JAKOB 5 - Khasi CL Bible (BSI)

Ka jingmaham ïa kiba riewspah

¹ Bad mynta, phi ki briew kiba riewspah, to shahshkor ïa nga! to ïam bad to lynñiar ïa ki jinglanot ki ban wan hap ha phi!

² Ka spah jong phi ka la pyut noh, bad ki jaiñ jong phi ki la bam kruiñ.

³ Ka ksiar bad ka rupa jong phi ka la bam sarang, bad kane ka sarang kan long ka sakhi pyrshah ïa phi bad kan sa bam duh ïa ka doh jong phi kum ka ding. Phi la kynshew spah ha kine ki sngi kiba khatduh.

⁴ Phim pat siew bainong ei ei ïa ki briew kiba trei ha ki lyngkha jong phi. To shahshkor ïa ki jingmudui jong ki! Ki jingkyang jong kito kiba la lum ïa ki jingot ki la poi sha ki shkor jong U Blei, U Trai Badonbor Baroh.

⁵ Ka jingim jong phi ha kane ka pyrthei ka la long kaba dap da ka jingpahuh bad jingsngewbha. Phi la pynsngaid ïa lade na ka bynta ka sngi ka jingshohdoh.

⁶ Phi la pynrem bad phi la pynïap ïa ki briew kiba lui lui, bad kim shym pyneh ïa phi.

Ka jingïaishah bad ka jingduwai

⁷ To long kiba ïaishah, namarkata, ko parabangeit jong nga, haduh ba U Trai un wan. Khmih katno u nongrep u long uba ïaishah haba u ap ïa la ka khyndew ban pynmih ïa ki jingthung kiba kordor. U ïaishah ban ap ïa u slap synrai bad ïa u slap pyrem.

⁸ Phi ruh phi dei ban long kiba ïaishah. To batskhem ïa ki jingkyrmen jong phi, naba ka sngi ka jingwan U Trai ka la jan.

⁹ To wat ïakren khñium paralok hi, ko parabangeit jong nga, ba U Blei un ym bishar ïa phi. U Nongbishar u la jan, u la kloi ban wanpaw.

¹⁰ Ko parabangeit jong nga, to kynmaw ïa ki nongïathuhlypa kiba la kren ha ka kyrteng jong U Trai. To shim ïa ki kum ki nuksa jong ka jingïaineh ba-ïaishah hapdeng ka jingshahshitom.

¹¹ Ngi khot ïa ki kiba suk namar ki la long kiba ïaishah. Phi la ïohsngew ïa ka jingïaishah u Job, bad phi tip kumno U Trai u la pyndap ïa u ha kaba kut. Naba U Trai u long uba dap da ka jinglehisynei bad jinglehsbun.

¹² Nalor kine baroh, ko parabangeit jong nga, wat pyndonkam da ka jingsmai haba phi pynlong ka jingkular. Wat smai da ka bneng ne da ka khyndew ne da kaei kaei pat. Shu ong “Ho-oid” haba phi mut ho-oid, bad “Em” haba phi mut em, bad phin ym hap hapoh ka jingbishar U Blei.

¹³ Hato don napdeng jong phi ba shem jynjar? U dei ban duwai. Hato don uba kmen? U dei ban rwai ïaroh.

¹⁴ Hato don uno uno uba pang? U dei ban phah khot ïa ki nongsharai balang, ki ban duwai na ka bynta jong u bad pynsleh ha u da ka umphniang Olib ha ka kyrteng jong U Trai.

¹⁵ Kane ka jingduwai ba la pynlong ha ka jingngeit kan pynkhiah ïa u briew uba pang; U Trai un sa ai biang ha u ïa ka jingkoit jingkhiah, bad ïa ki pop kiba u la leh yn map.

¹⁶ Namarkata, to phla ïa la ki pop iwei ha iwei pat, khnang ba yn pynkhiah ïa phi. Ka jingduwai jong u briew uba hok ka don ka bor kaba khraw.

¹⁷ U Elijah u la long u briew kum ma ngi. U la duwai shitrhem ba kan ym hap slap, bad ym shym la hap slap halor ka khyndew haduh lai snem shiteng.

¹⁸ Sa shisien u la duwai, bad ka suiñbneng ka la theh noh ïa la u slap bad ka khyndew ka la pynmih ïa ki jingthung.

^19-20 Ko parabangeit jong nga, lada uwei na phi u ïaid sakma na ka jingshisha bad uwei pat u pynphai pat ïa u, to kynmaw ïa kane: Uno uno uba pynphai pat ïa u nongpop na ka lynti kaba bakla un pynim ïa ka mynsiem jong uta u nongpop na ka jingïap bad yn map ïa ki pop kiba bun byllien jong u.