ISAÏAH 65 - Khasi CL Bible (BSI)

Ka jingpynshitom U Blei ïa kiba ïaleh pyrshah

¹ U Trai u ong, “Nga la kloi ban jubab ïa ki jingduwai ki briew jong nga, hynrei kim shym la duwai. Nga la ap ïa ki ban shem ïa nga, hynrei kim shym la pyrshang. Ka jaitbynriew kam shym la khot kyrpad ïa nga, wat lada nga long la kloi ban jubab, ‘Hangne nga don; ngan ïarap ïa phi.’

² Nga long uba la kloi borabor ban pdiang sngewbha ïa ki briew jong nga, kiba long mutlop ban ïai leh ïa ka bymdei bad ïaid ha la ka jong ka lynti,

³ Kim lehrain satia ban ïai pynbitar ïa nga. Ki ai jingkñia sha ki blei thala ha ki kper bakyntang bad thang jingiwbih ha ki duwan ba-thala.

⁴ Ha ka por mynmiet ki leit sha ki krem bad sha ki jaka tep ban ïasyllok bad ki mynsiem jong kiba ïap. Ki bam doh sniang bad ki dih ïa ka syrwa ba la shet da ka doh ba la ai jingkñia sha ki blei thala.

⁵ Bad nangta ki ong ïa kiwei pat, ‘To ïeng jngai na ngi, naba ngi long kiba khuid shaba palat ym bit ban ktah ïa ngi!’ Ngam lah ban shah ïa ki briew kiba kum kita — ka jingbitar jong nga pyrshah ïa ki ka long kum ka ding ka bym ju lip shuh.

⁶ “Nga la kut jingmut lypa ban pynshitom ïa ki, bad ïa ka jingpynshitom ïa ki la dep buh jingthoh. Ngan ym leh bym ïohi ïa kaei kaba ki la leh, hynrei ngan siew kylliang ïa ki

⁷ na ka bynta ki pop jong ki bad ki pop jong ki kpa tymmen jong ki. Ki la thang ki jingiwbih ha ki duwan thala kiba halor ki lum bad ki la kren sniew ïa nga. Kumta ngan pynshitom ïa ki kumba ka dei hok ïa ki namar ki kam ba ki la leh mynshuwa.”

⁸ U Trai u ong, “Ym ju don ba pynjot ïa ki sohwaiñ kiba bha; pynban, ki shna waiñ na ki. Lymne ngan ym pynjot ruh ïa ki briew jong nga baroh — ngan ïada ïa kito kiba shakri ïa nga.

⁹ Ngan kyrkhu ïa ki khun Israel kiba dei na ka jait Judah, bad ki khun ki ksiew jong ki kin ïohkynti ïa ka ri jong nga kaba ha ki lumbah. Ki briew ba la jied jong nga, kiba shakri ïa nga, kin shong hangta.

¹⁰ Kin mane ïa nga bad ïalam ïa ki langbrot bad ki jingri jong ki sha ki jaka phlang ha ka Pyntha ka Sharon ha ka phang sepngi bad ha ka Them ka Jingshitom ha ka phang mihngi.

¹¹ “Hynrei kan long pher ïa phi kiba la kyntait ïa nga, kiba lyndet ïa ka Seïon, u lum bakyntang jong nga, bad mane ïa u Gad bad u Meni, ki blei ka nusip bad ka kupar.

¹² Kan dei ka kupar jong phi ban ïap ka jingïap bashyrkhei, namar phim shym la jubab haba nga khot ïa phi lane shahshkor haba nga kren. Phi jied ban ïaleh pyrshah ïa nga bad leh ïa kaba sniew.

¹³ Bad kumta ngan ïathuh ïa phi ba kito kiba mane bad kohnguh ïa nga kin ïoh kyrhai ban bam ban dih, hynrei phi phin thngan bad phin sliang. Ma ki kin shadkmen hynrei ma phi phin jahburom.

¹⁴ Kin rwai da kaba kmen, hynrei phi phin ïam ha ka jingpait dohnud.

¹⁵ Ki briew ba la jied jong nga kin pyndonkam ïa ka kyrteng jong phi kum ka jingtim. Ma nga, U Trai nongsynshar ngan pynïap ïa phi. Hynrei ngan ai ka kyrteng bathymmai ha kito kiba kohnguh ïa nga.

¹⁶ Te uno uno uba ha ka ri uba pan ïa ka jingkyrkhu, un pan ban ïoh jingkyrkhu na U Blei uba ïaineh. Uno uno uba shim smai un smai ha ka kyrteng U Blei uba ïaineh; Ki jingjynjar kiba mynshuwa kin leit noh bad yn klet noh.”

Ka jingthaw kaba thymmai

¹⁷ U Trai u ong, “Ngan thaw ïa ka khyndew bathymmai bad ïa ki bneng bathymmai. Kiei kiei kiba jia long mynshuwa yn ym kynmaw shuh.

¹⁸ To kmen bad to shadkmen junom ha kaei kaba nga thaw. Ka Jerusalem bathymmai kaba nga pynlong kan dap da ka jingkmen, bad ki briew jong ka kin shem sngewbha.

¹⁹ Ïa nga ruh yn pyndap da ka jingkmen namar ka Jerusalem bad ki briew jong ka. Hangta yn ym don shuh ka jingïam, yn ym don shuh ki ban khot kyrpad ban ïoh jingïarap.

²⁰ Ki khunlung kin ym ïap shuh haba ki dang khunlung, bad baroh ki briew kin im haduh ba ki la pura bha ka rta. Kito kiba im kumba shispah snem yn ñiew ïa ki ba ki dang samla. Ban ïap shuwa ïa kata pat kan dei ka dak ba nga la pynshitom ïa ki.

²¹ Ki briew kin tei ïa ki ïing ki sem bad kin shong hi ha ki — yn ym pyndonkam ïa ki da kiwei pat. Kin thung ki dieng sohwaiñ bad leh sngewbha ha ka waiñ — yn ym dih ïa ka da kiwei pat.

²² Kum ki dieng, ki briew jong nga kin im slem. Kin ïoh ban lehkmen pura ha kiei kiei kiba ki la trei shitom.

²³ Ki jingtrei ba kin trei kin manbha, bad ki khun jong ki kin ym mad ïa ka jingjynjar. Ngan kyrkhu ïa ki bad ïa ki khun ki ksiew jong ki ha ki por ki ban wan baroh.

²⁴ Wat ha shuwa ba kin dep duwai ha nga, ngan jubab ïa ki jingduwai jong ki.

²⁵ Ki suri bad ki khunlangbrot kin ïabam lang, ki sing kin bam phlang, kumba bam ki masi, bad ki bseiñ kin ym long shuh ka jingma. Ha Seïon, u lum bakyntang jong nga yn ym don shuh ka jingma ne kaba sniew.”