ISAÏAH 54 - Khasi CL Bible (BSI)

Ka jingieit U Trai ïa ki Israel

¹ Ko Jerusalem, pha la long kum ka briew ka bym don khun, hynrei mynta pha lah ban rwai bad risa da ka jingkmen. Mynta phan sa ïoh kham bun ki khun ban ïa ka briew kaba u tnga jong ka um ju iehnoh ïa ka!

² Kham pynheh ïa ka ïingjaiñ ha kaba pha shong; pynjrong ïa ki tyllai bad pynskhem ïa ki snar!

³ Phan sa pynïar ïa ki pud sawdong na baroh ki liang; ki briew jong pha kin ïoh pat ïa la ka ri ïa kaba kiwei pat ki jaitbynriew ki la shim. Ki nongbah kiba la ieh kynjah yn pyndap pat da ki briew.

⁴ Wat nym sheptieng — phan ym shah pynlehrain biang; phan ym shah pynjahburom. Phan klet noh ïa ka jingbymlongkhuid kum ka tnga ba dang kham samla, bad ïa ka jinglong marwei ba shah ibeiñ kum ka riewkynthei.

⁵ U Nongthaw jong pha un long kum u tnga ïa pha — U Trai Badonbor Baroh long ka kyrteng jong u. U Blei bakhuid jong ki Israel un pynim ïa pha — u long u nongsynshar jong ka pyrthei baroh.

⁶ Ko Israel, pha long kum ka tnga ba dang kham samla, ba la iehnoh da u tnga jong ka bad ba sngew jynjar sat. Hynrei U Trai u khot pat ïa pha bad u ong:

⁷ “Tang shipor nga la iehnoh ïa pha; da ka jingieit kaba jylliew ngan shim pat ïa pha.

⁸ Nga la phai noh da ka jingbitar tang shipor, hynrei ngan pyn-i ha pha ïa ka jingieit jong nga junom.” Kumta u ong U Trai uba pynim ïa pha.

⁹ “Ha ka por u Noah nga la kular ba ngan ym pynshlei shuh ïa ka pyrthei. Mynta nga kular ba ngan ym bitar shuh ïa pha; ngan ym mai ne pynshitom ïa pha.

¹⁰ Ki lumbah bad ki lumrit ki lah ban twa, hynrei ka jingieit jong nga ïa pha kan ym kut noh; ngan pynneh junom ïa la ka kular jong ka jingsuk.” Kumta te ong U Trai uba ieit ïa pha.

Ka Jerusalem ha ka lawei

¹¹ U Trai u ong, “Ko ka Jerusalem, pha ka nongbah ba shah jynjar bad bymdonbor, bad ym don u ban pyntngen ïa pha, ngan tei pat ïa ki nongrim jong pha da ki mawkordor.

¹² Ngan tei ïa ki kut jong pha da ki maw Rubi, ïa ki khyrdop jong pha da ki maw kiba rhem kum ka ding, bad ki kynroh sawdong jong pha da ki mawlynnai.

¹³ “Nga da lade ngan hikai ïa ki briew jong pha, bad ngan ai ha ki ïa ka jingmanbha bad ka jingsuk.

¹⁴ Ka jingbishar hok bad ka hok tynrai kin pynkhlaiñ ïa pha. Phan lait na ka jingshah banbeiñ bad ka jingtriem.

¹⁵ Lada uno uno u tur ïaleh ïa pha u leh ïa ka khlem ka jingaibor jong nga; uno uno uba ïaleh pyrshah ïa pha un kyllon noh.

¹⁶ “Nga la thaw ïa u nongshoh-nar, uba pyrsad ïa ka ding bad shna ïa ki tiar thma. Nga la thaw ruh ïa u shipai, uba pyndonkam ïa ki tiar ïapom ban pynïap.

¹⁷ Hynrei yn ym don ka tiar thma ka ban lah ban pynmynsaw ïa pha; phan don ka jubab ïa kito baroh kiba mudui ïa pha. Ngan kyrshan ïa ki shakri jong nga bad ngan ai jingjop ïa ki.” U Trai u la kren.