ISAÏAH 7 - Khasi CL Bible (BSI)

Ka khubor ïa u syiem Ahas

¹ Haba u Syiem Ahas, u khun jong u Jotham bad u ksiew jong u Ussaïah, u synshar ïa ka Judah, la khie ka thma. U Resin, u syiem ka Syria, bad u Pekah u khun jong u Remalaïah, u syiem ka Israel, ki tur ïaleh ïa ka Jerusalem, hynrei kim shym lah ban kurup ïa ka.

² Haba ka ktien ka la poi ha u syiem ka Judah ba ki kynhun shipai ka Syria ki la da don hapoh ka ri Israel, ma u bad ki briew jong u baroh ki la sngewshyrkhei shikatdei ha kaba ki la khynñiuh kum ki dieng ba la pynkhih da ka lyer.

³ U Trai u ong ha u Isaïah, “To shim ïa u Shear Jashub u khun jong me, bad khie leit ban ïakynduh ïa u Syiem Ahas. Men shem ïa u ha ka lynti ha kaba ki nongthain jaiñ ki treikam, ha kaba kut ka nala kaba wallam um na ka pung kaba haneng.

⁴ Ong ïa u ban da husiar, ban long jai jai, bad ban ym sheptieng lane khih jingmut. Ka jingbitar u Syiem Resin bad ki Syria jong u bad ka jong u Syiem Pekah kam long shuh kaba don jingma ban ïa ka tdem jong ki ar tylli ki shynraiñ dieng kiba don ding.

⁵ Ka Syria, lem bad ka Israel bad u syiem jong ka, ki la pynlong ka jingïasylla.

⁶ Ki la thmu ban hiarthma ïa ka Judah, ban pyntieng ïa ki briew ban ïasoh ha ka liang jong ki, bad nangta ban buh ïa u khun jong u Tabeel halor ka khet.

⁷ “Hynrei nga, U Trai, nga pynbna ba kane kan ym jia da lei lei.

⁸ Balei? Namar ba ka Syria kam long kaba kham khlaiñ ban ïa ka Damaskos, ka nongbah jong ka, bad ka Damaskos kam long kaba kham khlaiñ ban ïa u Syiem Resin. Katba ïa ka Israel, hapoh ki hynriewphew san snem yn sa pynkhynñiuh ïa ka ruh ban lait im kum ka jaitbynriew.

⁹ Ka Israel kam long kaba kham khlaiñ ban ïa ka Samaria, ka nongbah jong ka, bad ka Samaria kam long kaba kham khlaiñ ban ïa u Syiem Pekah. “Lada ka jingngeit jong phi kam long kaba ïaineh, phin ym ïaineh.”

Ka dak jong u Immanuel

¹⁰ U Trai u phah sa kawei pat ka khubor sha u Ahas:

¹¹ “To pan na U Trai U Blei jong me ban ai ka dak ha me. Ka lah ban long na kaba jylliew ha ka pyrthei kiba ïap lane nang tei najrong eh jong ka bneng.”

¹² U Ahas u jubab, “Ngan ym pan ïa ka dak. Nga kyntait ban tynjuh ïa U Trai.”

¹³ U Isaïah u jubab ïa kata, “To shahshkor, mynta, ko ki khun ki ksiew jong u Syiem Dabid. Ka long kaba sniew eh ïa phi ban pynthait ïa ka jingïaishah jong ki briew — hato phi donkam ruh ban pynthait ïa ka jingïaishah ka jong U Blei?

¹⁴ Te kumta, U Trai un ai hi ka dak ha phi: Ka theisotti kaba punkhun kan kha u khun bad kan khot kyrteng ïa u, ‘U Immanuel.’

¹⁵ Ha ka por ba u la rangbah bha ban pynlong ïa la ki jingkut jingmut, ki briew kin dih dud bad bam ngap.

¹⁶ Wat ha shuwa ba kata ka por kan wan, ïa ki ri jong kito ki ar ngut ki syiem kiba la pynshyrkhei ïa phi yn iehnoh.

¹⁷ “U Trai un wallam halor jong phi, halor ki briew jong phi, bad halor ka longïing syiem baroh kawei, ïa ki sngi jingjynjar kiba kham sniew ban ïa kano kano kaba lah wan naduh ba ka hima Israel ka la khlad na ka Judah — un wallam ïa u syiem ka Assyria.

¹⁸ “Haba kata ka por ka wan, U Trai un siaw kum ka dak ïa ki Ijipt ban wan kum ki skain na ki shnat kiba jngai eh jong ka wah Nile, bad ïa ki Assyria ban wan kum ki ngap na ka ri jong ki.

¹⁹ Kin ïaboi ha ki them khohruh khohram bad ha ki krem ha ki mawsiang, bad kin tap ïa kawei pa kawei ka bniap shiah bad ïa kawei pa kawei ka jaka pynbamphlang.

²⁰ “Haba kata ka por ka poi, U Trai un wai uwei u nongkhap shñiuh na sha shiliang ka wah Ïuphratis — u patsha jong ka Assyria! — bad un khi ïa ki tmain jong phi bad ïa ki shñiuh halor ki khlieh bad ki met jong phi.

²¹ “Haba kata ka por ka wan, wat lada u nongrep u lah ban pynsah im tang iwei i khun masi bad ar tylli ki blang,

²² kin ai shibun ka dud kaba un dih kat kaba u donkam baroh. Ho-oid, khyndiat ngut kiba lait im kiba la iehnoh ha ka ri kin don ka dud bad ka ngap ban bam.

²³ “Haba kata ka por ka wan, ki bri sohwaiñ babha, kawei kawei ka don shihajar tylli ki dieng sohwaiñ bad kawei kawei ka shongdor shihajar tylli ki sbai rupa, kin shlei da ki bniap shiah bad ki shynraiñ.

²⁴ Ki briew kin behmrad hangta da ki ryntieh bad ki khnam. Ho-oid, ka ri baroh kawei kan dap da ki shynraiñ bad ki bniap shiah.

²⁵ Baroh ki lumrit ha kaba shisien la thung ïa ki mar rep kin jyllei shikatdei da ki shiah ba yn ym don mano mano ba leit hangta. Kan long ka jaka ha kaba ki masi bad ki langbrot ki bam phlang.”