ISAÏAH 46 - Khasi CL Bible (BSI)

¹ “Kane ka dei kaba kut jong ki blei ka Babilon! Ïa u Bel bad ïa u Nebo shisien la mane ïa ki, hynrei mynta la pynkit ïa ki halor ki kada, ka jingbankhia ïa ki met ki mrad ba la thait.

² Ki bleithaw kim lah ban pynim ïa lade; ïa ki la kurup bad la rah noh bak. Kane ka dei kaba kut jong ki blei ka Babilon!

³ “To shahshkor ïa nga, ko ki khun ki ksiew jong u Jakob, phi baroh kiba dang sah na ki briew jong nga. Nga la sumar ïa phi naduh ka por ba dang kha.

⁴ Nga long U Blei jong phi bad ngan sumar ïa phi haduh ba phin da tymmen bad ba u shñiuh jong phi u la lieh. Nga la thaw ïa phi bad ngan sumar ïa phi; Ngan ai jingïarap ïa phi bad ngan pyllait ïa phi.

⁵ “Badno phin nujor ïa nga?” ong U Trai. “Hato don uno uno uba kum ma nga?

⁶ Ki briew ki plied ïa la ki pla pisa bad ki theh shabar ïa ka ksiar; ki thew ïa ka rupa ha ki tarajur. Ki ainong ïa u bania ban shna durblei; nangta ki dem ngon bad mane ïa ka!

⁷ Ki kyntiew ïa ka ha la ki tyrpeng bad rah ïa ka; ki buh ïa ka ha ka jaka jong ka, bad hangta ka ïeng, khlem lah ban khih na ka jaka ba ka don. Lada don uno uno ba duwai ha ka, kam lah ban jubab lane pyllait ïa u na ka jingjot.

⁸ “To kynmaw ïa kane, phi ki nongpop; pyrkhat ïa kaei kaba nga la leh.

⁹ To kynmaw ïa kaei kaba la jia la slem bah; to pdiang ba tang ma nga, nga long U Blei bad ym don uwei pat kum ma nga.

¹⁰ Naduh mynnyngkong nga la tip lypa ïa kaei ka ban mih; la slem bah nga la ïathuh lypa ïa kaei ka ban jia. Nga la ong ba ki jingthmu jong nga kin ym duh da lei lei, ngan leh ïa kiei kiei baroh kiba nga thmu ban leh.

¹¹ Nga khot ïa u briew ban wan na sha mihngi; un suh wia sha tbian kum u kbeit bad pyndep ïa kaei kaba nga la thmu. Nga la kren, bad ngan leh ïa ka.

¹² “To shahshkor ïa nga, phi ki briew ba-mutlop kiba pyrkhat ba ka jingjop ka dang sha jngai bah.

¹³ Nga wallam ïa ka sngi ka jingjop sha jan — kam long satia kaba dang sha jngai. Ïa ka jingjop jong nga yn ym pynslem. Ngan pyllait im ïa ka Jerusalem bad ngan wallam ïa ka burom ka Israel hangta.”