JENESIS 2 - Khasi CL Bible (BSI)

¹ Bad kumta la pyndep ïa ka pyrthei baroh kawei.

² Ha ka sngi kaba hynñiew U Blei u la pyndep ïa kaei kaba u la trei bad u la sangeh treikam.

³ U la kyrkhu ïa ka sngi kaba hynñiew bad u la pynkyrpang ïa ka kum ka sngi bakyrpang, namar ha kata ka sngi, U Blei u la pyndep ïa ka jingpynlong jong u; bad u la sangeh treikam.

⁴ Bad kata ka long kumno ba la pynlong ïa ka pyrthei. Mynba U Trai U Blei u la thaw ïa ka pyrthei,

Ka kper Eden

⁵ ym shym don kino kino ki jingthung ha ka khyndew, bad ym shym don symbai ba la shylluit, namar um pat shym la pynhap slap, bad ym pat shym la don mano mano ban rep ha ka khyndew;

⁶ hynrei ka um ka la mih napoh ka sla khyndew bad ka ai um ïa ka.

⁷ Nangta U Trai U Blei u la shim katto katne ka dewmet na ka khyndew bad thaw ïa u briew na ka; u la pyrsad ka jingpyrsad ba ai jingim ha ki thliew khmut jong u bad uta u briew u la kylla long u jingthaw ba-im.

⁸ Nangta U Trai U Blei u la buh ka kper ha Eden, shaphang mihngi, bad hangta u buh ïa u briew uba u la lah thaw.

⁹ U la pynlong ïa ki jait dieng ba-itynnat baroh ban mih hangta bad kiba pynmih ïa ki soh kiba bha. Hapdeng jong kata ka kper la ïeng u dieng uba ai jingim bad u dieng uba ai jingtip ïa kaba bha bad ïa kaba sniew.

¹⁰ Ka don ka wahduid kaba tuid ha Eden bad kaba ai um ïa kata ka kper; shabar ka Eden, ka khlad ha ki saw tylli ki wah.

¹¹ Ka wah kaba nyngkong ka dei ka Pishon; ka tuid sawdong ka ri Habilah.

¹² (La shem hangta ïa ka ksiar nylla bad ruh ïa ka jingiwbih bym ju kham ïoh bad ïa ki mawlynnai.)

¹³ Ka wah kaba ar ka dei ka Gihon; ka tuid sawdong ïa ka ri Kush.

¹⁴ Ka wah kaba lai ka dei ka Tigris, kaba tuid shaphang mihngi jong ka Assyria. Bad ka wah kaba saw ka dei ka Ïuphratis.

¹⁵ Nangta U Trai U Blei u buh ïa u briew ha ka Kper Eden ban rep bad sumar ïa ka.

¹⁶ U la bthah ïa u, “Me lah ban bam ïa u soh jong uno uno u dieng ha ka kper,

¹⁷ lait noh u dieng uba ai jingtip ïa kaba bha bad ïa kaba sniew. Mem bit ban bam ïa u soh jong uta u dieng, lada me bam, men ïap ha kata hi ka sngi.”

¹⁸ Nangta U Trai U Blei u la ong, “Kam long kaba bha ïa u briew ban im marwei. Ngan thaw ka nongsynran babiang ban ïarap ïa u.”

¹⁹ Kumta u la shim katto katne ka dewmet na ka khyndew bad u la thaw ïa baroh ki mrad bad ki sim. Nangta u la wallam ïa ki ha u briew ba un khmih aïu un khot kyrteng ïa ki; bad kata keiñ ka long kumno ba ki baroh ki ïoh ïa la ki kyrteng.

²⁰ Kumta u briew u la khot kyrteng ïa baroh ki sim bad ki mrad; hynrei ym don kawei ruh na ki kaba long ka nongsynran babiang ban ïarap ïa u.

²¹ Nangta U Trai U Blei u la pynlong ïa u briew ban ïohthiah lyngngai, bad katba u dang ïohthiah, u la shim kawei na ki shyieng krung jong u briew bad u set pyndap pat da ka doh.

²² U la thaw ïa ka briew na ka shyieng krung, bad u la wallam ïa ka ha u.

²³ Nangta u briew u la ong, “Ha kaba khatduh, hangne don kawei na ka jait ka kynja jong nga — Ka shyieng ba la shim na ka shyieng jong nga, bad ka doh na ka doh jong nga. ‘Ka Briew’ ka dei ka kyrteng jong ka namar la shim ïa ka na u briew.”

²⁴ Dei kata keiñ balei ba u briew u iehnoh ïa la u kpa bad ka kmie bad la pynïasoh bad ka tnga jong u, bad ki kylla long kawei.

²⁵ U briew bad ka briew ki la ïalong kiba lyngkhuit, hynrei kim shym la sngewlehrain.