ISAÏAH 61 - Khasi CL Bible (BSI)

Ka khubor babha ka jingpyllait im

¹ U Trai Nongsynshar u la pyndap ïa nga da U Mynsiem jong u. U la jied ïa nga bad phah ïa nga ban wallam ïa ka khubor babha sha kiba duk, ban pynkhiah ïa kiba la pait dohnud, ban pynbna ka jingpyllait ïa ki mraw bad ka jinglaitluid ïa kito kiba ha ka byndi.

² U la phah ïa nga ban pynbna ba ka por ka wan haba U Trai un pynim ïa ki briew jong u bad jop ïa ki nongshun jong ki. U la phah ïa nga ban pyntngen ïa baroh kiba sngewsih,

³ ban ai ha kito kiba ïam sngewsih ha Seïon ïa ka jingkmen bad jingsngewbha ha ka jaka ka jingsngewsih, ka jingrwai jong ka jingïaroh ha ka jaka ki ummat kthang. Kin long kum ki dieng ba U Trai da lade hi u la thung. Baroh kin leh ïa kaei kaba dei. Bad ïa U Blei yn ai ka jingïaroh ïa kaei ba u la leh.

⁴ Kin tei pat ïa ki nongbah ba la jot la pra.

⁵ Ko ki briew jong nga, ki nongwei kin shakri ïa phi, Kin sumar ïa ki jingri jong phi kin lur ïa ki lyngkha jong phi, bad sumar ïa ki bri sohwaiñ jong phi,

⁶ bad ïa phi yn khot ki lyngdoh U Trai, ki shakri jong U Blei jong ngi. Phin sa lehkmen ïa ka spah ki jaitbynriew, bad phin sa sngewsarong ba ka dei ki jong phi.

⁷ Ki jinglehrain bad jingjahburom jong phi kin kut noh. Phin sa shong ha la ka jong ka ri, bad ka spah jong phi kan roi ar shah; ka jingkmen jong phi kan neh bymjukut.

⁸ U Trai u ong, “Nga ieit ïa ka jingbishar hok bad nga isih ïa ka jingbanbeiñ bad ka jingleh runar. Da shisha ngan sa ai bainong ïa ki briew jong nga bad ngan pynlong ka jutang kaba neh junom bad ki.

⁹ Kin long kiba pawnam hapdeng ki jaitbynriew, uwei pa uwei uba ïohi ïa ki un tip ba ki long ki briew ïa kiba nga la kyrkhu.”

¹⁰ Ko Jerusalem to shadkmen namar kaei kaba U Trai u la leh. Ka long kum ka nongleitkurim kaba riam na ka bynta ka jingkyntiew kurim jong ka. U Blei u la pynkup ïa ka da ka jingpynim bad ka jingjop.

¹¹ Shisha kumba u symbai u khie lung bad u san, U Trai Nongsynshar un ïada ïa ki briew jong u, bad ki jaitbynriew baroh kin ïaroh ïa u.