ISAÏAH 52 - Khasi CL Bible (BSI)

U Blei un pyllait im ïa ka Jerusalem

¹ Ko Jerusalem, to long khlaiñ bad long khraw biang! Ko nongbah Bakhuid jong U Blei, to kup ïa lade da ka burom! Kiba mane blei thala kin ym ïohrung shuh da lei lei lyngba ki khyrdop jong pha.

² Kynther ïa lade, ko Jerusalem! Ïeng joit na u pui pui bad shong halor la ka khet! Law noh ïa ki kynjri kiba teh ïa pha, ki briew ba la shah khum jong ka Seïon!

³ U Trai Nongsynshar u ong ha la ki briew, “Mynba phi la long ki mraw, ym shym la siew pisa na ka bynta jong phi; ha kajuh ka rukom yn ym siew ei ei ban pyllaitluid ïa phi.

⁴ Haba phi la leit ban shong ha Ijipt kum ki nongwei, phi la leh ïa kata ha la ka jong ka mon hi; ka Assyria, pynban, ka la shim jubor ïa phi khlem siewdor ei ei.

⁵ Bad mynta ha Babilonia kajuh hi ka la jia; phi long kiba shahtehmraw, bad ym shym siewdor ei ei na ka bynta jong phi. Kito kiba synshar halor jong phi ki kop bad ki meng bad ki ïai pynpaw jingbeiñ ïa nga.

⁶ Ha ki por ki ban wan phin sa pdiang ba nga long U Blei bad ba nga la kren ha phi.”

⁷ Katno ka long kaba phylla ban ïohi ïa u nonglamktien ba u wan na ki lumbah, u wanrah ïa ka khubor babha, ka khubor jong ka jingsuk! U pynbna ïa ka jingjop bad u ong ïa ka Seïon, “U Blei jong phi u long u syiem!”

⁸ Kito kiba ap phira ïa ka nongbah ki pyrta, ki pyrta lang da ka jingkmen! Ki lah ban ïohi da la ki jong ki khmat ïa ka jingwan jong U Trai sha Seïon!

⁹ To risa lang da ka jingkmen, phi ki jingpra ka Jerusalem! U Trai un pyllait ïa la ka nongbah bad un pyntngen ïa la ki briew.

¹⁰ U Trai un pyndonkam ïa ka bor bakhuid jong u; un pynim ïa la ki briew, bad ka pyrthei baroh kan ïohi ïa kata.

¹¹ To pynthikna phi baroh kiba mih na Babilon, phi baroh kiba rah ïa ki tiar ka templ! Wat ktah ïa kaba la mana; ri khuid ïa lade bad mihnoh.

¹² Ha kane ka sien phin ym hap mihnoh ha ka jingkyrkieh; phin ym pyrshang ban phet noh. U Trai U Blei jong phi un ïalam ïa phi bad un ïada ïa phi na ki liang baroh.

U Shakri uba Shahshitom

¹³ U Trai u ong, “U shakri jong nga un jop ha ka kam jong u; un ïoh ka burom bakhraw.

¹⁴ Bun ki briew kin kyndit haba kin ïohi ïa u; la pynsniew briew ïa u haduh ba um i shuh kum u briew.

¹⁵ Hynrei mynta bun ki hima kin sngewphylla ïa u, bad ki syiem kin ym lait kren namar ka jingsngew lyngngoh. Kin ïohi bad kin sngewthuh katto katne kaba kim pat ju tip mynno mynno.”