ISAÏAH 51 - Khasi CL Bible (BSI)

Ki ktien pyntngen ïa ka Jerusalem

¹ U Trai u ong; “To shahshkor ïa nga, phi kiba kwah ban ïoh jingim, phi kiba wan sha nga ban ïoh jingïarap. Puson halor u mawsiang na uba phi la wan, ka par maw na kaba la tih ïa phi.

² Puson halor u kpa tymmen jong phi, u Abraham, bad ka Sarah, na kiba phi hiarpateng. Mynba nga la khot ïa u Abraham, u la long uba khlem khun, hynrei nga la kyrkhu ïa u bad nga la ai ki khun ïa u; Nga la pynroi ïa ki khun ki ksiew jong u.

³ “Ngan pyn-i ïa ka jinglehisynei ïa ka Jerusalem, sha kito baroh kiba shong halor ki jingpra jong ka. Wat la ka jaka jong ka, ka long kum ka ri shyiap, ngan pynlong ïa ka, ka kper, kum ka kper kaba nga la thung ha Eden. Ka jingkmen bad ka jinglehkmen kin don hangta, bad ki jingrwai jong ka jingïaroh bad jingainguh ïa nga.

⁴ “To shahshkor ïa nga, ko ki briew jong nga, to shahshkor ïa kaei kaba nga ong: Nga ai jinghikai ïa ki jaitbynriew; ki aiñ jong nga kin wallam jingshai ïa ki.

⁵ Ngan wan kloi bad ngan pynim ïa ki; ka por jong ka jingjop ka la hajan. Nga da lade hi ngan synshar halor ki jaitbynriew. Ki ri ba hajngai bah ki ap ïa nga ba ngan wan; ki ap da ka jingkyrmen ïa nga ban pynim ïa ki.

⁶ Khmih sha ki bneng; peit ha ka pyrthei! Ki bneng kin jah noh kum ka tdem; ka pyrthei kan jot noh kum ki jaiñ ba la rim, bad ki briew jong ka baroh kin ïap kum ki skain. Hynrei ka jingpyllait kaba nga wallam kan neh junom; ka jingjop jong nga kan long kaba kut.

⁷ “To shahshkor ïa nga, phi kiba tip ïa kaei kaba dei, kiba don ka jinghikai jong nga kaba neh ha la ki dohnud. Wat sheptieng haba ki briew ki pynsalia bad krenbeiñ ïa phi;

⁸ kin jah noh kum ki jaiñ ba la bam khñiang! Hynrei ka jingpyllait kaba ngan wallam kan neh junom; ka jingjop jong nga kan neh ha ki por baroh.”

⁹ A Trai to khie bad ïarap ïa ngi! Pyndonkam ïa la ka bor bad pynim ïa ngi; pyndonkam ïa ka kum ha ka por mynbarim. Dei ma me uba la ot lyngkhot lyngkhai ïa u Rahab u mrad duriaw bakynsha.

¹⁰ Dei ma me ruh uba la pynrngad ïa ka duriaw bad pynlong ka lynti ïaid lyngba ki um, khnang ba kito kiba me pyllait im kin ïoh ïaid lyngba.

¹¹ Kito kiba me la pyllait im kin ïoh poi ha Jerusalem da ka jingkmen, da kaba rwai bad risa da ka jingkmen. Kin long kiba kmen junom, junom kiba laitluid na ka jingsngewsih bad jingkthang mynsiem.

¹² U Trai u ong, “Nga long uta uba pynkhlaiñ ïa phi. Balei phin sheptieng ïa u briew u bym im junom, u bym kham neh ban ïa u phlang?

¹³ Hato phi la klet ïa U Trai uba la thaw ïa phi, uba pynïar ïa ki bneng bad uba pynïeng ïa ki nongrim ka pyrthei? Balei phi im ha ka jingïai-sheptieng ïa ka jingbitar shla jong kito kiba banbeiñ ïa phi, jong kito kiba long ba la kloi ban pynjot ïa phi? Ka jingbitar shla jong ki kam lah shuh da lei lei ban ktah ïa phi.

¹⁴ Kito kiba long ki koidi shen yn sa pyllaitluid ïa ki; kin im ka jingim kaba jlan bad kin ïoh ïa ka jingbam kat kaba ki donkam.

¹⁵ “Nga long U Trai U Blei jong phi; nga pynphaloh ïa ka duriaw bad nga pynlong ïa ki jingat phyllung ban kyrhuh. Ka kyrteng jong nga ka long U Trai Badonbor Baroh!

¹⁶ Nga la pynpyiar ïa ki bneng bad pynïeng ïa ki nongrim ka pyrthei; nga ong ïa ka Jerusalem, ‘Phi long ki briew jong nga! Nga la ai ha phi ïa ka jinghikai jong nga, bad nga ïada ïa phi da ka ksang'ti jong nga.’”

Ka jingkut ka jingjynjar jong ka Jerusalem

¹⁷ Ko Jerusalem, to khie noh! Khie joit ïa lade bad ïeng! Pha la dih ïa ka khuri ka jingpynshitom kaba U Trai ha ka jingbitar jong u, u la ai ba phan dih; pha dih lut ïa ka, bad ka la pynlong ïa pha ban ïaid sheng sheng.

¹⁸ Ym don mano mano ban ïalam ïa pha, ym don uno uno napdeng ki briew jong pha ban btin ïa pha da ka kti.

¹⁹ Ka jingjot kaba ar shah ka la hap halor jong pha: ïa ka jaka jong pha la pynjot ha ka thma, bad ki briew jong pha ki la ïapthngan. Ym don uno uno uba pyn-i jingsngewlem ïa pha.

²⁰ Ha ki khongdong ha man ki surok bah ki briew jong pha ki kyllon noh na ka jingtlot; ki long kum ka skei kaba la ngat ha ka jar jong u nongbeh mrad. Ki la mad ïa ka bor jong ka jingbitar U Blei.

²¹ Phi ki briew kiba jynjar jong ka Jerusalem, phi kiba ïaid sheng sheng kumba phi la buaid,

²² U Trai U Blei jong phi u ïada ïa phi bad u ong, “Nga shim noh ïa ka khuri kaba nga la ai ha phi ha ka jingbitar jong nga. Phin ym hap ban dih shuh ïa ka waiñ kaba pynlong ïa phi ban ïaid sheng sheng.

²³ Ngan ai ïa ka ha kito kiba banbeiñ ïa phi, ïa kito kiba la pynlong ïa phi ban thiah ha ki surok bah bad ïuhroit halor jong phi kum ka jakhlia.”