JAKOB 4 - Khasi CL Bible (BSI)

Ka jingïalang lok bad ka pyrthei

¹ Nangno ki mih ki thma bad ki jingïakajia hapdeng jong phi? Ki mih na ki jingkwah brai jong phi ïa ka jingsngewbha, kiba ïai ïaleh hapoh jong phi.

² Phi kwah ei ei, hynrei phim ïoh ïa kita, kumta phi pynïap; phi da kwah eh, hynrei phim lah ban ïoh ïa kita, kumta phi ïania bad phi ïaleh thma. Phim ïoh ïa kaei kaba phi kwah, namar ba phim pan na U Blei ïa ka.

³ Bad haba phi pan, phim ïoh ïa ka, namar ki jingthmu jong phi ki long kiba sniew; phi pan ïa kiei kiei ban pyndonkam na ka bynta ki jingsngewbha jong phi hi.

⁴ Ko phi ki briew bym lah shaniah! Hato phim tip ba ka jingïalang lok bad ka pyrthei ka long ka nongshun jong U Blei? Uno uno uba kwah ban pynlong lok bad ka pyrthei u pynlong ïa lade u nongshun jong U Blei.

⁵ Wat pyrkhat ba kam don ka jingshisha ha ka Jingthoh Bakhuid kaba ong, “Ka mynsiem kaba U Blei u la buh hapoh jong ngi ka dap da ki jingkwah kiba jur.”

⁶ Hynrei ka jingaiei kaba U Blei u ai ka long kaba kham khlaiñ shuh shuh. Kumba ka Jingthoh Bakhuid ka ong, “U Blei u pyrshah ïa kiba sarong, hynrei u ai ïa ka jingaiei ha kiba sngewrit.”

⁷ Kumta te, to pyndem ha U Blei. To ïaleh pyrshah ïa u Bymman, bad un phet ïap noh na phi.

⁸ To wan hajan U Blei, bad un wan hajan jong phi. To sait ïa la ki kti, ko phi ki nongpop! To pynkhuid ïa la ki dohnud, phi kiba arsap!

⁹ To leh sngewsih, to ïam, bad to ïamkthang; to pynlong ïa ka jingrkhie ban kylla sha ka jingïam, ka jingkmen sha ka jingsngewdiaw!

¹⁰ To phin pynrit ïa lade ha khmat U Trai, bad un pynkhraw ïa phi.

Ka jingmaham pyrshah ïa kaba bishar ïa u parabangeit

¹¹ Wat ïa-wohnia para ma phi, ko parabangeit jong nga. Uno uno uba wohnia ïa u parabangeit ne bishar ïa u, u wohnia ïa ka Hukum bad u bishar ïa ka. Lada phi bishar ïa ka Hukum, te phim long shuh uba kohnguh ïa ka Hukum, hynrei uwei uba bishar ïa ka.

¹² Dei tang U Blei uba long u nongai hukum bad u nongbishar. Dei tang ma u hi uba lah ban pynim bad ban pynjot. Hato phi pyrkhat ba phi dei uei, ban bishar ïa la u parabriew?

Ka jingmaham pyrshah ïa ka jingkren sarong

¹³ Mynta to shahshkor ïa nga, phi kiba ong, “Mynta ka sngi ne la shai ngin ïaleit sha kata ka nongbah, ha kaba ngin sah haduh shisnem bad ngin ïakhaïi bad ngin ïakamai shibun ka pisa.”

¹⁴ Phim tip wat ïa kaei ka ban jia ïa ka jingim jong phi ha ka lashai! Phi long kum ka tdem, kaba paw tang shipor bad nangta ka jah noh.

¹⁵ Kaei kaba phi dei ban ong ka long kane: “Lada U Trai u mon, ngin im bad ngin leh ïa kane lane ïa katai.”

¹⁶ Hynrei mynta phi sngewsarong bad phi kyr-eit; baroh kata kaba phi kyr-eit ka long kaba bakla.

¹⁷ Kumta te, u briew u bym leh ïa kaba bha kaba u tip ba u dei ban leh u long uba shah pynrem namar ka pop.