ISAÏAH 64 - Khasi CL Bible (BSI)

¹ Balei ba mem kad arliang ïa ka sahit bneng bad wan hiar? Ki lumbah kin ïohi ïa me bad khynñiuh da ka jingsheptieng.

² Kin khynñiuh kum ka um ba dang shet halor ka ding kaba khluit. Ale bad pynpaw ïa ka bor jong me ha ki nongshun jong me, bad pynlong ïa ki jaitbynriew ban khynñiuh ha khmat jong me!

³ Ka la don ka por mynba me wan bad leh ïa kiei kiei kiba shyrkhei kiba ngim shym khmih lynti; ki lumbah ki ïohi ïa me bad ki khynñiuh da ka jingsheptieng.

⁴ Ym pat ju don ba ïohi lane ïohsngew ïa U Blei uba kum ma me, uba leh ïa kiba kum kita ki kam na ka bynta kito kiba ap kyrmen ha u.

⁵ Me pdiang sngewbha ïa kito kiba shem jingkmen ha kaba leh ïa kaei kaba dei, ïa kito kiba kynmaw kumno me kwah ïa ki ban im. Me la bitar ïa ngi, hynrei ngi dang ïai leh pop; wat la me la bitar shla ngi dang ïai leh ïa kaba sniew naduh mynbarim.

⁶ Baroh na ngi, ngi long kiba pop; wat ki kam babha tam jong ngi ki long ki bymkhuid shi lynter. Namar ki pop jong ngi, ngi long kum ki sla ba la tlor bad ba la rong noh da ka lyer.

⁷ Ym don uwei ruh uba phai sha me ha ka jingduwai; ym don uwei ruh uba leit sha me ban ïoh jingïarap. Me la buhrieh ïa lade na ngi bad iehnoh ïa ngi namar ki pop jong ngi.

⁸ Hynrei, A Trai, me long u Kpa jong ngi. Ngi long kum ka dewbyrtha, bad me long kum u nongthaw khiew.

⁹ Me la thaw ïa ngi, kumta wat bitar eh ïa ngi, lane bat ïa ki pop jong ngi pyrshah ïa ngi junom. Ngi long ki briew jong me; to isynei ïa ngi.

¹⁰ Ki nongbah bakyntang jong me ki long kum ka ri shyiap; ka Jerusalem ka long ka jaka kynjah ba la pynjot,

¹¹ bad ïa ka Templ jong ngi, ka jaka kyntang bad ba-itynnat ha kaba ki kpa tymmen jong ngi ki la ïaroh ïa me, la pynjot noh da ka ding. Baroh ki jaka kiba ngi ieit ki la don ha ka jingjot.

¹² A Trai, hato yn ym pynkhih ïa me da kane baroh? Hato men ym leh ei ei bad shah ba ngin shah jynjar palat ïa kaba ngi lah ban shah?