ISAÏAH 49 - Khasi CL Bible (BSI)

Ki Israel, ka jingshai sha ki jaitbynriew

¹ To shahshkor ïa nga, ko ki hima ba don sha jngai, phi ki briew bashong sha jngai bah! Ha shuwa ban kha ïa nga, U Trai u la jied ïa nga bad thung ïa nga ban long u shakri jong u.

² U la pynlong ïa ki ktien jong nga kiba nep kum ka waitlam. Da la ka kti u ïada ïa nga. U la pynlong ïa nga kum u khnam, uba nep bad ba la biang ban pyndonkam.

³ U la ong ïa nga, “Ko Israel, me long u shakri jong nga; namar jong me, ki briew kin ïaroh ïa nga.”

⁴ Nga la ong, “Nga la trei, hynrei katno ka long kaba duh jingkyrmen! Nga la pyndonkam ïa la ka jingkhlaiñ, hynrei ym lah ban pyndep ei ei.” Pynban nga lah ban shaniah ha U Trai ban kyrshan na ka bynta jong nga; un ai bainong ïa nga ïa kaei kaba nga leh.

⁵ Ha shuwa ban kha ïa nga, U Trai u la thung ïa nga; u la pynlong ïa nga u shakri jong u ban wallam pat ïa ki briew jong u, ban wallam pat ïa ka jaitbynriew Israel kaba la saphriang kylleng. U Trai u ai ha nga ka burom; u long u tyllong jong ka jingkhlaiñ jong nga.

⁶ U Trai u la ong ha nga, “Nga don ka kam kaba kham khraw ïa me, ko shakri jong nga. Ym tang ba men rah pat sha ka jingkhraw ïa ki paid Israel kiba la lait im, hynrei ngan pynlong ruh ïa me ka jingshai sha ki jaitbynriew — khnang ba ka pyrthei baroh kan ïohlait im.”

⁷ U Blei Bakhuid bad u nongpynim ki Israel u ong ïa uta uba shah ibeiñ, ïa uba la isih da ki jaitbynriew bad uba long u shakri jong ki nongsynshar: “Ki syiem kin ïohi ba la pyllait ïa me bad kin ïeng ban pynpaw ïa ka jingñiewburom jong ki; ki khun syiem ruh kin ïohi ïa kata, bad kin dem khrup ban pyndonburom ïa me.” Kane kan jia namar U Trai u la jied ïa la u shakri; U Blei bakhuid jong ki Israel u bat ïa la ki kular.

Ka jingpynbha pat ïa ka Jerusalem

⁸ U Trai u ong ha la ki briew, “Haba ka por ban pyllait im ïa phi ka la poi, ngan pynpaw ïa ka jingsngewbha jong nga ïa phi bad ban sngap ïa ki jingkhot kyrpad jingïarap. Ngan ri bad ïada ïa phi bad lyngba jong phi ngan pynlong ka jutang bad ki briew baroh. Ngan shah ba phi shongduh sa shisien ha la ka ri kaba mynta ka la shu sah shrah.

⁹ Ngan ong ha kiba shah set byndi, ‘Leit ha kaba laitluid!’ bad ïa kito kiba don ha ka jingdum, ‘Wan sha ka jingshai!’ Kin long kum ki langbrot kiba bam phlang halor ki lumrit;

¹⁰ Kin ym shahthngan lane sliang shuh. Ka jingshit jong ka sngi bad ka ri shyiap kin ym pynjynjar ïa ki, namar yn ïalam ïa ki da uta uba ieit ïa ki. Un ïalam ïa ki sha ki umpohliew.

¹¹ “Ngan shna ïa ka surok bah halor ki lumbah bad pynkhreh ïa ka lynti ba ki briew jong nga kin ïaid.

¹² Ki briew jong nga kin wan na jngai bah, na shatei bad na sepngi, bad na Aswan kaba don shathie.”

¹³ To rwai, ko ki bneng! Pyrta da ka jingkmen, ko ka pyrthei! To ai ba ki lumbah kin win ha ka jingrwai! U Trai un pyntngen ïa la ki briew; un don jingisynei ha ki briew jong u kiba jynjar.

¹⁴ Hynrei ki briew jong ka Jerusalem ki la ong, “U Trai u la iehnoh ïa ngi! U la klet ïa ngi.”

¹⁵ Kumta U Trai u jubab, “Hato ka briew ka lah ban klet noh ïa la i khunlung bad ban ym ieit ïa i khun iba ka la kha? Wat la ka kmie ka lah ban klet ïa la i khun, da lei lei ngan ym klet ïa phi.

¹⁶ Ko Jerusalem, ngam lah ban klet ïa pha! Nga la thoh ïa ka kyrteng jong pha ha ki lynghoh kti jong nga.

¹⁷ “Kito ki ban tei pat ïa pha kin sa wan shen, bad kito kiba pynjot ïa pha kin leit noh.

¹⁸ Khmih baroh sawdong bad peit kaei kaba jia! Ki briew jong pha ki ïalumlang — ki ïawan sha la ïing! Kumba nga long U Blei uba im, phan sngewsarong ïa la ki briew, kumba sngewsarong ka nongleitkurim ïa la ki mawlynnai.

¹⁹ “Ïa ka ri jong pha la pynjot bad la iehnoh kynjah — hynrei mynta kan rit eh na ka bynta kito ki ban wan ban shong hangta. Bad ïa kito kiba la iehnoh ïa pha ha ka jingjot yn pynkynriah jngai na pha.

²⁰ Ki briew jong pha kiba la kha ha ka por ka jinglongmraw ha kawei ka sngi kin ong ha pha, ‘Kane ka jaka ka rit eh — ngi donkam jaka shuh ban shong!’

²¹ Te phan ong ha lade, ‘Mano ba la kha ïa kine ki khun baroh na ka bynta jong nga? Nga la duh noh ïa la ki khun bad ngam lah ban ïoh khun shuh. Nga la shah ïalam mraw bad la shah beh noh — mano ba la pynheh pynsan ïa kine ki khun? Nga la shah iehnoh marwei — nangno kine ki khun ki la wan?’ ”

²² U Trai Nongsynshar u ong ha la ki briew: “Ngan pyn-i dak sha ki jaitbynriew, bad kin wallam ïa ki khun jong pha sha ïing.

²³ Ki syiem kin long kum ki kpa ïa pha; ki mahadei kum ki kmie. Kin dem khrup ha khmat jong pha bad kin burom ïa pha; da kaba pynrit kin pyn-i burom ïa pha. Te phan tip ba nga long U Trai; uba ap ïa ka jingïarap jong nga un ym duh jingkyrmen.”

²⁴ Hato pha lah ban shim noh ïa ka jinglute na u shipai? Hato pha lah ban pyllait ïa ki koidi na u nongsynshar uba leh jubor?

²⁵ U Trai u jubab, “Kane ka long kata kaei ka ban sa jia. Ïa ki koidi jong u shipai yn ïalam noh, bad ïa ka jinglute jong u nongsynshar leh jubor yn bat noh. Ngan ïaleh pyrshah ïa uta uba ïaleh ïa pha, bad ngan pyllait ïa ki khun jong pha.

²⁶ Ngan pynlong ïa kiba banbeiñ ïa pha ban ïa-pynïap para ma ki; kin shu buaid ha kaba pynïap briew bad ha ka jingbitar. Nangta u bynriew baroh un tip ba nga long U Trai, uta uba pynim ïa pha bad uba pyllaitluid ïa pha. Kin tip ba nga long U Blei bakhlaiñbor jong ki Israel.”