ISAÏAH 48 - Khasi CL Bible (BSI)

U Blei u long U Trai jong ka lawei

¹ To shahshkor ïa kane, phi ki paid Israel, phi kiba hiarpateng na u Judah: Phi smai da ka kyrteng jong U Trai bad kam ba phi mane ïa U Blei ki Israel — hynrei phim shym buh jingmut ïa kawei ruh ka ktien kaba phi ong.

² Bad pynban phi sngewsarong ban ong ba phi long ki nongshong shnong jong ka nongbah bakhuid bad ba phi shaniah ha U Blei ki Israel, uba ka kyrteng jong u ka long U Trai Badonbor Baroh.

³ U Trai u ong ïa ki Israel, “La slem bah nga la ïathuh lypa kaei ka ban sa jia; nangta kynsan nga pynlong ba kan jia.

⁴ Nga la tip ba phin pynshisha ba phi long kiba mutlop, kiba pyneh kum ka nar bad ka rnong bym lah ban pynkdor.

⁵ Bad kumta nga la ïathuh lypa ïa ka lawei jong phi lah slem bah, da kaba pynbna ïa ki jingjia ha shuwa ba kin wan jia, ban khang ïa phi na kaba kam ba ki bleithaw bad ki durblei jong phi, ki la pynjia ïa ki.

⁶ “Baroh kiba nga la ïathuh lypa, mynta ki la urlong; phi hap ban pdiang ba ki jingïathuh lypa jong nga ki long kiba dei. Mynta ngan ong ïa phi ïa kiei kiei kiba thymmai ki ban wan, ki jingjia kiba ngam shym la pynpaw mynshuwa.

⁷ Dei tang mynta ba nga pynurlong ïa ki; ym don ei ei kum kane kaba la jia mynshuwa. Lada ka la jia, phin jin da la kam ba phi la dep tip lut shaphang kane.

⁸ Nga la tip ba ïa phi ym lah ban shaniah, la ju tip ïa phi kum u nongïaleh pyrshah. Na kata ka daw phim pat ju ïohsngew satia ïa kane, balei ba wat shikyntien ruh kam shym la wan ha ki shkor jong phi?

⁹ “Khnang ba ki briew kin ïaroh ïa ka kyrteng jong nga, nga pyntud ïa ka jingbitar jong nga ha lade; nga bat noh ïa ka bad ban ym pynjot ïa phi.

¹⁰ Nga la tynjuh ïa phi ha ka ding jong ka jingshah shitom, kum ka rupa ba saiñ ha ka lawar ding. Hynrei nga la shem ïa phi ba phi long ki bymdondor.

¹¹ Kaei kaba nga la leh na ka bynta jong nga hi — Ngan ym shah ba ïa ka kyrteng jong nga yn pynjahburom lane mano mano ban ïadon bynta lang ïa ka burom kaba dei ka jong nga bad ka jong nga hi.”

U Syros, u nongïalam ba la jied jong U Trai

¹² U Trai u ong, “To shahshkor ïa nga, ko Israel, ka jaitbynriew kaba nga la khot! Nga long U Blei, Uba nyngkong, Uba khatduh, tang ma nga hi U Blei!

¹³ Ki ksang'ti jong nga ki la buh ïa ki nongrim jong ka pyrthei bad kiba pyiar sha ki bneng. Haba nga phah khot ïa ka pyrthei bad ïa ka suiñbneng, ki wan kumne kumne bad aiti ïa lade.

¹⁴ “To ïalumlang bad to shahshkor, ma phi baroh! Ym don na ki blei kiba lah ban ïathuh lypa ba u briew uba nga la jied un tur ïaleh ïa ka Babilon; un leh ïa kaei kaba nga ong ïa u ban leh.

¹⁵ Dei ma nga uba la kren bad ba la khot ïa u; nga la ïalam ïa u shabar bad la ai ha u ïa ka jingjop.

¹⁶ “Mynta to wan sha jan jong nga bad sngap ïa kaei ba nga ong. Naduh mynnyngkong nga la kren da kaba shai, bad borabor nga la pynlong ba ki ktien jong nga kin wan urlong shisha.” (Mynta U Trai Nongsynshar u la ai ha nga ïa ka bor jong u bad u la phah ïa nga.)

Ka jingthmu U Trai ïa la ki briew

¹⁷ U Blei Bakhuid jong ki Israel, U Trai uba pynim ïa phi, u ong: “Nga long U Trai U Blei jong phi, uta uba kwah ban hikai ïa phi na ka bynta ka jingbha jong phi hi bad uba kdew ïa phi ïa ka lynti ba phi dei ban leit.

¹⁸ “Tang lada phi la sngap ïa ki hukum jong nga! Te ki jingkyrkhu kin jin da la tuid ha phi kum ka wahduid ka bym ju rngad! Ka jingjop kan jin da la wan ha phi kum ki jingat phyllung kiba phaloh ha ka rud duriaw.

¹⁹ Ki khun ki ksiew jong phi kin roi kum ki symboh shyiap, bad ngan jin da la pynthikna ba yn ym pynjot ïa ki da lei lei.”

²⁰ Khie mihnoh na Babilon, kiba laitluid! Pyrta jam da ka jingkmen ïa ka khubor; to pyntip ïa ka kylleng: “U Trai u la pynim ïa ki shakri jong u, ki Israel!”

²¹ Haba U Trai u ïalam ïa la ki briew lyngba ka ri shyiap kaba khluit, kaba tyrkhong, kim shym la shahshitom na ka jingsliang. U la pynlong ïa ka um ban mih na u mawsiang na ka bynta jong ki; u pynpait ïa u mawsiang, bad ka um ka mih nangta.

²² “Ym don jingshngain ïa ki nongpop,” ong U Trai.