ISAÏAH 66 - Khasi CL Bible (BSI)

U Trai u bishar ïa ki jaitbynriew

¹ U Trai u ong, “Ka bneng ka long ka khet jong nga bad ka khyndew ka long ka jingïuhkjat jong nga. Kaba kumno keiñ ka ïing men tei ïa nga, bad kaba kumno ka jaka ba ngan shong?

² Ma nga hi nga la thaw ïa ka pyrthei baroh kawei! Nga shem sngewbha bad kito kiba sngewrit bad kiba kylla-kaba-mut, kiba sheptieng ïa nga bad kiba kohnguh ïa nga.

³ “Ki briew ki leh katba ki sngewbha. Baroh ka long kajuh ïa ki, la ki pynïap ïa u masi kyrtong kum ka jingkñia lane jingkñia da u briew; la ki kñia da u khunlangbrot lane ki pyndkut ïa ka ryndang u ksew; la ki wanrah ka jingainguh kew ne ki ainguh da ka snam sniang; la ki thang jingiwbih ne ki duwai ha ka bleithaw. Ki shem sngewbha ha ki rukom ba-ijli ha ka jingmane.

⁴ Kumta ngan wallam jingjot halor jong ki — Ïa kita kiei kiei kiba ki sheptieng — namar ym don uwei ruh uba jubab haba nga khot lane shahshkor haba nga kren. Ki jied ban ïaleh pyrshah ïa nga bad leh ïa kaba sniew.”

⁵ To sngap ïa kaei kaba U Trai u kren, phi kiba sheptieng bad kohnguh ïa u: “Namar phi long kiba ïaineh ha nga, katto katne na ki briew jong phi hi ki shun ïa phi bad kin ym don ïadon bynta ei ei bad phi. Ki rkhiebeiñ ïa phi bad ong, ‘Ai ba U Trai un pyn-i ïa ka jingkhraw jong u bad pynim ïa phi, kumta ba ngin ïohi ïa phi ba phi shadkmen.’ Hynrei dei ma ki hi, ki ban jahburom!

⁶ Ha sngap! kata ka jingsawa kaba jam ha ka nongbah! kata ka jingsawa ha ka Templ, ka long ka jingsawa U Trai uba pynshitom ïa ki nongshun jong u!

⁷ “Ka nongbah bakhuid jong nga ka long kum ka briew kaba kha kynsan ïa i khun, khlem da suh kha.

⁸ Hato don mano mano ba ju ïohi ne ïohsngew ïa kaba kum kata? Uei uba la ïohi ïa kaba kum kata? Lah mo ban kha ïa ka hima tang ha ka shi sngi? Ka Seïon kam donkam ban shahshitom slem, shuwa ba yn kha ïa ka hima.

⁹ Wat pyrkhat ba ngan wallam ïa ki briew jong nga sha ka jingsuh kha bad khlem lah ban kha ïa ki.” U Trai u la kren.

¹⁰ To shadkmen bad ka Jerusalem; to lehkmen na ka bynta jong ka, phi baroh kiba ieit ïa kane ka nongbah! To shadkmen bad ka, mynta phi baroh kiba la ïam pangnud na ka bynta jong ka!

¹¹ Phin ïoh leh sngewbha ha ka jingdap kyrhai jong ka, kum i khunlung ha ka shadem ka kmie jong i.

¹² U Trai u ong, “Ngan wallam ha phi ïa ka jingdap kyrhai baneh; ka spah jong ki jaitbynriew kan tuid sha phi kum ka wah, ka bym ju rngad. Phin long kum i khunlung iba la sumar da la ka kmie, ba la rah ha ki ksang'ti jong ka, bad sumar da ka jingieit.

¹³ Ngan pyntngen ïa phi ha Jerusalem, kumba ka kmie ka pyntngen ïa la i khun.

¹⁴ Haba phi ïohi ïa kane ba ka jia, phin sa shadkmen; kan pynlong ïa phi ban long khlaiñ bad khiah krat. Te phin sa tip ba ma nga, U Trai, nga ïarap ïa kito kiba kohnguh ïa nga, bad nga pyn-i ïa la ka jingbitar pyrshah ïa ki nongshun jong nga.”

¹⁵ U Trai un wan bad ka ding. Un shong ha ki thapniang jong ka 'erïong, ban pynshitom ïa kito kiba u la bitar.

¹⁶ Da ka ding bad ka waitlam un pynshitom ïa ki briew baroh jong ka pyrthei kiba u shem ba la pynrem — bad shibun kin shah pynïap.

¹⁷ U Trai u ong, “Kaba kut ka la jan ïa kito kiba pynkhuid ïa lade na ka jingmane ba-thala, kiba ïaid paidbah ha ka kynhun sha ki kper bakyntang, bad kito kiba bam ïa ka doh sniang, bad ïa ka doh khnai bad kiwei pat ki jingbam ba-ijli.

¹⁸ Nga tip ïa ki jingpyrkhat bad ki kam jong ki, ngan wan ban lumlang ïa ki briew jong ki hima baroh. Haba kin ïawanlang, kin sa ïohi kaei ba ka bor jong nga ka lah ban leh bad kin sa tip ba nga dei uta uba pynshitom ïa ki.

¹⁹ “Hynrei ngan pynsah katto katne na ki bad phah ïa ki sha ki jaitbynriew bad sha ki ri kiba jngai ki bym pat shym la ïohsngew ïa ka nam jong nga lymne ïohi ïa ka jingkhraw bad ka bor jong nga: sha Spain, sha Libya bad sha Lydia, ryngkat bad ki nongrah ryntieh kiba tbit, bad sha Tubal bad sha Gris. Hapdeng kine ki jaitbynriew kin pynbna ïa ka jingkhrawbor jong nga.

²⁰ Kin wallam pat ïa baroh ki para kur ki para jait jong phi na ki jaitbynriew baroh kum ka jingai sngewbha ïa nga. Kin wallam ïa ki sha u lum bakyntang jong nga ha Jerusalem ha ki kulai, ki khashor bad ha ki ut, bad ha ki kali ïapom bad ki kali kit jingkit, kumba ki Israel ki wanrah ïa ki jingainguh bam sha ka Templ ha ki khiew lehniam kiba khuid.

²¹ Ngan pynlong katto katne na ki, ki lyngdoh bad ki Lebi.

²² “Kumba ka khyndew bathymmai bad ki bneng kiba thymmai, kin ïaisah da ka bor jong nga, kumta ruh ki khun ki ksiew jong phi bad ka kyrteng jong phi kin ïaisah.

²³ Ha man kawei pa kawei ka Jingkhawai Niam Bnai Thymmai, bad ha man kawei pa kawei ka Sabbaton, ki jaitbynriew na ki hima baroh kin wan ban mane ïa nga hangne ha Jerusalem,” ong U Trai.

²⁴ “Katba ki dang leit phai noh kin ïohi ïa ki metïap jong kito kiba ïaleh pyrshah ïa nga. Ki ksaiñ kiba bam ïa ki kin ym ïap shuh, bad ka ding kaba thang ïa ki kan ym lip noh. Ka jingïohi ïa ki kan long kaba isaitmet ïa u bynriew baroh.”