ISAÏAH 55 - Khasi CL Bible (BSI)

Ka jingtyrwa U Blei ïa ka jinglehisynei

¹ U Trai u ong, “To wan, phi kiba sliang — hangne ka don ka um! To wan, phi ki bym don pisa — thied ïa u kew bad bam! To wan! Thied ïa ka waiñ bad ka dud — phin ym hap siew ei ei!

² Balei ban pynlut pisa ha kaei ka bym ai jinghun? Balei ban pynlut ïa ka bainong jong phi bad ban dang hap shahthngan hi? To shahshkor ïa nga bad leh ïa kaei kaba nga ong, bad phin sngewtynnat ïa ka jingbam kaba bang tam na baroh.

³ “To shahshkor mynta, ko ki briew jong nga, bad to wan sha nga; to wan sha nga, bad phin ïoh jingim! Ngan pynlong ka jutang baneh bad phi bad ngan ai ha phi ïa ki jingkyrkhu kiba nga la kular ha u Dabid.

⁴ Nga la pynlong ïa u, u nongïalam bad u nongai hukum ïa ki jaitbynriew; bad lyngba jong u nga la pyn-i ha ki ïa ka bor jong nga.

⁵ Mynta phin phah khot ïa ki hima ri nongwei; mynshuwa kim shym la tip ïa phi, hynrei mynta kin wan mareh ban ïasoh bad phi! Nga, U Trai U Blei jong phi, U Blei bakhuid jong ki Israel, ngan pynjia ïa kane baroh; ngan ai ha phi ïa ka burom bad jingpyndonburom.”

⁶ To phai sha U Trai bad duwai ha u, mynta ba u don hajan.

⁷ To ai ba ki bymman kin iehnoh ïa la ka rukom im bad ban kylla ïa ka rukom pyrkhat. To ai ba kin phai sha U Trai. U Blei jong ngi u long uba dap da ka jingisynei bad uba kloi ban map ei.

⁸ “Ki jingmut jong nga,” ong U Trai, “kim long kum ki jong phi, bad ki lynti jong nga ki ïapher na ki jong phi.

⁹ Kumba ki bneng ki long kham shajrong ïa ka pyrthei, kumta ruh ki long ki lynti jong nga bad ki jingpyrkhat jong nga kham shajrong ïa phi.

¹⁰ “Ka ktien jong nga ka long kum ka ïor bad u slap kiba wan hap na suiñbneng ban ai um ïa ka pyrthei. Ki pynlong ïa ki jingthung ban san bad pynmih ïa u symbai ban ïoh bet bad ka jingbam ban bam.

¹¹ Kumta ruh kan long ka ktien kaba nga kren — kan ym pep ban pyndep ïa kaei kaba nga thmu na ka bynta jong ka; kan pynlong ïa kiei kiei baroh kiba nga phah ïa ka ban leh.

¹² “Phin mihnoh na Babilon da ka jingkmen; yn ïalam ïa phi shabar ka nongbah ha ka jingsuk. Ki lumbah bad ki lumrit kin sawa da ka jingrwai, bad ki dieng kin pyrta da ka jingkmen.

¹³ Ki dieng Kseh-Sypress kin san ha ka jaka kaba mynta ki don ki dieng shynraiñ; ki dieng Martl kin mih ha ka jaka ki shiah. Kane kan long ka dak ka ban neh junom, ka jingpynkynmaw ïa kaei kaba ma nga, U Trai, nga la leh.”