JAKOB 2 - Khasi CL Bible (BSI)

Kaba adong ïa ka jingñiew shiliang khmat

¹ Ko parabangeit jong nga, kum kiba ngeit ha U Jisu Khrist uba U Trai jong ngi, U Trai ka burom, phim dei ban ñiew ïa ki parabriew da ki rukom kiba pher na kaei kaba ïohi ïa ki na shabar.

² Tharai u briew uba riewspah uba deng ïa ka sati ksiar bad uba riam da ki jaiñ kiba kynsai u wan rung sha ka jingïalang jong phi, bad u briew uba duk ha ki jaiñjot ruh u wan.

³ Lada phi kham pyn-i burom ïa u briew uba riam bha bad phi ong ïa u, “To shong ha kane ka jaka shong kaba bha tam,” hynrei phi ong ïa u briew uba duk, “To ïeng hangtai, lane to shong hangne ha madan hajan ki kjat jong nga,”

⁴ te phi long ba la rem da kaba pynïapher hapdeng jong phi hi bad phi bishar ha ka nongrim jong ki jingthmu basniew.

⁵ To shahshkor, ko parabangeit ba-ieit jong nga! U Blei u la jied ïa ki briew kiba duk ha kane ka pyrthei ban long kiba riewspah ha ka jingngeit bad ban kam kynti ïa ka hima kaba u la kular ha kito kiba ieit ïa u.

⁶ Hynrei phim ñiewburom ïa kiba duk! Kiei kita kiba khñiot beiñ ïa phi bad ba ïalam ïa phi ha khmat ki nongbishar? Kiba riewspah keiñ!

⁷ Dei ma ki kiba kren sniew ïa kata ka kyrteng babha ïa kaba la ai ha phi.

⁸ Phi leh ïa kaei kaba dei lada phi kohnguh ïa ka hukum jong ka hima, ïa kaba la shem ha ka Jingthoh Bakhuid, “To ieit ïa la u paramarjan kumba ieit ïa lade.”

⁹ Hynrei lada phi ñiew ïa ki briew kat kum ba ki paw shabar, phi long ba la rem ha ka pop, bad ka hukum ka pynrem ïa phi kum u nongpynkheiñ hukum.

¹⁰ Uno uno uba pynkheiñ ïa kawei ka hukum u long uba shah pynrem ha kaba pynkheiñ ïa ki baroh.

¹¹ Naba ujuh uba la ong, “Wat klim,” u la ong ruh, “Wat pynïap.” Wat lada phim shym klim, phi la long nongpynkheiñ hukum lada phi pynïap briew.

¹² To kren bad to leh kum ki briew ïa kiba yn sa bishar da ka hukum kaba pyllaitluid ïa ngi.

¹³ Naba U Blei un ym pyn-i jingsngewsynei haba u bishar ïa u briew u bym shym la leh-isynei; hynrei ka jinglehisynei ka jop noh halor ka jingbishar.

Ka jingngeit bad ki kam

¹⁴ Ko parabangeit jong nga, kan myntoi aïu ïa uba ong ba u don ka jingngeit lada da ki kam jong u, um pynshisha ïa kata? Hato kata ka jingngeit kan pynim ïa u?

¹⁵ Tharai don ki parabangeit shynrang bad kynthei kiba donkam jaiñ bad kim don ka bam kaba biang ban bam.

¹⁶ Kan myntoi aïu da kaba ong ha ki, “U Blei un kyrkhu ïa phi! To phong syaid bad to bam bha!” — lada phim ai ha ki ïa ki jingdonkam jong ka jingim?

¹⁷ Kumta ka long bad ka jingngeit: Lada ka long tang ma ka hi bad kam kynthup ïa ki kam, te ka long kaba ïap.

¹⁸ Hynrei don u ban ong, “Uwei u briew u don ka jingngeit, uwei pat u don da ki kam.” Ka jubab jong nga ka long “To pyn-i ha nga kumno uno uno u lah ban don ka jingngeit khlem ki kam. Ngan sa pyn-i ïa phi ïa ka jingngeit jong nga da ki kam.”

¹⁹ Hato phi ngeit ba don tang uwei U Blei? Kata ka bha! Ki ksuid ruh ki ngeit — bad ki kyiuh da ka jingsheptieng!

²⁰ Phi kiba bieit! Hato phi kwah ban da pyn-i ba ka jingngeit khlem ki kam ka long ka bymmyntoi?

²¹ Kumno u Abraham, u kpa tymmen jong phi u la long uba la pynksan da U Blei? Ka la long namar ki kam ki jong u, mynba u la aiti ïa u Isaak u khun jong u ha ka duwan.

²² Hato phim ïohi? Ka jingngeit jong u bad ki kam jong u ki ïatreilang; ïa ka jingngeit jong u la pynlong janai da ki kam jong u.

²³ Bad ïa ka Jingthoh Bakhuid la pynshisha haba ka la ong, “U Abraham u la ngeit ha U Blei; bad namar ka jingngeit jong u, U Blei u la pdiang ïa u kum uba hok.” Bad kumta ïa u Abraham la khot u paralok jong U Blei.

²⁴ Phi ïohi, namarkata, ka dei da ki kam jong u ba ïa u briew la pynksan ha U Blei, ym tang da ka jingngeit jong u hi.

²⁵ Ka la long kumjuh ruh bad ka Rahab kaba long ka nuti. La pynksan ïa ka ha U Blei lyngba ki kam jong ka, mynba ka la pdiang sngewbha ïa ki Israel kiba la wan syntiat bad ïarap ïa ki ban lait phet na kawei pat ka lynti.

²⁶ Te kumta, kumba ka met khlem ka mynsiem ka long kaba ïap, kumta ruh ka jingngeit khlem ki kam ka long kaba ïap.