi ïa ki rnga barhem bad ïa ki dieng, hynrei hangno pat u khunlangbrot na ka bynta ka jingkñia?”

⁸ U Abraham u jubab, “U Blei hi un sa pynbiang ïa uwei.” Bad baroh ar ngut ki nang ïa-ïaid lang.

⁹ Haba ki la poi ha kata ka jaka kaba U Blei u la ïathuh ha u, u Abraham u tei ïa ka duwan bad u pynbeit ïa kita ki dieng halor jong ka. U la khum ïa la u khun bad pynthiah ïa u halor ka duwan, hajrong kita ki dieng.

¹⁰ Nangta u shim ïa ka tari ban pynïap ïa u.

¹¹ Hynrei u angel U Trai u pyrta ïa u na bneng, “Abraham, Abraham!” U jubab, “Ho-oid, nga hangne.”

¹² “Wat pynmynsaw ïa u khynnah lane leh ei ei ïa u,” u ong. “Mynta, nga tip ba me sheptieng bad kohnguh ïa U Blei, namar mem shym la tyngkai ïa la u khun marwei na u.”

¹³ U Abraham u khmih sawdong bad u la ïohi ïa u langbrot uba la sahkut ki reng ha ka bniap. U leit ban shim ïa u, bad kñia ïa u kum ka jingainguh thang ha ka jaka u khun jong u.

¹⁴ U Abraham u khot kyrteng ïa kata ka jaka “U Trai U Pynbiang.” Bad haduh kane ka sngi ruh, ki briew ki dang ong, “Ha u lum jong U Trai u pynbiang.”

¹⁵ U angel jong U Trai u khot ïa u Abraham ha kaba ar sien na bneng,

¹⁶ “Nga la smai da ka kyrteng jong nga — U Trai u kren — ba ngan kyrkhu kyrhai ïa me. Namar me la leh ïa kane, bad mem shym la tyngkai noh ïa la u khun marwei na nga,

¹⁷ nga kular ba ngan ai ha me ïa ki khun ki ksiew kat ki khlur ka sahit bneng, lane kat ki symboh shyiap harud ka duriaw. Ki khun ki ksiew jong me kin jop ïa ki nongshun jong ki.

¹⁸ Ki jaitbynriew baroh kin sa kyrpad ïa nga ban kyrkhu ïa ki kumba nga la kyrkhu ïa ki khun ki ksiew jong me — baroh namar ba me la kohnguh ïa ka hukum jong nga.”

¹⁹ U Abraham u leit phai pat sha la ki shakri, bad ki ïaleit lang sha Beersheba, ha kaba u Abraham u shongneh hangta.

Ki khun ki ksiew jong u Nahor

²⁰ Hadien khyndiat por, u Abraham u la tip ba ka Milkah ka la kha phra ngut ki khun ïa u Nahor u para jong u:

²¹ u Us uba nyngkong, u Bus u para jong u, u Kemuel u kpa jong u Aram,

²² u Khesed, u Haso, u Pildash, u Jidlaph, bad u Bethuel, u kpa jong ka Rebekka.

²³ Ka Milkah ka ïoh ïa kine ki phra ngut ki khun na u Nahor, u para u Abraham.

²⁴ Ka Reuma, ka tnga kliar jong u Nahor, ka la kha ïa u Tebah, u Gaham, u Tahash, bad u Maakah.