ISAÏAH 57 - Khasi CL Bible (BSI)

La pynrem ïa ka jingmane bleithaw ki Israel

¹ Ki briew kiba bha ki ïap, bad ym don uba sngewthuh lane wat ban suidñiew. Hynrei haba ki ïap, yn ym don jingjynjar shuh ki ban ktah ïa ki.

² Kito kiba im ka jingim kaba bha ki ïoh jingsuk bad jingjahthait ha ka jingïap.

³ Ale hangne ban shah bishar, a phi ki nongpop! Phim long kham bha ban ïa ki nongleh byrtong, kiba klim bad ki nuti.

⁴ Ïano phi leh biria? Ïano phi ki nongshukor phi rkhiebeiñ?

⁵ Phi mane ïa ki blei pynkharoi da kaba ïathiah shongkha hapoh ki dieng bakyntang jong phi; phi ai ïa la ki khun kum ki jingkñia hapoh ki synrang mawsiang harud ki phud wahduid.

⁶ Phi shim ïa ki maw kiba jlih nangta bad mane ïa ki kum ki blei. Phi theh ïa ka waiñ kum ka jingainguh ïa ki bad wallam sha ki ïa ki jingainguh kew. Phi tharai ba ngan sngewbha da kine kiei kiei?

⁷ Phi leit sha ki lum kiba jrong ban kñia ainguh bad ïathiah shongkha.

⁸ Phi pynïeng ïa ki blei ba-ijli ha khmat ka jingkhang ki jingkhang bah ki ïing jong phi. Phi la lyndet ïa nga; phi law ïa la ki jaiñ bad kiew halor ki jingthiah baheh jong phi ryngkat bad kiba ieit jong phi, ïa kiba phi la siewdor ban ïathiah lang bad ki. Bad hangta phi pynhun ïa ki jingkwah brai jong phi.

⁹ Phi sleh ïa ki jingiwbih bad ki kynja jingsleh, bad leit ban mane ïa u blei Molekh. Ban lap ïa ki blei ban mane phi la phah ïa ki nonglamktien sha jngai bah, wat shaduh ka pyrthei kiba ïap.

¹⁰ Phi pynthait ïa lade ban leit wad ïa kiwei pat ki blei, hynrei phim shym la sangeh. Phi pyrkhat ba ki bleithaw ba-ijli jong phi kin ai bor ïa phi, bad kumta phim ju khie tlot.

¹¹ U Trai u ong, “Kiei kine ki blei kiba pynsheptieng ïa phi, kumta ba phi ïathuh ïa nga ïa kaba lamler bad klet syndon ïa nga? Hato phim shym la ai burom shuh ïa nga namar ba nga la shu sngap la slem bah?

¹² Phi pyrkhat ba kaei kaba phi leh ka long kaba dei, hynrei ngan pynpaw ïa ki jingleh jong phi, bad ki bleithaw jong phi kin ym lah ban ïarap ei ei ïa phi.

¹³ Haba phi kyang ban ïoh jingïarap, ai ba kito ki bleithaw jong phi kin pyllait ïa phi! Tang shisien pyrsad ka lyer kan rong noh ïa ki! Hynrei kito kiba shaniah ha nga kin ïoh im ha ka ri bad kin mane ïa nga ha ka Templ jong nga.”

Ki jingkular U Blei ban ïarap bad pynkhiah

¹⁴ U Trai u ong, “To shah ïa ki briew jong nga ban wan phai sha nga. Bret noh ïa ki jingpynwit baroh na ki lynti ïaid jong ki! Shna ïa ka surok bad pynkhreh ïa ka!

¹⁵ “Nga long U Blei uba khraw bad uba khuid, uba im shi junom. Nga shong ha ki jaka kiba jrong bad kiba khuid, bad nga im ruh bad ki briew kiba sngewrit bad kylla-kaba-mut, kumta ba ngan pynïoh biang ïa ka jingsngewskhem bad ka jingkyrmen jong ki.

¹⁶ Nga ai ka jingim ïa ki briew jong nga, bad ngan ym mudui sah ïa ki lane bitar ïa ki junom.

¹⁷ Nga la bitar ïa ki namar ka pop bad ka jingkwah lalot jong ki, bad kumta nga la pynshitom bad iehnoh ïa ki. Hynrei ki la long mutlop bad ki la nang ïaid ha la ki jong ki lynti.

¹⁸ “Nga la ïohi kumno ki im, hynrei ngan pynkhiah pat ïa ki. Ngan ïalam ïa ki bad ïarap ïa ki, bad ngan pyntngen ïa kito kiba ïam sngewsih.

¹⁹ Nga ai jingsuk ïa baroh, ïa kiba hajan bad ïa kiba sha jngai! Ngan pynkhiah ïa ki briew jong nga.

²⁰ Hynrei ki riewbymman ki long kum ka duriaw kaba khih phaloh, kiba ki jingat phyllung jong ka kim ju sangeh, ki wanrah ïa ka jakhlia bad ka ktieh.

²¹ Ym don jingshngain ïa ki nongpop,” ong U Trai.