JAKOB 3 - Khasi CL Bible (BSI)

U thylliej

¹ Ko parabangeit jong nga, ym dei shibun na phi ban long ki nonghikai. Kumba phi tip, ma ngi ki nonghikai ngin sa shah bishar kham pyrkhing ban ïa kiwei pat.

² Baroh na ngi, ngi bakla bunsien. Hynrei lada u briew um ju bakla ha kaei kaba u kren, u long uba janai bad u long ruh uba lah ban synshar ïa lade nadong shadong.

³ Ngi pyndait lakam ha ka shyntur jong u kulai lada ngi kwah ba un kohnguh ïa ngi, bad kumta ngi lah ban pynïaid ïa u kat shaba ngi mon.

⁴ Lane to pyrkhat ïa ka lieng kaba heh: La ka heh katno katno bad la pynïaid ïa ka da ki lyer bakhlaiñ, la ñiah ïa ka da u boitha uba rit eh, bad ka ïaid kat shaba u nongking lieng u mon ba kan leit.

⁵ Kumta ka long bad u thylliej: La u long uba rit, u lah ban sngewsarong shaphang kiei kiei kiba khraw. Shu pyrkhat kat ka 'lawbah lah ban pynpluh ïa ka da i thylliej ding iba rit!

⁶ Bad u thylliej u long kum ka ding. U long ka pyrthei jong ka jingsniew, uba shim ïa ka jaka ha ki met jong ngi bad uba pynphriang ïa kaba sniew ha ka met baroh kawei. U wiang ding ïa ka jingïaid lynti jong ka jingim da ka ding kaba wan sha u na ka dujok hi.

⁷ U briew u la lah ban pynjuh bad u la pynjuh ïa baroh kiwei pat ki jait jingthaw — ki mradkhlaw bad ki sim, ki mrad bapar bad ki dohkha.

⁸ Hynrei ym don mano mano ba la lah ban pynjuh ïa u thylliej. U long uba sniew bad bym lah ban synshar, uba dap da ka bih ba pynïap.

⁹ Ngi pyndonkam ïa u ban ainguh ïa U Trai bad U Kpa jong ngi bad ban tim ruh ïa la u parabriew, ïa uba la thaw ha ka dur U Blei.

¹⁰ Ki kyntien jong ka jingsngewnguh bad ka jingtim ki mihnoh na kajuh ka shyntur. Ko parabangeit jong nga, kane kam dei ban jia.

¹¹ Ym don ka umpohliew kaba pynmih ïa ka um kaba thiang bad ïa ka um kaba kthang na kajuh ka tyllong.

¹² U dieng Dumbur, ko parabangeit jong nga, um lah ban sei ïa ki soh Olib; ne u dieng sohwaiñ um lah ban sei ïa ki soh Dumbur, lymne ka umpohliew mluh kam lah ban pynmih ïa ka um kaba bang.

Ka jingstad kaba najrong

¹³ Hato don uno uno napdeng jong phi uba stad bad shemphang? U dei ban pynshisha ïa ka da ka jingim babha, da ki kam babha jong u kiba u la leh ha ka jingsngewrit bad jingstad.

¹⁴ Hynrei lada hapoh ka dohnud jong phi, phi don ka jingpihuiñ, bad khwan myntoi, to wat leh pop pyrshah ïa ka jingshisha da kaba kren sarong ïa la ka jingstad.

¹⁵ Kaba kum kata ka jingstad kam long kaba wan hiar na bneng; ka long jong ka pyrthei, kam long kaba kynja mynsiem bad ka long kaba kynja ksuid.

¹⁶ Ha kaba ka don ka jingpihuiñ bad ka jingkhwan myntoi, hangta ka don ruh ka jingbymïaid ryntih bad ki jait jingsniew baroh.

¹⁷ Hynrei ka jingstad kaba wan najrong nyngkong eh ka long kaba sngur; ka long kaba pynïashong suk, kaba jemnud bad kaba pynlong paralok; ka dap da ka jinglehisynei bad ka pynmih ïa ka jingseisoh ha ki kam babha; ka lait na ka jingshah shiliang bad ka jingarsap.

¹⁸ Bad ka jingbha ka long ka jingmih ba la pynmih na ki symbai kiba ki nongpynïasuk ki la bet ha ka jingsuk.