ISAÏAH 50 - Khasi CL Bible (BSI)

¹ U Trai u ong, “Phi tharai ba nga la phah noh ïa la ki briew kum u briew uba pyllait noh ïa la ka tnga? Hangno te, ki don ki kot pyllait tnga? Phi tharai nga la die ïa phi sha ka jingshahtehmraw kum u briew uba die ïa la ki khun kum ki mraw? Em, phi la leit shahtehmraw noh namar ki pop jong phi; la phah noh ïa phi namar ki kam bymman jong phi.

² “Balei ba ki briew jong nga kim jubab haba nga la leit sha ki ban pynim ïa ki? Balei ba kim phai ktien haba nga la khot ïa ki? Hato nga tlot eh ban pynim ïa ki? Nga lah ban pynrngad noh ïa ka duriaw da kaba shu hukum bad pynkylla ïa ki wah sha ka ri shyiap, ba ki dohkha kiba don ha ki kin ïap na ka jingduna um.

³ Nga lah ban pyndum ïa ka suiñbneng, ban ïohi kumba ka ïambriew namar kiba ïap.”

Ka jingkohnguh u shakri jong U Trai

⁴ U Trai Nongsynshar u la hikai ïa nga kaei ban ong, khnang ba ngan lah ban pynkhlaiñ ïa kiba tlot bor. Man la ka step u pynlong ïa nga ban thrang eh ban ïohsngew ïa kaei kaba un hikai ïa nga.

⁵ U Trai u la ai ha nga ïa ka jingshemphang, bad nga shym la ïaleh pyrshah lane phai noh na u.

⁶ Nga pynshah da ka met sha kito kiba shoh ïa nga. Ngam shym pynsangeh ïa ki haba ki krenbeiñ ïa nga, haba ki patrong ïa ki shñiuh na u 'ñiuhtmoh jong nga bad bynthiew ha ka khmat jong nga.

⁷ Hynrei ki jingkrenbeiñ jong ki kim lah ban pynmong ïa nga namar ba U Trai Nongsynshar u ai jingïarap ïa nga. Nga pyneh ïa lade ban ïaishah ïa ki. Nga tip ba ngan ym shah pynjahburom,

⁸ namar U Blei u don hajan, bad un pynshisha ba nga long uba lui lui. Hato don mano mano ba nud ban ujor pyrshah ïa nga? Ïa ngin ïaleit lang sha ka ïingbishar! To ai ba un wallam ïa ki jingmudui jong u!

⁹ U Trai Nongsynshar da lade un kyrshan ïa nga — uno te, uba lah ban pynshisha ba nga long uba la shah pynrem? Baroh ki nongmudui jong nga kin jah noh; kin jah kum ka jaiñ ba la bam khñiang.

¹⁰ Phi baroh kiba burom ïa U Trai bad kiba kohnguh ïa ki ktien u shakri jong u, ka lynti kaba phi ïaid ka lah ban long kaba dum da shisha, hynrei shaniah ha U Trai, aiti ha U Blei jong phi.

¹¹ Phi baroh kiba ïasylla ban pynjot ïa kiwei yn pynjot ïa phi ha ki jingsylla jong phi hi. U Trai da lade hi un pynjia ïa kane; phin shahshitom ha ka jingkordit.