JAKOB 1 - Khasi CL Bible (BSI)

¹ Na u Jakob, u shakri jong U Blei bad U Jisu Khrist uba U Trai: Ka jingai khublei ïa baroh ki briew jong U Blei ba la pynsakma sha kylleng ka pyrthei.

Ka jingngeit bad ka jingstad

^2-3 Ko parabangeit jong nga, to ñiew ïa lade ba phi long kiba donbok eh haba phi ïakynduh ïa ki jingtynjuh kiba bun ha ka lynti ka jingim jong phi, naba phi tip ba haba ka jingngeit jong phi ka jop haba ïashem kum kita ki jingtynjuh, ka jingmih ka long ka jinglah ban ïaishah.

⁴ Pynthikna ba ka jingïaishah jong phi ka rah ïa phi artet ka lynti khlem da hap noh, khnang ba phin long kiba janai bad kiba dap pura, khlem jingduna ei ei.

⁵ Hynrei lada uno uno na phi u duna ïa ka jingstad, u dei ban duwai ha U Blei, u ban ai ïa ka ha u; namar U Blei u ai kylluid bad ai ei ïa baroh.

⁶ Hynrei haba phi duwai, phi dei ban ngeit bad ban ym artatien da lei lei. Uno uno uba artatien u long kum ka jingat phyllung ha ka duriaw ïa kaba la beh bad ba la pynshad kynting da ka lyer.

^7-8 U briew uba kum uta, um lah ban kut jingmut bad ban rai ha kiei kiei baroh ba u leh, um dei ban pyrkhat ba un sa ïohpdiang ei ei na U Trai.

Ka jingduk bad ka jingriewspah

⁹ U parabangeit uba duk u dei ban kmen haba U Blei u kyntiew ïa u, bad u parabangeit uba riewspah u dei ban kmen haba U Blei u pynhiar ïa u.

¹⁰ Naba uba riewspah un tlor noh kum u syntiew jong u jingthung ha khlaw.

¹¹ Ka sngi ka mih lem bad ka jingshit kyr-ang bad ka thang ïa u jingthung; u syntiew jong u, u hap noh, bad ka jingitynnat jong u ka jah noh. Ha kajuh ka rukom ïa uba riewspah yn pynjot noh katba u dang don ha ka kam jong u ba u trei.

Kaba shah tynjuh bad kaba shah pynshoi

¹² Suk uta u briew uba ïaineh hapdeng ki jingtynjuh, namar ynda u jop haba u la ïaid lyngba ïa kaba kum kata ka jingtynjuh, un ïohpdiang kum ka bainong jong u ïa ka jingim kaba U Blei u la kular ha kito kiba ieit ïa u.

¹³ Lada u briew u shah pynshoi da kum kita ki jingtynjuh, um dei ban ong, “Kane ka jingpynshoi ka wan na U Blei.” Naba ïa U Blei ym lah ban pynshoi da kaba sniew, bad ma u hi da lade um pynshoi ïano ïano.

¹⁴ Hynrei u briew u shah pynshoi haba u shah ring pah bad shah riam ha ki jingkwah brai jong u hi.

¹⁵ Nangta ki jingkwah brai jong u ki pun hapoh jong u bad ka jingmih ka long ban leh ïa ka pop; bad ka pop, haba ka la ih bha, ka pynmih ïa ka jingïap.

¹⁶ To wat shah shukor, phi ki parabangeit ba-ieit jong nga!

¹⁷ Ka jingai kaba bha baroh bad kaba janai baroh ka wan na bneng; ka wan hiar na U Blei, u Nongpynlong ïa ki jingshai ba kynja bneng, u bym ju kylla lane pynlong jingdum da ka jingpynphai.

¹⁸ Da ka mon sngewbha jong u hi u la wallam ïa ngi sha ka jingim lyngba ka ktien jong ka jingshisha, khnang ba ngi dei ban ïoh ïa ka jaka kaba nyngkong hapdeng ki jingthaw baroh.

Kaba ïohsngew bad kaba leh

¹⁹ To kynmaw ïa kane, ko parabangeit ba-ieit jong nga! Uwei pa uwei u dei ban long uba kloi ban shahshkor, hynrei uba suki ban kren bad uba suki ban bitar.

²⁰ Ka jingbitar u briew kam lah ban jop ïa ka jingthmu bahok jong U Blei.

²¹ Kumta to kiar noh na ki jingmlien bajakhlia baroh bad na ki jinglong bymman baroh. To pyndem ha U Blei bad pdiang ïa ka ktien kaba u la thung ha ki dohnud jong phi, kaba lah ban pynim ïa phi.

²² Wat shukor ïa lade tang da kaba sngap ïa ka ktien jong u; pynban, to pyntreikam ïa ka.

²³ Uno uno uba shahshkor ïa ka ktien hynrei u bym pyntreikam ïa ka u long kum u briew uba peit ha ka ïitkhmih bad ïohi ïa lade kumba u long.

²⁴ U peit bha ïa lade bad nangta u leit noh bad kumta hi u klet noh ba u long kum uei.

²⁵ Hynrei uno uno uba peit bniah ïa ka hukum bajanai kaba pyllaitluid ïa ki briew, uba ïai pynleit jingmut ïa ka bad ym tang ban sngap ïa ka bad nangta ban klet noh, hynrei u pyntreikam ïa ka — uta u briew un ïoh jingkyrkhu na U Blei ha kaei kaei kaba u leh.

²⁶ Hato don uno uno uba pyrkhat ba u long uba riewblei? Lada um synshar ïa la u thylliej, ka jinglong riewblei jong u kam myntoi bad u shukor ïa lade.

²⁷ Kaei kaba U Blei uba U Kpa u ñiew ba ka long kaba sngur bad ka jinglong riewblei bashisha ka long kane: Ban leit khmih ïa ki khunswet bad ïa ki riewkynthei ha ka jingshitom jong ki bad ban ri noh ïa lade kiba khlem thohbria na ka jong ka pyrthei.