ISAÏAH 59 - Khasi CL Bible (BSI)

U Nongïathuhlypa u pynrem ïa ki pop jong ki briew

¹ Wat pyrkhat ba U Trai u tlot palat ban pynim ïa phi lane ba u kyllut palat ban ïohsngew ïa ka jingkyang jong phi ban ïoh jingïarap!

² Ka dei namar ki pop jong phi ba um shym ïohsngew ïa phi. Ka dei ki pop jong phi kiba pynïakhlad ïa phi na U Blei haba phi pyrshang ban mane ïa u.

³ Phi long kiba la rem namar ka jinglamler, ka jingleh jubor bad ka jingpynïap briew.

⁴ Phi kiew sha ka ïingbishar, hynrei phim shym ïoh ka jingbishar hok ha ka liang jong phi. Phi shaniah ha ki jinglamler ban jop ïa ka jingmudui jong phi. Phi pyndep ïa ki jingthmu jong phi ban pynmong ïa kiwei.

⁵ Ki jingïasylla bymman kiba phi pynlong ki long kiba shyrkhei kum ki pylleng jong ki bseiñ kiba don bih. Pynpait ïa kata ka pylleng, un mih u bseiñ.

⁶ Hynrei ki jingïasylla jong phi kim wanrah jingbha ei ei ïa phi — ki long bymlarkam kum ka jaiñphong ba la thain da ka snur thapbawa!

⁷ Borabor phi thmu ïa kaei kaei kaba sniew, bad phim lah ap ban leh ïa kata. Phim ju sngew ei ei ban pynïap ïa ki briew kiba lui lui; ka jingduh bad ka jingpynjot ki wan jia kat shaba phi leit.

⁸ Bad ym don ba long shngain haba phi don hangta. Baroh kaba phi leh ka long ka bymhok. Phi bud ïa ka lynti ïaid kaba kyllaiñ, bad ym don uwei ruh uba ïaid na kata ka lynti u ban long shngain.

Ki briew ki phla ïa la ka pop

⁹ U paidlang u ong, “Mynta ngi tip balei U Blei um pyllait ïa ngi na kito kiba banbeiñ ïa ngi. Ngi kyrmen ïa ka jingshai ban ïaid ryngkat, hynrei ka don tang ka jingdum,

¹⁰ bad ngi tare ruma kum ki briew kiba matlah. Ngi jynthut ha ka por shiteng sngi, la kumba long mynmiet, la kumba ngi don ha ka pyrthei kaba dum jong kiba ïap.

¹¹ Ngi la sheptieng bad kordit. Ngi thrang dik dik ba U Blei un pyllait ïa ngi na ka jingbanbeiñ bad jingleh bymdei hynrei kam shym jia long kumta.

¹² “A Trai, ki kam runar jong ngi pyrshah ïa me ki long kiba bun. Ki pop jong ngi hi ki pynrem ïa ngi. Ngi tip bha ïa kine kiei kiei baroh.

¹³ Ngi la ïeng ïaleh pyrshah ïa me, kyntait ïa me, bad ngim treh ban bud ïa me. Ngi la banbeiñ ïa kiwei bad phai lyndet na me. Ki jingmut jong ngi ki long kiba bakla; ki ktien jong ngi ki long kiba lamler.

¹⁴ Ïa ka jingbishar hok la beh noh, bad ka hok kam lah ban wan hajan. Ka jingshisha ka kyllon ha ki lynti shnong, bad ka hok kam don jaka hangta.

¹⁵ Ka jinglonghok ka la nang duna katta katta ba uno uno uba kiar na kaba leh bymman u shem ïa lade ba u long u lanot jong ka kam runar.” U Trai u la ïohi ïa kane, bad ka la pynsngewsih ïa u ba ym don shuh ka jingbishar hok.

U Trai u pynkhreh ban pyllait im ïa ki briew jong u

¹⁶ U lyngngoh ban ïohi ba ym don mano mano ban ïarap ïa kiba shah banbeiñ. Kumta un pyndonkam ïa la ka jong ka bor ban pyllait im ïa ki bad wanrah ïa ka jingjop.

¹⁷ Un kup ïa ka hok kum ka jingïada shadem, bad ïa ka bor bapynim kum ka jingda khlieh. U kup ïa lade da ka jingangnud kaba khraw ban buh ryntih ïa kiei kiei bad ban pynshitom bad pynhiarkput ïa ki jingsniew kiba ki briew ki leh.

¹⁸ Un pynshitom ïa ki nongshun jong u kat kum ki jingleh jong ki, wat ïa kito kiba shong sha ki ri kiba jngai.

¹⁹ Naduh mihngi shaduh sepngi baroh kin sheptieng ïa u bad ïa ka bor bakhraw jong u. Un wan kum ka um ba kyrthep, kum ka lyer kaba jur.

²⁰ U Trai un ong ha ki briew jong u, “Ngan wan sha Jerusalem ban ïada ïa phi bad ban pynim ïa phi baroh kiba la phai noh na ki pop jong phi.

²¹ Bad ngan pynlong ka Jutang bad phi: Nga la ai ha phi ïa ka bor jong nga bad ki jinghikai jong nga kin long bad phi junom, bad naduh mynta phi dei ban kohnguh ïa nga bad hikai ïa ki khun jong phi bad ïa ki pateng jong phi ban kohnguh ïa nga ha ki por baroh ki ban wan.”