ISAÏAH 63 - Khasi CL Bible (BSI)

Ka jingjop U Trai halor ki jaitbynriew

¹ “Uei une uba wan na ka nongbah Bosrah ha Edom? Uei une uba riam itynnat ha ki jaiñkup rong saw u da ïaid ryngkat ha ka bor bad jingkhlaiñ?” “U dei U Trai, uba donbor ban pyllait im, u wan ban pynbna ïa ka jingjop jong u.”

² “Balei ka jaiñkup jong u ka saw palat, kum ka jong u briew uba ïuh ïa ki sohwaiñ ban shna waiñ?”

³ U Trai u jubab, “Nga la ïuh ïa ki jaitbynriew kum ki sohwaiñ, bad ym don uwei ruh u ba la wan ban ïarap ïa nga. Nga la ïuh ïa ki ha ka jingbitar, bad ka snam jong ki ka la bit lut ha ki jaiñphong jong nga.

⁴ Nga la kut jingmut ba ka por ban pynim ïa ki briew jong nga ka la wan; ka la dei ka por ban pynshitom ïa ki nongshun jong ki.

⁵ Nga la lyngngoh haba nga khmih bad peit ba ym don uwei ruh u ban ïarap ïa nga. Hynrei ka jingbitar jong nga ka pynkhlaiñ ïa nga, bad nga ïoh ïa ka jingjop ïa lade hi.

⁶ Ha ka jingbitar jong nga, nga ïuhroit ïa ki jaitbynriew baroh bad nga lynthaw ïa ki. Nga la theh ïa ka snam jong ki ha madan.”

Ka jinglehbha U Trai ïa ki Israel

⁷ Ngan ïathuh ïa ka jingieit baïaineh jong U Trai; ngan ïaroh ïa u ïa baroh kaba u la leh na ka bynta jong ngi. U la kyrkhu kyrhai ïa ki paid Israel namar ka jingisynei bad ka jingieit baneh jong u.

⁸ U Trai u ong, “Ki long ki briew jong nga kin ym shukor ïa nga.” Bad kumta u la pyllait im ïa ki na ki jingjynjar jong ki baroh.

⁹ Ym dei u angel, hynrei dei U Trai hi uba pyllait im ïa ki. Ha ka jingieit bad ka jingisynei jong u, u la pyllait ïa ki. U la ju sumar ïa ki borabor ha ki por kiba mynshuwa,

¹⁰ hynrei ki la ïaleh pyrshah ïa u bad ki la pynsngewsih ïa U Mynsiem Bakhuid jong u. Namar kata U Trai u la kylla long u nongshun jong ki bad u la ïaleh pyrshah ïa ki.

¹¹ Hynrei nangta ki kynmaw ïa ki por kiba mynshuwa, ïa ki sngi u Moses, u shakri U Trai bad ki kylli, “Hangno mynta u don U Trai, uba pyllait im ïa ki nongïalam jong ki briew jong u na ka duriaw? Hangno u don U Trai, uba la ai ïa U Mynsiem jong u ha u Moses?

^12-13 Hangno u don U Trai, uba da ka bor jong u, u la leh ki kam bakhraw lyngba u Moses, u da kad arliang ïa ki um ka duriaw bad ïalam ïa ki briew jong u lyngba ki um kiba jylliew, ban ïoh ïa ka nam baneh junom na ka bynta ïa lade?” Ha ka jingïalam U Trai, ki kjat jong ki, ki long skhem kum ki kulai khlaw, bad kim ju jynthut.

¹⁴ Kumba ïalam ïa ki jingri sha ka them baseisoh, kumta U Trai u ai ka jingjahthait ha ki briew jong u. U ïalam ïa ki briew jong u bad pyndonburom ïa la ka kyrteng.

Ka jingduwai ban ïoh ïa ka jinglehisynei bad ka jingïarap

¹⁵ A Trai, to khmih ïa ngi na bneng, ha kaba me shong ha ka jingkhuid bad ka burom jong me. Hangno kata ka jingsngewkhia bakhraw jong me ïa ngi? Hangno kata ka bor jong me? Hangno kata ka jingieit bad ka jingsngewlem jong me? Wat leh bymsuidñiew ïa ngi.

¹⁶ Me long u kpa jong ngi. U Abraham bad u Jakob, ki kpa tymmen jong ngi, kim pdiang ïa ngi, hynrei ma me, ko Trai, me long u kpa jong ngi, uta uba pyllait im ïa ngi borabor.

¹⁷ Balei me shah ba ngin sakma na ki lynti jong me? Balei ba me pynlong mutlop ïa ngi ba ngin phai lyndet na me? To wan phai noh, na ka bynta kito kiba shakri ïa me, na ka bynta u paidlang uba la ju long u jong me.

¹⁸ Ïa ngi, u paidlang uba khuid jong me, la beh noh shabar da ki nongshun jong ngi katto katne por: ki la ïuhroit ïa ka jaka kyntang jong me.

¹⁹ Me ñiew ïa ngi kumba mem ju long u nongsynshar jong ngi, kumba ngim pat la ju long ki briew jong me.