ISAÏAH 6 - Khasi CL Bible (BSI)

U Blei u khot ïa u Isaïah ban long u Nongïathuhlypa

¹ Ha ka snem ba u syiem Ussaïah u ïap, nga la ïohi ïa U Trai. U da shong halor ka khet, hajrong bad kaba la pynkyntiew, bad ka jaiñkup jong u ka pyndap ïa ka Templ baroh kawei.

² Sawdong jong u ki seraph ki ïeng, uwei uwei na ki u don hynriew tylli ki thapniang. Uwei uwei u seraph u tap ïa la ka durkhmat da ki ar tylli ki thapniang, bad ïa la ka met da ki ar tylli, bad la pyndonkam ïa ki ar tylli kiwei pat ban her.

³ Ki ïa-pyrta uwei ïa uwei pat: “Bakhuid, Bakhuid, Bakhuid! U Trai Badonbor Baroh u long uba khuid! Ka burom jong u ka pyndap ïa ka pyrthei.”

⁴ Ka jingsawa ka sur jong ki ka pynlong ïa ki nongrim jong ka Templ ban khynñiuh, bad ka Templ hi ka kylla dap da ka tdem.

⁵ Nga la ong, “Ym don jingkyrmen ïa nga! Nga long ba la tim namar kawei pa kawei ka kyntien kaba mih na ki rmiang shyntur jong nga ka long kaba pop, bad nga shong nga sah hapdeng ki briew kiba kawei pa kawei ka kyntien ka long kaba pop. Bad pynban, da la ki jong ki khmat nga la ïohi ïa U Syiem, U Trai Badonbor Baroh.”

⁶ Te uwei na ki seraph u la her sha tbian sha nga, da kaba rah ïa u rnga uba rhem uba u la khap da ka nap na ka duwan.

⁷ U la ktah ïa ki rmiang shyntur jong nga da u rnga barhem bad ong, “Une u la ktah ïa ki rmiang shyntur jong me, bad mynta ka jingkitpop jong me ka la jah noh, bad ïa ki pop jong me la map.”

⁸ Nangta nga la ïohsngew ba U Trai u ong, “Ïano ngan phah? Mano ban long u nonglamktien jong ngi?” Nga la jubab, “Ngan leit! To phah ïa nga!”

⁹ Kumta u ong ïa nga ban leit bad ai ha ki briew ïa kane ka khubor: “Kam pher haduh katno phi shahshkor, phin ym sngewthuh. Kam pher haduh katno phi khmih, phin ym tip kaei kaba jia.”

¹⁰ Nangta u ong ïa nga, “Pynbthi ïa ki jingmut jingpyrkhat jong kine ki briew, pynkyllut ïa ki shkor jong ki, bad pynmatlah ïa ki khmat jong ki, ba kumta kin ym lah ban ïohi lane ïohsngew lane sngewthuh. Lada ki leh kumta, ki lah ban phai sha nga bad ïoh jingkhiah.”

¹¹ Nga la kylli, “Sa katno kan long kumne, ko Trai?” U la jubab, “Tad haduh ba ki nongbah kin jot kin pra bad long thylli — tad haduh ba ki ïing kin long ïingjah — tad haduh ba ka ri hi kan long ka jaka thylli kaba kynjah.

¹² Ngan phah sha jngai bah ïa ki briew bad ngan pynlong kynjah ïa ka ri.

¹³ Wat lada uwei u briew na ki shiphew ngut u sah ha ka ri, ïa u ruh yn pynjot, un long kum u dyngkhong jong u dieng Sning uba la khet.” (U dyngkhong u ïeng na ka bynta ka jingsdang bathymmai ïa ki briew jong U Blei.)