ISAÏAH 43 - Khasi CL Bible (BSI)

U Blei u kular ban pyllait im ïa ki briew jong u

¹ Ko Israel, U Blei uba la thaw ïa phi u ong, “Wat sheptieng — ngan pyllait im ïa phi, nga la khot ïa phi da ka kyrteng — phi long u jong nga.

² Haba phi ïaid lyngba ïa ki um bajylliew, ngan long ryngkat bad phi; ki jingeh kin ym tyllep ïa phi. Haba phi ïaid lyngba ka ding, phin ym ing; ki jingtynjuh ba-eh kiba wan kin ym pynmynsaw ïa phi.

³ Naba nga long U Trai U Blei jong phi, U Blei bakhuid jong ki Israel, uba pynim ïa phi. Ngan kyntait ïa ka Ijipt ban pyllaitluid ïa phi; ngan kyntait ïa ka Sudan bad ka Seba.

⁴ Ngan kyntait ïa ki ri baroh ban pynim ïa ka jingim jong phi, namar phi long uba kordor ha nga bad namar ba nga ieit ïa phi bad ai ïa phi ka burom.

⁵ Wat sheptieng — nga long ryngkat bad phi! “Naduh mihngi bajngai bad sha sepngi bajngai tam, ngan wallam sha ïing ïa ki briew jong phi.

⁶ Ngan ïathuh ïa ka shatei ban shah ïa ki ban leit bad ïa ka shathie ban ym bat noh ïa ki. Ai ba ki briew jong nga ki wan phai na ki ri bajngai, na man la ki bynta baroh jong ka pyrthei.

⁷ Ki long ki briew jong nga hi, bad nga la thaw ïa ki ban wanrah burom ïa nga.”

Ka Israel ka long ka sakhi U Trai

⁸ U Blei u ong, “Khot hajir ïa ki briew jong nga sha ïingbishar. Ki don ki khmat hynrei ki long kiba matlah; ki don ki shkor hynrei ki long kiba kyllut!

⁹ Khot hajir ïa ki jaitbynriew ban wan sha ka jingbishar. Kino na ki blei jong ki kiba lah ban ïathuhlypa ïa ka lawei? Kino na ki kiba la ong lypa kaei ka ban jia mynta? Ai ba kine ki blei kin wanrah ïa ki sakhi jong ki ban pynshisha ba ki long kiba dei, ban phla ïa ka jingshisha jong ki ktien jong ki.

¹⁰ “Ko ki paid Israel, phi long ki sakhi jong nga; nga la jied ïa phi ban long u shakri jong nga, khnang ba phin tip ïa nga bad ngeit ha nga bad sngewthuh ba nga long tang ma nga U Blei. Nalor jong nga ym don uwei pat u blei; u bym pat ju long bad u ban nym long.

¹¹ “Nga hi marwei nga long U Trai, uba tang marwei uba lah ban pynim ïa phi.

¹² Nga ïathuh lypa ïa kaei ka ban sa jia, bad nangta nga wan ban ïarap ïa phi. Ym don u blei nongwei uba ju leh ïa kane; phi long ki sakhi jong nga.

¹³ Nga long U Blei bad ngan ïailong. Ym don u ban lait im na ka bor jong nga; ym don uba lah ban pynkylla ïa kaei ba nga leh.”

Ka jinglait im na Babilon

¹⁴ U Blei uba khuid ki Israel, U Trai uba pynim ïa phi u ong, “Ban pynim ïa phi, ngan phah ïa ka kynhun shipai pyrshah ïa ka Babilon; ngan pynpait ïa ki khyrdop ka nongbah, bad ki jingrisa jong ki briew jong ka kin kylla jingïam.

¹⁵ Nga long U Trai, U Blei bakhuid jong phi, nga la thaw ïa phi, ko Israel, bad nga long u Syiem jong phi.”

¹⁶ La slem mynshuwa U Trai u la thaw ïa ka lynti lyngba ka duriaw, ka lynti lyngba ki um kiba phaloh.

¹⁷ U la ïalam ïa ka kynhun shipai bakhlaiñ sha ka jingpynjot, ka kynhun shipai, ki kali ïapom bad ki kulai. Ki kyllon ha madan, kim lah khie shuh, ki lip kum ka thylliej ding ka sharak!

¹⁸ Hynrei U Trai u ong, “Wat snoh ha ki jingjia jong ka mynnor ne shongsah ha kaei kaba la jia slem mynshuwa.

¹⁹ To khmih ïa kaba thymmai kaba ngan leh. Ka la jia lypa — phi lah ban ïohi ïa ka mynta! Ngan pynlong ïa ka lynti lyngba ka ri khlaw bad ïa ki wahduid ngan ai ïa phi na ka um hangta.

²⁰ Wat ki mradkhlaw kin burom ïa nga; ki myrsiang bad ki ostrit kin ïaroh ïa nga haba ngan pynlong ïa ki wah ba kin tuid ha ka ri shyiap ban ai um ïa ki briew ba la jied jong nga.

²¹ Ki long ki briew ba nga la pynlong na ka bynta ïa lade, bad ki rwai ïa ka jingïaroh jong nga!”

Ka pop ki Israel

²² U Trai u ong, “Hynrei phi la thait ïa nga, ko Israel; phim shym la mane ïa nga.

²³ Phim shym la wallam ha nga ïa ki jingainguh thang ki langbrot jong phi; phim shym la burom ïa nga da ki jingkñia jong phi. Ngam shym la bankhia ïa phi da kaba dawa ki jingainguh lane pynbtai ïa phi da kaba pan jingiwbih.

²⁴ Phim shym la thied jingiwbih ïa nga lane pynhun ïa nga da ka khleiñ ki jingri jong phi. Pynban phi la bankhia ïa nga da ki pop jong phi; phi la pynbtai ïa nga da ki jingbakla ba phi la leh.

²⁵ Bad pynban, nga long U Blei uba map ïa ki pop jong phi, bad nga leh ïa kane namar uei ba nga long. Ngan ym bat ïa ki pop jong phi pyrshah ïa phi.

²⁶ “Ïa ngin ïaleit sha ïingbishar; wallam ïa ka jingmudui jong phi! Buh ïa ka kam jong phi ban pynshisha ba phi long ha kaba dei!

²⁷ U kpa tymmen banyngkong eh jong phi u la leh pop; ki nongïalam jong phi ki la leh pop pyrshah ïa nga,

²⁸ bad ki nongsynshar jong phi ki la pyntngit ïa ka ïingkyntang jong nga. Kumta nga la wallam ka jingpynjot ha Israel; nga shah ïa ki briew jong nga ban shah rkhiebeiñ.”