ISAÏAH 5 - Khasi CL Bible (BSI)

Ka jingrwai shaphang ka bri sohwaiñ

¹ To pynshahshkor katba nga rwai ha phi ïa kane ka jingrwai, ka jingrwai u paralok jong nga bad ka bri sohwaiñ jong u: U paralok jong nga u don ka bri sohwaiñ ha u lumrit uba seisoh bha.

² U la tih ïa ka khyndew bad u la weng ïa ki maw na ka; u la thung ïa ki dieng sohwaiñ kiba kynsai. U la tei ka jaka ap phira ban khmih sumar ïa ki, u la tih ka thliew na ka bynta ban ïuh ïa ki sohwaiñ. U la ap ïa ki sohwaiñ ban ih, hynrei uwei pa uwei u sohwaiñ u long uba jew.

³ Kumta mynta u paralok jong nga u ong: “Ma phi ki briew kiba shong ha Jerusalem bad Judah, to bishar hapdeng jong nga bad ka bri sohwaiñ jong nga.

⁴ Don kano kano kaba ngam shym la leh ïa ka? Te balei ka pynmih ki sohwaiñ kiba jew bad ym kiba bha kumba nga la khmih lynti?

⁵ “Kane ka dei kaei kaba ngan leh ïa ka bri sohwaiñ jong nga: Ngan weng noh ïa ka jingker baroh sawdong jong ka, ngan pynpra ïa ka kynroh kaba da ïa ka, ngan shah ïa ki mradkhlaw ban bam ïa ka bad ïuhroit ïa ka.

⁶ Ngan shah ïa ka ba kan dap da ki ñiut suda. Ngan ym khap ïa ki thning lane kara ïa ka khyndew, hynrei ngan shah ïa ki dieng shynraiñ bad ki shiah ba kin tap ïa ka. Ngan khang wat ïa ki lyoh ban pynhap slap ha ka.”

⁷ Ka Israel ka dei ka bri sohwaiñ jong U Trai Badonbor Baroh; ki briew ka Judah ki dei ki dieng sohwaiñ kiba u la thung. U la khmih lynti ba kin leh ïa kaei kaba bha, hynrei pynban ki la pynïap briew. U la khmih lynti ba kin leh ïa kaba dei, hynrei kiba shah lanot jong ki, ki kyang ïa ka jingbishar hok.

Ka jingsniew kaba ki briew ki leh

⁸ Phi long kiba la tim. Phi thied bun tylli ki ïing bad ki lyngkha ban bynrap shuh shuh ïa kito kiba phi la don lypa. Shen yn ym don jaka ïano ïano pat ban shong ban sah bad tang ma phi hi phin shong ha ka ri.

⁹ Nga la ïohsngew ba U Trai Badonbor Baroh u ong, “Baroh kine ki ïing kiba heh bad kiba itynnat kin long kiba la pra bad thylli.

¹⁰ Ki dieng sohwaiñ kiba mih ha ka jaka kaba shiphew hektar kin pynmih tang san gallon ka waiñ. Shiphew shang u symbai un pynmih tang shi shang u symbai.”

¹¹ Phi long ba la tim! Phi khie dang step phyrngab ban sdang dih, bad phi pynlut ki janmiet bajlan ha ka jingbuaid.

¹² Ha ki jingkhawai jong phi, phi don ki duitara, ki shakuriaw bad ki tangmuri — bad ka waiñ. Hynrei phim sngewthuh aïu U Trai u leh,

¹³ kumta ïa phi yn rah noh kum ki koidi. Ki nongïalam jong phi kin shahthngan haduh ban ïap, bad ki riewpaidbah kin ïap thynrang.

¹⁴ Ka pyrthei kiba ïap ka thngan ïa ki, ka ang pynheh ïa la ka shyntur. Ka klun shapoh ïa ki riewdonburom jong ka Jerusalem bad ki paid ba kaw kaw jong ki riewpaidbah.

