ISAÏAH 44 - Khasi CL Bible (BSI)

U Trai u long tang ma u hi U Blei

¹ U Trai u ong, “To shahshkor mynta, ko Israel, u shakri jong nga, ki briew ba la jied jong nga, ki khun ki ksiew u Jakob.

² Nga long U Trai uba la thaw ïa phi; naduh ka por ba la kha ïa phi, nga la ïarap ïa phi. Wat sheptieng; phi long u shakri jong nga, ki briew ba la jied jong nga kiba nga ieit.

³ “Ngan ai um ïa ka ri basliang bad pynlong ïa ki wahduid ban tuid ha ka khyndew ba-tyrkhong. Ngan theh noh ïa U Mynsiem jong nga ha ki khun jong phi bad ka jingkyrkhu jong nga ha ki khun ki ksiew jong phi.

⁴ Kin san kin plung kum u phlang ba la ai um bha, kum ki dieng Jamynrei harud ki wahduid jong ka um batuid.

⁵ “Uwei hadien uwei, ki briew kin ong, ‘nga long u jong U TRAI’. Kin ïawan ban ïasnoh bad u paid Israel. Uwei pa uwei un shon ha ka ksang'ti jong u ïa ka kyrteng jong U Trai bad un khot ïa lade uwei na ki briew U Blei.”

⁶ U Trai uba synshar bad uba ïada ïa ki Israel, U Trai Badonbor Baroh, u don ïa kane ban ong: “Nga long uba nyngkong, uba khatduh, tang ma nga hi U Blei; ym don uwei pat U Blei hynrei tang ma nga.

⁷ Hato don mano mano ba la leh ïa kaei kaba nga la leh? Mano ba la ïathuh lypa ïa baroh ka ban sa jia naduh kaba mynnyngkong haduh kaba kut ka por?

⁸ Wat sheptieng, ko ki briew jong nga! Phi tip ba naduh ki por mynbarim haduh mynta nga la ïathuhlypa ïa baroh ka ban sa jia, bad phi long ki sakhi jong nga. Hato don uno uno uwei pat U Blei? Hato don kiwei pat ki blei badonbor ba ngam shym ïohsngew?”

Ïa ka jingmane bleithaw la rkhiebeiñ

⁹ Baroh kito kiba shna bleithaw kim long ei ei, bad u blei ba ki ñiewkor shibun um long uba larkam. Kito kiba mane ïa kine ki blei ki long kiba matlah bad kiba bieit bad kin shah pynjahburom.

¹⁰ Kam don jingbha ban thaw ïa ka dur nar ban mane kum u blei!

¹¹ Baroh uba mane ïa ka un shah ñiewbeiñ. Ki briew kiba shna ïa ki bleithaw ki long tang ki briew bad ym don shuh. Shah ïa ki ban wan bad ban ïeng ha ka jingbishar — kin khynñiuh bad kin shah pynjahburom.

¹² U kamar u shim shi lyngkhot ka nar bad u pynwandur ïa ka ha ka ding. Ka ksang'ti bakhlaiñ jong u ka pynkhih ïa u tyrnem ban tied pynwandur ïa ka nar. Katba u dang trei, u thngan, u sliang bad u la thait.

¹³ U misteri u thew ïa ka dieng, u buh dak ïa ka dur da u mawthoh, u ohdur ïa ka da ki tiar jong u, bad u pynlong ïa ka ha ka dur u briew, ka durbriew ba-itynnat, ban buh ha ka ïing jong u.

¹⁴ U lah ban pom ïa ki dieng Kedar ban pyndonkam, lane u jied da u dieng Sning lane u dieng Kseh-Sypress na ka khlaw. Lane u lah ban thung u dieng ba ïai jyrngam bad u ap ïa u slap ban pynmih ïa u.

