ISAÏAH 42 - Khasi CL Bible (BSI)

U shakri U Trai

¹ U Trai u ong, “Une u long u shakri jong nga, uba nga pynshaitbor — Uta uba nga la jied, ha u nga shem sngewbha. Nga la pyndap ïa u da U Mynsiem jong nga, bad un wallam jingbishar hok ha man la ka jaitbynriew.

² Un ym pyrta lane pynjam ïa ka sur jong u lane un ym pynmih ki ktien kren bajam ha ki lynti bah.

³ Un ym pynkheiñ ïa u khah ba la dem un ym pynlip ïa ka sharak ba dang mehding, un wanrah ka jingbishar hok baneh ïa baroh.

⁴ Un ym duh jingkyrmen ne jingshlur; un pynlong ka jingbishar hok ha ka pyrthei. Ki ri bajngai ki ap kmang ïa ka jinghikai jong u.”

⁵ U Blei u thaw ïa ki bneng bad u pynpyiar ïa ki; u pynwandur ïa ka pyrthei bad ïa baroh kiba shong ha ka; u ai jingim bad u pyrsad mynsiem ïa la ki briew baroh. Bad mynta U Trai U Blei u ong ha la u shakri,

⁶ “Nga, U Trai, nga la khot bad ai bor ïa phi, ban khmih ba ka jingbishar hok la pyndep ha pyrthei. Lyngba jong phi ngan pynlong ïa ka jutang bad ki briew baroh; lyngba jong phi ngan wanrah ka jingshai sha ki jaitbynriew.

⁷ Phin pynpeit ïa ki khmat jong kiba matlah bad pyllaitluid ïa kito kiba shong ha ki ïingbyndi ba-dum.

⁸ “Nga hi marwei nga long U Trai U Blei jong phi, ym don kiwei pat ki blei kiba lah ban ïoh bynta na ka burom jong nga; ngan ym shah ïa ki bleithaw ban ïoh bynta na ka jingïaroh jong nga.

⁹ Kiei kiei kiba nga ïathuhlypa mynta ki la jia shisha. Mynta ngan ïathuh ïa phi ïa kiei kiei kiba thymmai wat ha shuwa ba kin sdang ban jia.”

Ka jingrwai Ïaroh

¹⁰ To rwai ka jingrwai bathymmai ïa U Trai; rwai ïa ka jingïaroh jong u, ko ka pyrthei baroh! ïaroh ïa u, phi kiba ïaid lynti ha duriaw; ïaroh ïa u, ko ki jingthaw baroh ka duriaw! Rwai, phi ki ri bajngai bad baroh kiba shong hangta.

¹¹ Ai ba ka ri shyiap bad ki shnong jong ka kin ïaroh ïa U Blei; ai ba ki briew jong ka Kedar kin ïaroh ïa U! Ai ba kito kiba shong ha ka nongbah Sela kin risa da ka jingkmen na ki kliar jong ki lumbah!

¹² Ai ba kito kiba shong ha ki ri bajngai kin ai ka jingïaroh bad ka burom ïa U Trai.

¹³ U Trai u leit mih ban ïaleh kum u riewkieng atiar; u long uba la kloi bad kwah eh ban ïaleh thma, u kyang-thma, u pyrta ban ïaleh thma; u pyn-i ïa la ka bor pyrshah ïa la ki nongshun.

Ki jingkular U Blei ban ïarap ïa la ki briew

¹⁴ U Blei u ong, “La slem bah nga la sngap jar; ngam shym la jubab ïa ki briew jong nga. Hynrei mynta ka por ban leh ka la wan; nga kyang jam kum ka kynthei kaba suh kha.

¹⁵ Nga pyntwa ïa ki lumrit bad ki lumbah ngan pyntyrkhong ïa u phlang bad ki dieng. Ngan pynkylla ïa ki them wah sha ki jaka shyiap bad pyntyrkhong ïa ki pukri um.

¹⁶ “Ngan ïalam ïa ki briew bamatlah jong nga na ki lynti kiba kim pat ju ïaid. Ngan pynkylla ïa ka jingdum jong ki sha ka jingshai bad pynlong ïa ki jaka khohruh khohram kiba jem ha khmat jong ki. Kine ki long ki jingkular jong nga, bad ngan batskhem ïa ki.

¹⁷ Baroh kiba shaniah ha ki bleithaw, kiba khot ïa ki dur ki blei jong ki, yn pynpoh bad pynjahburom.”

Ka jingbymlah ki Israel ban sngewthuh

¹⁸ U Trai u ong, “To shahshkor, phi ki briew kiba kyllut! To peit bha, phi kiba matlah!

¹⁹ Hato don uno uno uba kham matlah ban ïa u shakri jong nga, uba kham kyllut ban ïa u nonglamktien ba nga phah?

²⁰ Ko Israel, phi la ïohi shibun bha, hynrei ka don jingmut aïu ïa phi? Phi don ki shkor ban sngew, hynrei phi ïohsngew aïu da shisha?”

²¹ U Trai u long U Blei uba kwah eh ban pynim, kumta u kyntiew ïa ki aiñ bad ki jinghikai jong u, bad u kwah ba ki briew jong u ki burom ïa ki.

²² Hynrei mynta ïa ki briew jong u la shah lute; ki la shah set ha ki krem byndi bad shah buhrieh ha ki ïingbyndi. Ki la shah lute bad shah pynjot. Khlem uno uno uba wan ban pyllait im ïa ki.

²³ Hato uno uno na phi un sngap ïa kane? Naduh mynta hato phin shahshkor bha?

²⁴ Mano ba la ai ïa ki Israel ha ki nonglute? Ka long na U Trai hi, pyrshah ïa u ba ngi la leh pop! Ngim shym im kumba u kwah ïa ngi ban im, lane kohnguh ïa ki jinghikai kiba u ai ha ngi.

²⁵ Kumta u pynlong ïa ngi ban sngew ïa ka bor ka jingbitar jong u bad shah jynjar ïa ka jingshyrkhei ka thma. Kum ka ding ka jingbitar jong u ka meh kylleng ka Israel, hynrei ngim ju tip aïu ka jia; ngim shym ïoh jinghikai satia ei ei na ka.