ISAÏAH 45 - Khasi CL Bible (BSI)

U Trai u thung ïa u Syros

¹ U Trai u la jied ïa u Syros ban long syiem! U la jied ïa u ban jop ïa ki jaitbynriew; u phah ïa u ban sloit ïa ki syiem na ka bor jong ki; U Trai un plie ïa ki khyrdop jong ki nongbah na ka bynta jong u. Ha u Syros U Trai u ong,

² “Nga da lade ngan pynkhreh ïa ka lynti jong me, ngan pynmadan ïa ki lumbah bad ki lumrit. Ngan pynpait ïa ki khyrdop rnong bad pynkheiñ ïa ki nar-khang jong ki.

³ Ngan ai ïa me ki jingkynshew na ki jaka ba-dum, bakynjah; te men tip ba nga long U Trai, bad ba U Blei ki Israel u la khot ïa me da ka kyrteng.

⁴ Nga la thung ïa me ban ïarap ïa u shakri jong nga u Israel, ki briew kiba nga la jied. Nga la ai ha me ka burom bakhraw, wat la mem shym la ithuh ïa nga.

⁵ “Nga long U Trai; ym don uwei pat U Blei, ngan ai ïa me ka jingkhlaiñ ba me donkam, wat la mem shym la ithuh ïa nga.

⁶ Nga leh ïa kane khnang ba baroh na kawei ka tduh jong ka pyrthei shaduh kawei pat ka tduh kan tip ba nga long U Trai bad ym don uwei pat U Blei.

⁷ Nga thaw ïa ka jingshai bad ïa ka jingdum; nga wanrah ka jingkyrkhu bad ka jingjot. Ma nga, U Trai, nga leh ïa kine kiei kiei baroh.

⁸ Ngan phah ïa ka jingjop na sahit bneng kum u slap; ka khyndew kan ang ban pdiang ïa u bad kan phuh da ka jinglaitluid bad ka jingbishar hok. Nga, U Trai, ngan pynlong ïa kane ban jia.”

U Trai jong ka jingpynlong bad ka histori

⁹ Hato u khiew khyndew un nud ban ïatainia bad u nongthaw jong u, u khiew uba long kum baroh kiwei pat? Hato ka dewbyrtha kan ong ïa u nongthaw khiew kaei ba u leh? Hato u khiew un mudui ïa la u nongthaw khiew ba um don jingtbit?

¹⁰ Hato uno uno un nud ban ong ïa la ki kmie ki kpa, “Balei phi pynlong ïa nga kumne?”

¹¹ U Trai, U Blei bakhuid ki Israel, uta uba saiñdur ïa ka lawei, u ong: “Phim don hok ban kylli ïa nga shaphang ki khun jong nga lane ban ïathuh ïa nga kaei ba nga dei ban leh!

¹² Nga long uta uba thaw ïa ka pyrthei bad pynlong ïa ki briew ban shong hangta. Da ka bor jong nga, nga pynpyiar ïa ki bneng; nga pynïaid ïa ka sngi, u bnai, bad ïa ki khlur.

¹³ Nga da lade hi nga la pynkhih ïa u Syros ban leh ban pyndep ïa ka jingthmu jong nga bad buh beit ïa kiei kiei. Ngan pynbeit ïa ka lynti baroh ba u leit. Un tei biang ïa ka nongbah jong nga, ka Jerusalem, bad un pyllait ïa ki briew ba shah set byndi jong nga. Ym don ba la shim wai ïa u ne ba la pynbam klop ïa u ban leh ïa kane.” U Trai Badonbor Baroh u la kren.

¹⁴ U Trai u ong ïa ki Israel, “Ka spah ki Ijipt bad ki Sudan kan long ka jong phi, bad ki rangbah bajrong jong ka Seba kin long ki mraw jong phi; kin bud ïa phi ha ki kynjri. Kin dem ngon ha phi bad kin phla, ‘U Blei u don ryngkat bad phi — tang ma u, u long U Blei.

¹⁵ U Blei ki Israel, uba pynim ïa la ki briew, u long U Blei uba buhrieh ïa lade.

¹⁶ Kito kiba shna bleithaw baroh kin shah lehrain; baroh na ki kin jahburom.

¹⁷ Hynrei ïa ki Israel la pynim da U Trai, bad ka jingjop jong u ka neh junom; ki briew jong ka kin ym jahburom.’ ”

¹⁸ U Trai u la thaw ïa ki bneng — U long tang ma u hi U Blei! U pynlong bad thaw ïa ka pyrthei — U thaw ïa ka kaba skhem bad kaba neh. Um shym la thaw ïa ka ban iehnoh suda, hynrei ka jaka ba ki briew kin shong kin sah. U long ma u, uba ong, “Nga long U Trai, ym don uwei pat U Blei.

¹⁹ Ngam shym la kren ha kaba rieh lane buhrieh ïa ka jingthmu jong nga. Ngam shym la dawa na u paid Israel ban khmih ïa nga ha ka jaka ba la iehnoh suda. Nga long U Trai, bad nga kren ïa ka jingshisha; nga pynlong ban tip ïa kaei kaba dei.”

U Trai jong ka pyrthei bad ki bleithaw jong ka Babilon

²⁰ U Trai u ong, “Ale lang, ko ki briew jong ki hima, baroh kiba lait im na ka jingkyllon ka hima-patsha; ai ïa lade na ka bynta ka jingbishar! Ki briew kiba ïaid bad la ki bleithaw kiba da ki dieng bad duwai sha ki blei ki bym lah ban pynim ïa ki — kito ki briew ki bymtip ei ei satia!

²¹ Ale bad ai ïa ka kam jong phi ha ka ïingbishar; ai ba ki nongïasaid kin ïasyllok uwei ïa uwei pat. Mano ba la ïathuhlypa slem mynshuwa kaei ban jia? Hato ym dei ma nga, U Trai, U Blei uba pynim ïa la ki briew? Ym don uwei pat U Blei.

²² “To phai sha nga mynta bad ban im, ko ki briew baroh kylleng ka pyrthei! Nga long tang ma nga U Blei.

²³ Ka jingkular jong nga ka long kaba shisha, bad kan ym kylla. Nga kular shisha da baroh kaba nga long; baroh kin wan ban dem ha khmat jong nga bad kular ba ki long hok ha nga.

²⁴ “Kin ong ba dei tang lyngba jong nga yn shem ïa ka jingjop bad ka jingkhlaiñ; hynrei baroh kiba shun ïa nga kin shah pynjahburom.

²⁵ Nga, U Trai, ngan pyllait im ïa baroh ki khun ki ksiew jong u Jakob, bad kin ai ka jingïaroh ïa nga.