¹⁵ U briew u pyndonkam shi bynta jong u dieng ban thang ding bad shi bynta jong u ban pynlong bleithaw. Da shi bynta u pynmeh ding ban pynsyaid ïa lade bad shet kpu; da kawei pat ka shi bynta u shna blei bad mane ïa ka.

¹⁶ Da katto katne ki dieng u pynmeh ding; u syang doh, u bam ïa ka, bad u kdang. U pynsyaid ïa lade bad u ong, “Katno kaba sngewtynnat bad sngewsyiad! Katno ka rhem ka ding!”

¹⁷ Ka dieng kaba sah u shna ïa ka bleithaw, bad nangta u dem bad mane ïa ka. U duwai ha ka bad u ong, “Phi long U Blei jong nga — to pynim ïa nga!”

¹⁸ Kum kita ki briew ki long kiba bieit eh ban tip ïa kaei kaba ki leh. Ki khapbrip ïa la ki khmat bad ïa la ki jingmut na ka jingshisha.

¹⁹ U nongshna ïa ki bleithaw um don ka jingpuson ne ka jingshemphang ban ong, “Khyndiat na ka dieng nga thang duh. Nga shet khyndiat u kpu halor ki rnga bad nga syang doh bad nga la bam ïa ka. Bad kaba sah na ka dieng nga shna bleithaw. Hangne nga don ban nguh dem ïa u dieng tylli!”

²⁰ Ka long ka jingsngewthuh kumba bam dpei. Ki jingmut ba-bieit jong u ki la ïalam bakla ïa u ha kaba u don sha lyndet ka jingïarap. Un ym pdiang ha lade ba ka bleithaw ba u bat ha ka kti jong u kam long satia ka blei.

U Trai , u Nongthaw bad u Nongpynim

²¹ U Trai u ong, “Ko Israel to kynmaw ïa kane; kynmaw ba phi long u shakri jong nga. Nga la thaw ïa phi ban long u shakri jong nga, bad ngan ym klet ïa phi.

²² Nga la weng noh ïa ki pop jong phi kum ïa u lyoh. To wan phai pat sha nga; nga long uta uba la pynim ïa phi.”

²³ To risa da ka jingkmen, phi ki bneng! To risa, ko ki jaka bajylliew jong ka pyrthei! To risa da ka jingkmen, ko ki lumbah, bad man la u dieng jong ka khlaw! U Trai u la pyn-i ïa ka jingkhraw jong u da kaba u pynim ïa ki briew jong u ki Israel.

²⁴ “Nga long U Trai, u Nongpynim jong phi; nga long uta uba la thaw ïa phi. Nga long U Trai, u Nongthaw ïa baroh kiei kiei. Nga marwei hi nga pynpyiar ïa ki bneng; haba nga thaw ïa ka pyrthei, ym don u ban ïarap ïa nga.

²⁵ Nga pynpaw bieit ïa ki nongpeit kti bad pynkulmar ïa ki jingïathuh lypa ki nongbatai kupar. Ki ktien jong kiba stad nga kyntait bad pyn-i ba ka jingstad jong ki ka long ka jingbieit.

²⁶ Hynrei haba u shakri jong nga u pynlong ka jingïathuh lypa, haba nga phah ïa u nonglamktien ban pynpaw ïa ki jingthmu jong nga, Nga pynlong ïa kito ki jingthmu bad ki jingïathuh lypa ban jia shisha. Nga ïathuh ïa ka Jerusalem ba ki briew kin shong biang hangta, bad ïa ki nongbah jong ka Judah yn sa tei pat. Kito ki nongbah kin ïeng na ki jingjot.

²⁷ Da ki ktien ka hukum nga pyntyrkhong ïa ka duriaw-bah.

²⁸ Nga ong ha u Syros, ‘Me long uta u ban synshar na ka bynta jong nga; men leh ïa kaei kaba nga kwah ïa phi ban leh; men hukum ïa ka Jerusalem ban tei biang bad ïa ki nongrim jong ka Templ ban seng pat.’ ”