ISAÏAH 58 - Khasi CL Bible (BSI)

Ka jingshah jingit kaba shisha

¹ U Trai u ong, “To pyrta jam katba phi lah! Ïathuh ïa ki briew jong nga ki Israel shaphang ki pop jong ki.

² Ki mane ïa nga man la ka sngi, ki da kam ba ki thrang ban tip ïa ki lynti jong nga bad kohnguh ïa ki aiñ jong nga. Ki ong ba ki kwah ïa nga ban ai ïa ki aiñ kiba beit bad ba ki shem sngewbha ha kaba mane ïa nga.”

³ Ki briew ki kylli, “Balei ngin shahjingit, lada U Trai um patiaw? Balei ngi dei ban leit khlem bam lada um shahshkor?” U Trai u ong ïa ki, “Ka jingshisha ka long ba ha kajuh ka por ba phi shahjingit, phi ïabeh ïa la ki jong ki jingmyntoi bad banbeiñ ïa la ki nongtrei.

⁴ Ka jingshah jingit jong phi ka pynlong ïa phi ban lehbor, bad phi ïakajia bad ïashoh. Phi pyrkhat ba kane ka rukom jingshah jingit kan pynlong ïa nga ban shahshkor ïa ki jingduwai jong phi?

⁵ Haba phi shahjingit, phi pynshitom ei ïa lade; phi pyndem ngon ïa la ka khlieh kum u phlang, bad phriang ïa ki jaiñ khain bad u dpei ban thiah hangta. Hato ka dei kata kaba phi khot ka jingshah jingit? Phi tharai ba ngan sngewbha ïa kata?

⁶ “Ka rukom shah jingit kaba nga kwah ka dei kane: Pynduh noh ïa ki kynjri ka jingbanbeiñ bad ka lyngkor ka jingbymhok, bad ai ba kiba la shah banbeiñ kin ïoh laitluid.

⁷ Ïasam lang ïa ki jingbam jong phi bad kiba thngan, bad ai jaka sah ïa kiba duk ki bym don ïing. Ai jaiñphong ïa kito ki bym don jaiñ ban phong, bad wat kyntait ban ïarap ïa la ki jong ki ba-ha-ïing.

⁸ “Te ka jinglehieit jong nga kan tyngshaiñ ha phi kum ka sngi mynstep, bad ki jingmong jong phi kin sa koit kloi. Ngan don ryngkat bad phi borabor ban pyllait ïa phi; ka jingdon ryngkat jong nga kan ïada ïa phi ha ki liang baroh.

⁹ Haba phi duwai, ngan jubab ïa phi. Haba phin khot ïa nga ngan jubab. “Lada phi pynkut noh ïa ka jingbanbeiñ, na man la ka jingleh ibeiñ, bad na man la ka ktien sniew,

¹⁰ lada phi ai bam ïa kiba thngan, bad pynkdang ïa kito kiba kyrduh, te ka jingdum sawdong jong phi kan kylla jingtyngshaiñ kum shiteng sngi.

¹¹ Bad ngan ïalam ïa phi borabor, bad pynkdang ïa phi da kiei kiei kiba bha. Ngan pynlong ïa phi kiba khlaiñ bad khiah krat. Phin long kum ka kper kaba pahuh um, kum ka umpohliew ka bym ju rngad.

¹² Ki briew jong phi kin tei pat ïa kaei kaba la pra la slem bah, kin tei pat halor ki nongrim ba-mynshuwa. Yn tip ïa phi kum ki briew kiba tei pat ïa ki kynroh, kiba pynbha pat ïa ki ïing ba la pra.”

Ka bainong ha kaba sumar ïa ka Sabbaton

¹³ U Trai u ong, “Lada phi ñiew ïa ka Sabbaton kum kaba kyntang bad phin ym beh tang ïa la ki jong ki jingmyntoi ha kata ka sngi; lada phi ñiewkor ïa ka sngi kaba khuid jong nga bad lada phi burom ïa ka khlem da leit jingleit, treikam, lane shu bunktien bieit ha kata ka sngi,

¹⁴ te phin shem ka jingkmen kaba wan na kaba shakri ïa nga. Ngan pynlong ïa phi ban ïoh burom ha kylleng ka pyrthei. Bad phin lehkmen ha ka ri ïa kaba nga la ai ha u kpa tymmen jong phi, u Jakob. Ma nga, U Trai, nga la kren.”