ISAÏAH 53 - Khasi CL Bible (BSI)

¹ Ki briew ki jubab, “Uei uba lah ban ngeit ïa kaei kaba ngi ïathuh mynta? Uei uba lah ban ïohi ïa ka kti U Trai ha kane?

² Ka dei ka mon jong U Trai ba u shakri jong u un san kum u jingthung uba ksam ïa ki thied ha ka khyndew kaba tyrkhong. Um don main ne jingitynnat ban pynlong ïa ngi ban peit ïa u. Ym don kano kano kaba ngin ibha ïa u, ym don kano kano ka ban khring ïa ngi sha u.

³ Ngi la ñiewbeiñ ïa u bad ngi la kyntait ïa u; u la shah ïa ka jingshitom bad jingpang. Ym don mano mano wat ban peit ïa u — ngi la leh bymsalia ïa u kum u bym long ei ei.

⁴ “Hynrei u la shah ïa ka jingshitom kaba la dei hok ïa ngi, ka jingpang kaba ngi la dei ban shah. Baroh shi katta ngi la pyrkhat ba ki jingshitom jong u ki la long ki jingpynshitom ba la phah da U Blei.

⁵ Hynrei namar ki pop jong ngi ïa u la pynmong, la sympat namar ka jingbymman kaba ngi la leh. La pynkhiah ïa ngi da ka jingpynshitom kaba u la shah, la pynkhiah ïa ngi da ki jingsympat kiba u la ïoh.

⁶ Ngi baroh ngi la long kum ki langbrot ba la sakma, uwei pa uwei na ngi u leit ha la ka jong ka lynti. Hynrei U Trai u la pynlong ba ka jingpynshitom kan hap halor jong u, ka jingpynshitom kaba baroh ngi dei hok ban ïoh.

⁷ “U la shah lehbeiñ sat, hynrei u la shah da kaba sngewrit; um shym la kren shikyntien ruh. Kum i khunlangbrot ban sa shah pynïap, kum ka langbrot ka ban sa shah khih ïa la u shñiuh, um shym kren shikyntien ruh.

⁸ La kem ïa u bad la bishar bad ïalam noh ban shah pynïap, bad ym don ba salia ïa kaei ka ban jia ïa u. La pynïap ïa u na ka bynta ki pop jong ki briew jong ngi.

⁹ La buh ïa u ha ka jingtep lem bad ki bymman, la tep ïa u bad kiba riewspah, wat la um shym la leh kano kano ka kam bymman lane um shym la shukor ïano ïano.”

¹⁰ U Trai u ong, “Ka dei ka mon jong nga ba un shah pynshitom; ka jingïap jong u ka long ka jingkñia ban wanrah ïa ka jingmap-ei. Bad kumta un ïohi ïa la ki khun ki ksiew; un ïoh ïa ka jingim kaba jlan, bad lyngba jong u ïa ka jingthmu jong nga yn pyndep.

¹¹ Hadien ka jingim ba la shahshitom, un ïoh pat ïa ka jingkmen; un tip ba um shym la shahshitom lehnoh-ei. U shakri ba la aiti lut jong nga, ha uba nga sngewbha, un shah ïa ka jingpynshitom jong kiba bun bad na ka bynta jong u ngan map ïa ki.

¹² Bad kumta ngan ai ha u ïa ka burom, ka jaka hapdeng kiba khraw bad kiba donbor. U la aiti mon sngewbha ïa la ka jingim bad u la shim bynta lem bad ki riewbymman. U la shim ïa ka jaka jong ki nongpop kiba bun bad u la duwai ba ki kin ïoh ïa ka Jingmap-ei.”