ISAÏAH 9 - Khasi CL Bible (BSI)

¹ Yn ym don kano kano ka lad ïa ki ban lait phet na kane ka por jingjynjar. Ïa ka ri jong ki jait Sebulun bad Naphtali la pynjahburom shisien, hynrei ka lawei kan wanrah burom ïa kane ka thain, na ka Mediterranian sha ka phang mihngi sha ka ri ha kawei ka liang jong ka Jordan, bad wat sha Galilaïa hi, ha kaba ki nongwei ki shong ki sah.

U syiem u ban sa wan

² Ki briew kiba la ïaid ha ka jingdum ki la ïohi ïa ka jingshai kaba khraw. Ki la shong ha ka ri jong ki syrngiew, hynrei mynta ka jingshai ka la tyngshaiñ halor jong ki.

³ Me la ai ha ki ka jingkmen kaba khraw, ko Trai; me la pynlong ïa ki ban kmen. Ki shadkmen ha kaei kaba me la leh kumba ki briew ki shadkmen haba ki ot kew lane haba ki ïabynta ïa ka spah ba la ïoh kurup.

⁴ Namar me la pynkheiñ ïa ka lyngkor kaba la bankhia ïa ki bad ïa u dieng sympat uba la shoh ïa ki tyrpeng jong ki. Me la jop ïa ka jaitbynriew kaba la banbeiñ bad pyntrei shitom ïa ki briew jong me kumba me la jop ïa ka kynhun shipai jong ki Midian slem bah mynshuwa.

⁵ Ïa ki juti jong ka kynhun shipai kaba hiarthma bad ïa ki jaiñ baroh kiba khah snam yn pynjot thiaw da ka ding.

⁶ Ïa i khunlung la kha ha ngi! Ïa u khun la ai ha ngi! Bad un long u nongsynshar jong ngi. Yn khot ïa u, “U Nongsyllok Baphylla,” “U Blei Bakhrawbor,” “U Kpa Bymjukut,” “U Syiem ka Jingsuk.”

⁷ Ka bor ba kynja syiem jong u kan nang san; ka hima jong u kan ïailong borabor ha ka jingsuk. Un synshar kum u nongmih bujli ïa u Syiem Dabid, da kaba pynshong nongrim ïa ka bor jong u ha ka hok bad ka jingbishar hok, naduh mynta haduh kaba kut ka por. U Trai Badonbor Baroh u la kut jingmut ban leh ïa kane baroh.

U Trai un pynshitom ïa ka Israel

⁸ U Trai u la pynbna ka jingbishar halor ka hima Judah, halor ki khun ki ksiew jong u Jakob.

⁹ Baroh ki paid Israel, uwei pa uwei baroh uba shong ba sah ha ka nongbah Samaria kin tip ba u la leh ïa kane. Mynta ki sngewsarong bad sngewmeng.

¹⁰ Ki ong, “Ki jingtei maw-it ki la khyllem, hynrei ngin bujli ïa ki da ki jingtei maw. Ïa ki bim da ki dieng Sykomore la khet noh, hynrei ngin bujli ïa ki da ki dieng Kedar kiba kynsai tam.”

¹¹ U Trai u la pynkhih ïa ki nongshun jong ki ban tur ïaleh ïa ki.

¹² Ka Syria ha ka phang mihngi bad ka Philistia ha ka phang sepngi ki la ang la ka shyntur ban bam ïa ka Israel. Pynban la katta ruh ïa ka jingbitar jong U Trai ym shym pynkut; ka kti jong u ka dang kner ban pynshitom.

¹³ Ki paid Israel kim pat shym kylla-kaba-mut; wat haba U Trai Badonbor Baroh u la pynshitom ïa ki, kim pat shym la phai sha u.

¹⁴ Hapoh kawei ka sngi U Trai un pynshitom ïa ki nongïalam jong ka Israel bad ïa ki briew jong ka. Un ot noh ïa ki, ïa ka khlieh bad ïa u tdong.

¹⁵ Ki rangbah kiba tymmen bad kiba donburom ki long ka khlieh — bad u tdong u long ki nongïathuhlypa kiba ki jinghikai jong ki, ki long kiba lamler!

¹⁶ Kito kiba ïalam ïa kine ki briew ki la ïalam bakla ïa ki bad pynshaïong jingmut lut ïa ki.

¹⁷ Bad kumta U Trai un ym shah ba uno uno u samla un lait phet, bad un ym pyn-i ka jingisynei ïano ïano na ki riewkynthei bad ki khunswet, namar baroh ki briew ki long kiba khlem blei bad bymman bad kaei kaei baroh kaba ki ong ka long kaba sniew. Pynban la katta ruh ïa ka jingbitar jong U Trai yn ym pynkut, hynrei ka kti jong u kan dang ïai kner ban pynshitom.

¹⁸ Ka jingbymman jong ki briew ka pluh kum ka ding kaba pynjot thiaw ïa ki bniap shiah bad ki shiah buid. Ka pluh kum ka ding ha khlaw kaba pynmih shajrong ïa ki rishot tdem.

¹⁹ Namar ba U Trai Badonbor Baroh u bitar, ka jingpynshitom jong u ka pluh kum ka ding ha kylleng jong ka ri bad ka pynjot thiaw ïa ki briew, bad dei ma ngi iwei pa iwei ïa lade hi.

²⁰ Hangno hangno hapoh jong ka ri, ki briew ki knieh kynthet bad ki bam ïa kano kano ka jingbam kaba ki lah ban shem, hynrei ïa ka jingthngan jong ki ym lah da lei lei ban pynkdang. Ki da bam ruh wat ïa ki khun jong ki hi!

²¹ Ki briew jong ka Manasseh bad ki briew jong ka Ephraim ki tur ïaleh para ma ki, bad ryngkat lang ki tur ïaleh ïa ka Judah. Pynban la katta ruh, ïa ka jingbitar jong U Trai ym shym pynkut, ka kti jong u ka dang ïai kner ban pynshitom.