JENESIS 16 - Khasi CL Bible (BSI)

Ka Hagar bad u Ishmael

¹ Ka tnga u Abram ka Sarai, kam shym la ïoh khun satia. Hynrei ka la don bad ka, kawei ka mraw na Ijipt kaba kyrteng ka Hagar, bad kumta ka ong ha u Abram, “U Trai u la khang ïa nga ban ïoh khun.

² Balei mem leit thiah bad ka mraw jong nga? Lehse ka, ka lah ban ïoh khun ïa nga.” U Abram u la mynjur ïa kaei ba ka Sarai ka ong.

³ Kumta ka la ai ïa ka Hagar ha u ba kan long ka tnga kliar jong u. (Kane ka la jia hadien ba u Abram u la shong la sah shiphew snem ha ka ri Kanaan.)

⁴ U Abram u ïathiah shongkha bad ka Hagar, bad ka la punkhun. Haba ka tip ba ka la punkhun, ka la sngewsarong bad ka la ibeiñ ïa ka Sarai.

⁵ Te ka Sarai ka ong ha u Abram, “Dei namar jong me ba ka Hagar ka ibeiñ ïa nga! Nga hi nga la ai ïa ka ha me, bad naduh ba ka tip ba ka la punkhun, ka ibeiñ ïa nga. Ai ba U Trai un bishar mano ba dei napdeng jong ngi, ma me lane ma nga!”

⁶ U Abram u ong, “Ñiuma, ka dei ka mraw jong pha bad hapoh ka jingpynïaid jong pha; leh ïa ka katba pha sngewbit.” Kumta ka Sarai ka lehbeiñ tyngeh ïa ka kat haduh ba ka la phet noh.

⁷ U angel jong U Trai u la ïashem ïa ka Hagar harud ka umpohliew ha ka ri shyiap ha ka lynti sha Shur bad u ong,

⁸ “Ko Hagar, ka mraw jong ka Sarai, na-ei pha wan bad shano phan leit?” Ka jubab, “Nga phet noh na la ka kynrad.”

⁹ U ong ha ka, “Khie leit phai pat sha la ka kynrad, bad long ka mraw jong ka.”

¹⁰ Nangta u la ong, “Ngan ai ha pha bun ki khun ki ksiew ba yn ym don mano mano ba lah ban ñiew ïa ki.

¹¹ Phan sa ïoh khun shynrang, bad phan khot kyrteng ïa u, u Ishmael, namar U Trai u la ïohsngew ïa ka jingud sngew jynjar jong pha.

¹² Hynrei u khun jong pha un im kum ka kada khlaw, un ïaleh pyrshah ïa uwei pa uwei u briew, bad uwei pa uwei u briew un ïaleh pyrshah ïa u. Un shong khlad na la ki kur ki jait baroh.”

¹³ Ka Hagar ka kylli ïa lade, “Hato nga da ïohi shisha ïa U Blei bad ba nga dang im ban ïathuh ïa kata?” Kumta ka la khot ïa ka kyrteng U Trai uba la kren ha ka, “U Blei uba ïohi.”

¹⁴ Dei namar kata ba ki briew ki khot kyrteng ïa ka pukri hapdeng ka Kadesh bad ka Bered “Ka Pukri jong Uta Uba Im Uba Ïohi Ïa Nga.”

¹⁵ Bad ka Hagar ka la ïoh khun shynrang na u Abram, bad u la kyrteng ïa u, u Ishmael.

¹⁶ U Abram u la don phraphew hynriew snem ha kata ka por.