¹⁵ Ïa uwei pa uwei yn pynjahburom, bad ïa baroh kiba sarong yn pynrit.

¹⁶ Hynrei U Trai Badonbor Baroh u pyn-i ïa ka jingkhraw jong u da kaba leh ïa kaba dei, bad u pynpaw ïa ka jingkhuid jong u da kaba bishar ïa la ki briew.

¹⁷ Ha ki jaka bapra jong ki nongbah, ki khunlangbrot kin bam phlang bad ki blang samla kin shem ka jaka bam phlang.

¹⁸ Phi long ba la tim! Phim shym lah ban pyllaitluid na la ki jong ki pop.

¹⁹ Phi ong, “Ai ba U Trai un pynstet bad leh ïa kaei kaba u ong ba un leh, ba kumta ngi lah ban ïohi ïa ka. Ai ba U Blei bakhuid ka Israel un pyndep ïa ki jingthmu jong u, to ngin khmih kaei u don ha ka jingmut jong u.”

²⁰ Phi long ba la tim! Phi khot kaba bha ïa kaba sniew bad kaba sniew ïa kaba bha. Phi pynphai ïa ka jingdum sha ka jingshai bad ïa ka jingshai sha ka jingdum. Phi pynlong kaba thiang ïa kaba kthang bad kaba kthang ïa kaba thiang.

²¹ Phi long ba la tim! Phi pyrkhat phi long uba stad, kumta kiba shalak shibun.

²² Phi long ba la tim! Ki nongjop ïa ki klong waiñ! Kiba shlur bad ki bym tieng ha kaba ïadei bad ki jingdih ba la khleh!

²³ Hynrei tang namar ka jingïoh pisa bymdei phi shah ïa kiba shah pynrem ban lait bad phi khang ïa kiba lui lui na kaba ïoh ïa ka jingbishar hok.

²⁴ Kumta mynta, kumba u skum kba bad u phlang tyrkhong ki ran bad ing ha ka ding, ki thied jong phi kin pyut bad ki syntiew jong phi kin tyrkhong bad shah rong noh ha ka lyer, namar ba phi la kyntait ïa kaei kaba U Trai Badonbor Baroh, U Blei bakhuid ka Israel u la hikai ïa ngi.

²⁵ U Trai u la bitar ïa la ki briew bad u la kner ïa la ka kti ban pynshitom ïa ki. Ki lumbah kin khynñiuh bad ïa ki met jong kito kiba la ïap yn ieh ha ki lynti kum ka synrum. Pynban wat la katta ruh ïa ka jingbitar U Trai ym shym la pynkut, hynrei ka kti jong u kan ïai kner ban pynshitom.

²⁶ U Trai u ai dak ban khot ïa ka jaitbynriew na jngai. U siaw ïa ki ban wan na kiba kut ka pyrthei. Bad kine ki wan ha ka jingstet bad kloi lan.

²⁷ Ym don mano mano na ki, kiba la sdang thait, bad ym don mano mano na ki, kiba jynthut. Kim ju samthiah lane thiah. Ym don u 'saipan ba la lait, ym don u ksai juti uba la dkut.

²⁸ Ki khnam jong ki, ki long kiba nep, bad ki ryntieh jong ki, ki long kiba la pynkhreh ban siat. Ki poh'jat jong ki kulai jong ki, ki eh kum ki mawshamok bad ki shaka jong ki kali ïapom jong ki, ki kylla long kum ka 'erlangthari.

²⁹ Ki shipai ki kyrhuh kum ki sing kiba la pynïap ïa ka mrad bad kiba la rong ïa ka sha ka jaka ha kaba ym don ba lah ban knieh ïa ka na ki.

³⁰ Haba kata ka sngi ka poi, kin kyrhuh halor ka Israel da kaba jam kum ka duriaw. Ha khmih ïa kane ka ri! Ka jingdum bad ka jinglyng-a! Ïa ka jingshai la nguid da ka jingdum.