ISAÏAH 47 - Khasi CL Bible (BSI)

Ka jingbishar halor ka Babilon

¹ U Trai u ong, “Ko Babilon, to hiar noh na ka khet jong pha, bad shong ha u pui pui halor ka khyndew. Shisien pha la long kum kaba sotti, ka nongbah bym pat shahjop, hynrei pham long shuh kaba jem bad ba long jai jai! Mynta pha long ka mraw!

² Pynshad ïa u mawtylliat! Pynlwet ïa u 'purew! Weng ïa ka jingkah khmat! Law noh ïa ki jaiñ bani jong pha! Syndong ïa la ki jaiñphong ban jam ïa ki wahduid!

³ Ki briew kin ïohi ba pha long kaba lyngkhuit; kin ïohi ba la pynrit bad pynlehrain ïa pha. Ngan pynhiarkput, bad yn ym don ba lah ban pynsangeh ïa nga.”

⁴ U Blei Bakhuid jong ki Israel u pyllaitluid ïa ngi — ka kyrteng jong u ka long U Trai Badonbor Baroh.

⁵ U Trai u ong ïa ka Babilon, “To shong ha ka jingjar jar bad ha ka jingdum; kin ym khot shuh ïa pha ka syiem jong ki jaitbynriew!

⁶ Nga la bitar ïa ki briew jong nga; nga la shim ïa ki kumba kim dei shuh ki jong nga: Nga buh ïa ki ha ka bor jong pha, bad pham pyn-i jinglehisynei ïa ki; wat ïa kiba la tymmen pha leh da kaba tyngeh.

⁷ Pha pyrkhat ba phan ïailong ka syiem, bad pham shym la shim khia ïa kine kiei kiei lane pyrkhat kumno ba kine baroh kin kut.

⁸ “To sngap ïa kane, pha kaba ieit ïa ka jinglehsngewbha, pha kaba pyrkhat ba pha shongshngain bad sngewskhem. Pha kam ba pha long kaba khraw kum U Blei — ba ym don mano mano pat kum ma pha. Pha pyrkhat ba da lei lei phan ym long ka riewkynthei lane mad ïa ka jingduh noh ïa la ki khun.

⁹ Hynrei ha ka shikhyllipmat, tang ha kawei ka sngi, kine baroh ar tylli kiei kiei ki wan jia. Wat hapdeng ki kam myntor baroh ba pha pyndonkam, phan duh noh ïa la u tnga bad ïa la ki khun.

¹⁰ “Pha sngewshngain ïa lade ha la ki kam sniew; pha pyrkhat ba ym don mano mano ba ïohi ïa pha. Ka jingstad bad ka jingtip jong pha ki ïalam bakla ïa pha, bad pha ong ha lade, ‘Nga long U Blei — ym don uno uno pat kum ma nga.’

¹¹ Ka jingjot kan wan ha pha, bad yn ym don na ki kam myntor jong pha ki ban lah ban pynsangeh ïa ka. Ka jingpynjot kynsan kynsan kan wan halor jong pha, ka jingpynjot kaba pham pat ju phohsniew!

¹² Buh ïa ki jingleh myntor bad jingkhan jong pha baroh; pha la pyndonkam ïa ki naduh ba pha dang samla. Lehse ki lah ban long jingïarap katto katne ïa pha; lehse pha lah ban pyntieng ïa ki nongshun jong pha.

¹³ Pha long kaba khlem bor wat la pha ïoh ïa ka jingai jingmut. To ai ba ki nongbatai kupar kin wan sha khmat ban pyllait im ïa pha — kito ki briew kiba wad jingtip shaphang ki khlur, kiba pruid dak ïa ki bynta jong ki bneng bad ïathuh ïa pha na uwei u bnai sha uwei pat kaei ka ban jia ïa pha.

¹⁴ “Kin long kum ki lyngkhot phlangïap, bad ka ding kan bam duh ïa ki! Kin ym lah wat ban pyllait im ïa lade — ki thylliej ding kin khluit eh na ka bynta jong ki, yn ym don ka ding kaba rhem ban pynsyaid ïa lade.

¹⁵ Kata ka long baroh kaba kin leh ïa pha — kito ki nongbatai kupar kiba pha la twad jingmut baroh shi jingim jong pha. Baroh na ki kin ieh ïa pha bad kin leit ha la ki lynti, bad yn ym don uba sah u ban pyllait im ïa pha.”