JENESIS 10 - Khasi CL Bible (BSI)

Ki khun ki ksiew na ki khun shynrang u Noah

¹ Kine ki long ki khun ki ksiew na u Shem, u Ham, bad u Japheth, ki khun shynrang jong u Noah. Kine lai ngut ki la ïoh khun shynrang hadien kata ka jingshlei um.

² Ki khun shynrang jong u Japheth — u Gomer, u Magog, u Madai, u Jaban, u Tubal, u Meshek, bad u Tiras — ki la long ki kpa tymmen jong ki briew kiba kheiñ jait na ki.

³ Ki khun shynrang jong u Gomer ki long ki briew jong ka Ashkenas, ka Riphath, bad ka Togarmah.

⁴ Ki khun shynrang jong u Jaban ki long ki briew jong ka Elishah, ka Spain, ka Sypros, bad ka Rhodes; ki la long ki kpa tymmen jong ki briew kiba shong ha ki rud duriaw bad ha ki dewlynnong.

⁵ Kine ki long ki khun ki ksiew jong u Japheth, kiba shong ha ki ri kiba pher bapher, bad ha la ka jait ka jait kaba kren ïa la ka jong ka jong ka ktien.

⁶ Ki khun shynrang jong u Ham — u Kush, u Ijipt, u Libya, bad u Kanaan — kiba long ki kpa tymmen jong ki briew kiba kheiñ jait na ki.

⁷ Ki khun ki ksiew jong u Kush ki long ki briew jong ka Seba, ka Habilah, ka Sabtah, ka Raamah, bad ka Sabteka. Ki khun ki ksiew jong u Raamah ki long ki briew jong ka Sheba, bad ka Dedan.

⁸ U Kush u la don u khun uba kyrteng u Nimrod; uba la long u nongjop pyrthei uba khraw banyngkong eh.

⁹ Da ka jingïarap U Trai u la long u nongbeh mrad uba khraw; ba kumta sa mih ka jingong, “Ai ba U Trai un pynlong ïa me u nongbeh mrad uba khraw kat u Nimrod.”

¹⁰ Ha kaba sdang, ka hima jong u ka kynthup ïa ka Babilon, ka Erek, bad ka Akkad, kiba don baroh ha ka ri Babilonia.

¹¹ Na kata ka ri u leit sa sha Assyria, bad u tei hangta ïa ki nongbah ka Ninebeh, ka Rehoboth Ir, ka Kalah,

¹² bad ka Resen, kaba don hapdeng ka Ninebeh bad ka nongbah bakhraw ka Kalah.

¹³ Ki khun ki ksiew jong u Ijipt ki long ki briew jong ka Lydia, ka Anam, ka Lehab, ka Naphtuh,

¹⁴ ka Pathrus, ka Kasluh bad ka Krit na kiba la hiarpateng ki Philistia.

¹⁵ Ki khun shynrang jong u Kanaan — u Sidon, u khun nyngkong jong u, bad u Heth — kiba long ki kpa tymmen jong ki briew kiba kheiñ jait na ki.

¹⁶ U Kanaan u long ruh u kpa tymmen jong ki Jebus, ki Amor, ki Girgash,

¹⁷ ki Hib, ki Ark, ki Sin,

¹⁸ ki Arbad, ki Semar, bad ki Hamath. Ki jait bapher bapher jong ki jait Kanaan ki la saphriang kylleng kylleng,

¹⁹ haduh ba ki pud ka Kanaan ki la ïar naduh Sidon, beit beit shathie shaphang Gerar hajan Gasa, bad shaphang mihngi shaduh Sodom, Gomorrah, Admah, bad Seboiim hajan Lasha.

²⁰ Kine keiñ ki long ki khun ki ksiew jong u Ham kiba shong ha ki ri kiba pher bapher, bad ha la ka jait ka jait kaba kren ïa la ka jong ka jong ka ktien.

²¹ U Shem, u hynmen jong u Japheth, u la long u kpa tymmen jong ki Hebru baroh.

²² Ki khun shynrang jong u Shem — u Elam, u Asshur, u Arpakhshad, u Lud, bad u Aram — kiba long ki kpa tymmen jong ki briew kiba kheiñ jait na ki.

²³ Ki khun ki ksiew jong u Aram ki long ki briew jong ka Us, ka Hul, ka Gether, bad ka Meshek.

²⁴ U Arpakhshad u dei u kpa jong u Shelah, uba dei u kpa jong u Eber.

²⁵ U Eber u la ïoh ar ngut ki khun shynrang: ka kyrteng jong uwei ka long u Peleg, namar dei ha ki sngi jong u ba la pynïakhlad ïa ki briew ha ka pyrthei, bad ka kyrteng jong u para jong u pat ka long u Joktan.

²⁶ Ki khun ki ksiew jong u Joktan ki dei ki briew jong ka Almodad, ka Sheleph, ka Hasarmabeth, ka Jerah,

²⁷ ka Hadoram, ka Usal, ka Diklah,

²⁸ ka Obal, ka Abimael, ka Sheba,

²⁹ ka Ophir, ka Habilah, bad ka Jobab. Kine baroh ki dei kiba hiarpateng na u Joktan.

³⁰ Ka ri ha kaba ki shong ki sah ka ïar naduh Mesha haduh Sephar, kaba don ha ka ri lum kaba shaphang mihngi.

³¹ Kine ki long ki khun ki ksiew na u Shem, kiba shong ha ki ri kiba pher bapher, bad ha la ka jait ka jait kaba kren ïa la ka jong ka jong ka ktien.

³² Kine ki briew baroh ki long ki khun ki ksiew jong u Noah, ha la ka jait ka jait, kat kum la ki jingkheiñ jait bapher bapher ha ka jinghiarpateng. Hadien ka jingshlei um, baroh ki jaitbynriew ha ka pyrthei ki hiarpateng na ki khun shynrang jong u Noah.