ISAÏAH 8 - Khasi CL Bible (BSI)

U Khun jong u Isaïah kum ka dak ïa ki briew

¹ U Trai u ong ha nga, “Shim ka lyngkhot tiar thoh jingthoh kaba heh bad thoh ha ka da ki dak kiba heh: ‘Maher-shalal-hash-bas.’

² Wanlam ar ngut ki rangbah ba lah ban shaniah, u Uriah u lyngdoh bad u Sekharaïah u khun jong u Jeberekhaïah, ban long kum ki sakhi.”

³ Katto katne por hadien, ka tnga jong nga ka la armet. Haba la kha ïa u khun jong ngi, U Trai u ong ha nga, “Jer kyrteng ïa u, ‘u Maher-shalal-hash-bas.’

⁴ Ha shuwa ba u khynnah un heh un san ban ong ‘Mei’ bad ‘Pa’, ïa ka spah baroh jong ka Damaskos bad ïa ka mar lute baroh jong ka Samaria yn kit noh da u patsha ka Assyria.”

U Patsha ka Assyria u wan

⁵ U Trai u la kren pat ha nga.

⁶ U ong, “Namar kine ki briew ki la kyntait ïa ki um bajai jai jong ka wahduid Shiloah bad khynñiuh ha khmat jong u syiem Resin bad u syiem Pekah,

⁷ ma nga, U Trai, ngan wallam ïa u patsha jong ka Assyria bad ïa ki kynhun shipai jong u baroh ban tur ïaleh ïa ka Judah. Kin tur shaphrang kum ki um bashlei jong ka wah Ïuphratis, kiba lyngkien ïa ki rud jong ka baroh.

⁸ Kin sar lyngba ka Judah ha ka jingshlei um, da kaba kiew haduh tyrpeng bad tap lin ïa kaei kaei baroh.” U Blei u long lem bad ngi! Ki thapniang jong u ba la pyiar shabar ki ïada ïa ka ri.

⁹ To ïalumlang ha ka jingsheptieng, phi ki jaitbynriew! To shahshkor, phi ki bynta ba sha jngai jong ka pyrthei. Pynkhreh ban ïaleh, hynrei to sheptieng! Ho-oid to pynkhreh, hynrei to sheptieng!

¹⁰ To thaw ki jingpynkhreh jong phi! Hynrei kin ym urlong. To kren ïa baroh kaba phi kwah! Hynrei baroh ka long ka bymmyntoi, namar U Blei u long lem bad ngi.

U Trai u maham ïa u nongïathuhlypa

¹¹ Da ka bor bakhraw jong u, U Trai u la maham ïa nga ban ym bud ïa ka lynti ba ki briew ki la bud. U ong,

¹² “Wat ïasoh ha ki jingïathmu basniew jong ki briew bad wat sheptieng ïa kiei kiei kiba ki sheptieng.

¹³ To kynmaw ba ma nga, U Trai Badonbor Baroh, nga long uba khuid, nga long uta uba phi dei ban sheptieng.

¹⁴ Namar ka jinglongkhuid baphylla jong nga, nga long kum u maw uba ki briew ki jynthut; nga long kum ka jingriam ka ban kem ïa ki briew jong ka Judah bad Israel bad ïa ki briew jong ka Jerusalem.

¹⁵ Kiba bun kin jynthut; kin kyllon bad kin shah pynlwet. Yn pynngat ïa ki ha ka jingriam.”

Ka jingmaham pyrshah ïa ka ban kylli na kiba ïap

¹⁶ Ma phi, ki nongbud jong nga, phi dei ban sumar bad pynneh ïa ki khubor kiba U Blei u la ai ha nga.

¹⁷ U Trai u la buhrieh ïa lade na ki briew jong u, hynrei nga shaniah ha u bad buh ïa ka jingkyrmen jong nga ha u.

¹⁸ Nga don hangne bad ki khun kiba U Blei u la ai ha nga. U Trai Badonbor Baroh, uba ka khet jong u ka long halor u Lum Seïon, u la phah ïa ngi kum ki khubor ba-im sha ki paid Israel.

¹⁹ Hynrei ki briew kin ong ïa me ban kylli ïa ki khubor na ki nongbatai kupar bad ki nongkren byrtong kiba kren jam bad kiba kren mian mian. Kin ong, “Nalor baroh, ki briew ki dei ban kylli ïa ki khubor na ki mynsiem bad kylli na kiba ïap na ka bynta kiba im.”

²⁰ Me dei ban jubab ïa ki, “To shahshkor ïa kaei kaba U Trai u hikai ïa phi! Wat shahshkor ïa ki nongkren byrtong — kaei kaba ki ong ïa phi kan ym weng ïa ka jingjynjar.”

Ka por jong ka jingjynjar

²¹ Ki briew kin ïaid sakma lyngba ka ri, kiba la noh mynsiem bad thngan. Ha ka jingthngan bad jingbitar jong ki, kin tim ïa u syiem jong ki bad ïa U Blei jong ki. Ki lah ban khmih sha ka sahit bneng

²² lane peit shlip ha ka khyndew, pynban kin ym ïohi ei ei hynrei ka jingjynjar bad ka jingdum, ka jingdum kaba pyntriem sha kaba la beh ïa ki.