ISAÏAH 62 - Khasi CL Bible (BSI)

¹ Ngan kren jam ban pynshlur ïa ka Jerusalem; ngan ym sngap jar haduh ba yn pynim ïa ka, bad ka jingjop jong ka kan tyngshaiñ kum ka jingshai ha ka por mynmiet.

² Ko Jerusalem, ki jaitbynriew kin ïohi ba pha ïoh ka jingjop! bad ki syiem jong ki baroh kin ïohi ïa ka burom jong pha. Yn khot ïa pha da ka kyrteng kaba thymmai, ka kyrteng ba U Trai hi u ai.

³ Phan long kum ka pansngiat kaba itynnat ïa U Trai.

⁴ Yn ym khot shuh ïa pha, “Kaba la shah iehnoh,” ne ïa ka ri jong pha yn khot, “Ka tnga ba la shah iehnoh.” Ka kyrteng bathymmai jong pha kan long “U Blei u sngewbha ïa ka.” Ïa ka ri jong pha yn khot, “Ka jingshongkurim kaba suk,” naba U Trai u sngewbha eh ïa pha, bad un long kum u tnga ïa ka ri jong pha.

⁵ Kum u samla uba shim ïa ka theisotti kum ka nongleitkurim jong u, uta uba pynlong ïa pha un shongkurim ïa pha, kumba u nongleitkurim u shem sngewbha bad ka nongleitkurim jong u, kumta U Blei jong pha un shem sngewbha ïa pha.

⁶ Ha ki kynroh jong pha, ko Jerusalem, nga la buh ïa ki nongap phira; mynsngi ne mynmiet kin ym sngap jar. Kin pynkynmaw ïa U Trai ïa ki kular jong u, bad kin ym shah ba un klet ïa ki.

⁷ Kim dei ban ai shongthait ïa u tad ynda u dep tei pat ïa ka Jerusalem, bad pynlong ïa ka, ka nongbah ha kaba ka pyrthei baroh kawei ka ïaroh.

⁸ U Trai u la pynlong ka jingkular bakyntang bad da ka bor jong u, un pynlongkam ïa ka: “U kew jong pha un ym long shuh ka jingbam ïa ki nongshun jong pha, bad ki nongwei kin ym ïoh shuh ban dih ïa ka waiñ jong pha.

⁹ Hynrei phi kiba bet bad ot ïa u kew, phin bam ïa u kpu bad ïaroh ïa U Trai, bad phi kiba sumar bad lum ïa ki sohwaiñ phin dih ïa ka waiñ ha ki phyllaw ka Templ jong nga.”

¹⁰ Ko ki paid ka Jerusalem, leit shabar ka nongbah bad shna ka lynti na ka bynta u paidlang u ban wan phai! Pynkhreh ïa ka lynti bah; da pynkhuid ïa ki maw kiba don ha ka! To sieh ïa ka lama, khnang ba ki jaitbynriew kin tip.

¹¹ Ba U Trai u la pynbna shaduh ka pyrthei baroh: “To ong ha ki paid ka Jerusalem ba U Trai un wan ban ïada ïa phi un wallam bad u ïa ki briew kiba u la pyllait im.”

¹² Yn khot ïa phi, “Ki Briew ki bakhuid jong U Blei,” “Ki briew kiba U Trai u la pyllait im;” Ïa ka Jerusalem yn khot “Ka nongbah kaba U Blei u ieit.” “Ka nongbah kaba U Blei um shym la iehnoh.”