ISAÏAH 60 - Khasi CL Bible (BSI)

Ka burom ka ban sa wan ha Jerusalem

¹ To khie joit, ko Jerusalem bad tyngshaiñ kum ka sngi; ka burom ka jong U Trai ka tyngshaiñ ha phi!

² Ïa kiwei pat ki ri yn tap da ka jingdum, hynrei ha phi ka jingshai U Trai ka tyngshaiñ; ka jingphyrnai ka jingdon ryngkat jong u kan long bad phi.

³ Ki jaitbynriew kin wan bud ïa ka jingshai jong pha, bad ki syiem sha ka jingshai jong ka step phyrngab jong pha.

⁴ Khmih sawdong jong pha bad peit kaei kaba jia: Ki briew jong pha kin ïalumlang ban wan phai sha ïing; ki khun shynrang jong pha kin wan na sha jngai bah, bad ïa ki khun kynthei jong pha yn shu rah kum ïa ki khunlung.

⁵ Phin sa ïohi ïa kane bad yn pyndap da ka jingkmen. Phin khynñiuh da ka jingsngewkmen. Ki spah jong ki jaitbynriew yn wallam sha pha; na shiliang ka duriaw ki spah jong ki kin wan.

⁶ Ki kynhun bah ki ut kin wan, na Midian bad na Ephah. Kin wan na Sheba, kin wanrah ïa ka ksiar bad ka jingiwbih. Ki briew kin ïathuh ïa ka khubor kaba bha ïa kaei kaba U Trai u la leh!

⁷ Ïa baroh ki kynhun langbrot jong ka Kedar bad Nebaïoth yn wallam sha pha kum ka jingkñia bad ainguh ha ka duwan ban pynsngewbha ïa U Trai. U Trai un pyndonburom ïa ka templ jong u ban ïa kaba ka ju long.

⁸ Kiei kine ki liengbah kiba per kum u lyoh, kum ki paro ki wan phai sha la ki sem?

⁹ Ki dei ki liengbah kiba wan na ki ri kiba jngai, ki wallam ïa ki paidlang U Blei sha la ïing. Ki wanrah ryngkat bad ki ïa ka rupa bad ka ksiar, ban pyndonburom ïa ka kyrteng U Trai U Blei Bakhuid ka Israel, uba pynlong ïa ki jaitbynriew baroh ban pyndonburom ïa ki briew jong u.

¹⁰ U Trai u ong ïa ka Jerusalem, “Ki nongwei kin tei pat ïa ki kynroh jong pha, bad ki syiem jong ki kin shakri ïa pha. Ha ka jingbitar jong nga, nga la pynshitom ïa pha, hynrei mynta ngan pyn-i ïa ka jingieit bad jingisynei jong nga ïa pha.

¹¹ Bad sngi bad miet ki khyrdop jong pha kin plie, kumta ba ki syiem jong ki jaitbynriew kin wanrah sha pha ïa ka spah jong ki.

¹² Hynrei ïa ki hima ki bym shakri ïa pha yn pynjot thiaw.

¹³ “Ïa ki dieng jong u dieng Kseh, u dieng Kseh-Juniper, bad u dieng Kseh-Sypress, ki dieng kiba kynsai tam jong ka khlaw Lebanon yn wallam ban tei biang ïa pha, ko Jerusalem, ban pynitynnat ïa ka Templ jong nga, ban pyndonburom ïa ka nongbah jong nga.

¹⁴ Ki khun shynrang jong kito kiba la banbeiñ ïa pha kin sa wan ban dem khrup ban burom ïa pha. Baroh kito kiba la ju ibeiñ ïa pha kin dem ngon ha ki kjat jong pha. Kin khot ïa pha, ‘Ka Nongbah U Trai,’ ‘Ka Seïon, ka nongbah U Blei U Bakhuid ki Israel.’

¹⁵ “Yn ym iehnoh beiñ bad isih shuh ïa pha, ka nongbah kaba la shah iehnoh beiñ bad kynjah. Ngan pynlong ïa pha kaba khraw bad kaba itynnat, ka jaka jong ka jingkmen junom la junom.

¹⁶ Ki jaitbynriew bad ki syiem kin sumar ïa pha, kumba ka kmie ka sumar ïa la ki khun jong ka. Phan sa tip ba nga U Trai, nga la pyllait ïa pha, ba U Blei Bakhrawbor ki Israel u pyllaitluid ïa pha.

¹⁷ “Ngan wallam ïa pha ïa ka ksiar ha ka jaka ka rnong, ka rupa bad ka tama ha ka jaka u nar bad ka dieng, bad u nar ha ka jaka u maw. Ki nongsynshar jong pha kin ym banbeiñ shuh ïa pha; ngan pynlong ïa ki ban synshar da ka hok bad ka jingsuk.

¹⁸ Ïa ki jingleh thombor yn ym ïohsngew shuh, ka jingjot kan ym don shuh hapoh ki pud jong pha; ngan ïada bad kyrshan ïa pha kum ka kynroh: Phan ïaroh ïa nga namar nga la pyllait ïa pha.

¹⁹ “Ka sngi kan ym long shuh ka jingshai jong pha mynsngi, lymne u bnai un long ka jingshai jong pha mynmiet, ma nga, U Trai, ngan long ka jingshai bymjukut jong pha; ka jingshai jong ka burom jong nga kan tyngshaiñ ha pha.

²⁰ Ki sngi ka jingjynjar jong pha kin kut noh. Ma nga, U Trai, ngan long ka jingshai bymjukut jong pha, kham palat ban ïa ka sngi bad u bnai.

²¹ Ki briew jong pha kin leh baroh ïa kaei kaba dei, bad kin ïohkynti ïa ka ri junom. Nga la thung ïa ki, nga la thaw ïa ki, ban pynpaw ïa ka jingkhraw jong nga sa baroh.

²² Wat ka jait ka kynja kaba rit bad ba duk tam kan sa long kaba khraw kum ka jaitbynriew kaba donbor. Haba ka por kaba biang ka la wan, ngan pynjia kloi ïa kine kiei kiei. Nga long U Trai!”