ISAÏAH 41 - Khasi CL Bible (BSI)

U Blei u ai ka jingsngewskhem ïa ki Israel

¹ U Blei u ong, “To sngap jar bad to shahshkor ïa nga, phi ki ri sha jngai bah! To pynkhreh ban wanrah ïa ka jingmudui jong phi ha ka ïingbishar; phin ïoh ïa ka lad jong phi ban kren. To ngin ïawanlang ban rai mano ba dei.

² “Uei uta uba wanrah ïa u nongjop na sha mihngi, bad pynlong ïa u ban leh risa kat shaba u leit? Mano ba ai jingjop ïa u halor ki syiem bad ki jaitbynriew? Ka waitlam jong u ka mait ïa ki la kumba ki long ka pui pui, ki khnam jong u ki pynsaphred ïa ki kum u phlangïap ha khmat ka lyer.

³ U bud ha ka jingbeh bad u ïaid ryntih ha ka jingshngain stet katta katta ba um shym la dei satia ha ka khyndew.

⁴ Mano dei uta ba pynlong ïa kane ban jia? Uba la thmu skhem ïa ka jingïaid ka histori? Nga, U Trai, nga la don hangta naduh mynnyngkong, bad nga, U Trai, ngan ïai don hangta ha kaba kut.

⁵ “Ki briew na ki ri bajngai ki la ïohi kaei ba nga la leh; ki da sheptieng bad khynñiuh da ka jingsheptieng. Kumta ki la ïalumlang baroh bad ki ïawan.

⁶ Ki nongshna da ki kti ki ïarap bad ki pynshlur uwei ïa uwei pat.

⁷ U misteri u ong ïa u bania, ‘Me la lehbha!’ U briew uba shoh pynjlih ïa ka bleithaw u pynshlur ïa uwei uba sah preg ban pyndait lang ïa ka. Ki ong ‘ka jingpyndait ka long kaba bha’ — bad ki pynskhem ïa ka bleithaw ha ka jaka da ki preg.

⁸ “Hynrei me, ko Israel u shakri jong nga, me long u paidlang ba nga la jied, ki khun ki ksiew u Abraham, u paralok jong nga.

⁹ Nga la wallam ïa me na kiba kut ka pyrthei; nga la khot ïa me naduh ki pud bajngai bah jong ka bad nga la ong ha me ‘me long u shakri jong nga,’ ngam shym la kyntait ïa me, hynrei nga la jied ïa me.

¹⁰ Wat sheptieng — nga long ryngkat bad me! Nga long U Blei jong me — wat ai ba kano kano kan pynsheptieng ïa me! Ngan pynlong ïa me uba khlaiñ bad ngan ïarap ïa me; ngan ïada ïa me bad ngan pynim ïa me.

¹¹ Kito kiba bitar ïa me kin tip ïa ka jinglehrain ka jingshahjop kito kiba ïaleh pyrshah ïa me kin ïap

¹² bad kin jah noh na ka pyrthei.

¹³ Nga long U Trai U Blei jong me; nga pynkhlaiñ ïa me bad nga ong, ‘wat sheptieng; ngan ïarap ïa me.’ ”

¹⁴ U Trai u ong, “Uba rit bad uba tlot kumba me long, ko Israel, wat sheptieng; ngan ïarap ïa me. Nga, U Blei uba khuid ki Israel, nga long uta uba pynim ïa me.

¹⁵ Ngan pynlong ïa me kum ka kor khlur-kba, lem bad ki bniat kiba thymmai banep. Men tylliat ïa ki lumbah bad pynlwet ïa ki; ki lumrit kin lwet kum u pui pui.

¹⁶ Men kynting ïa ki ha ka lyer; ka lyer kaba jur kan kit lut ïa ki, bad yn pynsaphriang ïa ki da ka 'erïong. Te men sa kmen namar nga long U Blei jong me; men ïaroh ïa nga, U Blei bakhuid ki Israel.

¹⁷ “Haba ki briew jong nga ha ka jingkyrduh jong ki, ki wad um, haba ki pdot jong ki, ki la tyrkhong da ka jingsliang, Te nga, U Trai, ngan jubab ïa ki jingduwai jong ki; nga, U Blei jong ki Israel, ngan ym iehnoh ïa ki da lei lei.

¹⁸ Ngan pynlong ïa ki wah ban tuid hapdeng ki lum bymseisoh bad ka um ha ki wahduid kan tuid ha ki jaka them. Nga pynkylla ïa ki jaka shyiap sha ki pukri um bad ki dewryngkhiang sha ki umpohliew batuid.

¹⁹ Ngan pynlong ïa ki dieng Kedar ban mih ha ka jaka shyiap bad ki dieng Akasia bad ki dieng Martl bad ki dieng Olib. Bad ki khlaw kin mih ha ki jaka shrah ki khlaw dieng Kseh bad dieng Kseh-Juniper bad dieng Kseh-Sypress.

²⁰ Ki briew kin ïohi ïa kane bad kin tip ba nga, U Trai, nga la leh ïa ka. Kin wan ban tip ba U Blei bakhuid ki Israel u la pynlong ïa ka ban jia.”

Ka jingkob U Trai ïa ki blei thala

²¹ U Trai, u Syiem ki Israel, u don ïa kane ban ong: “Phi ki blei jong ki jaitbynriew, to buh ïa ka kam jong phi. Wallam ïa ki jingïasaid nia babha tam ba phi don!

²² Ale hangne bad ïathuhlypa ïa kaei ka ban sa jia, khnang ba ngin tip ïa ka haba ka urlong. To batai ha ka ïingbishar ïa ki jingjia kiba la dep bad ïathuh ïa ngi ka mut aïu.

²³ Ïathuh ïa ngi ïa kaei kaba ka lawei ka don — Te ngin tip ba phi long ki blei! Leh katto katne kaba bha ne wallam katto katne ka jingpynjot; pyndap ïa ngi da ka jingsheptieng bad jingkhynñiuh!

²⁴ Phi bad baroh kaba phi leh kim long ei ei; kito kiba mane ïa phi ki long kiba isaitmet!

²⁵ “Nga la jied ïa u briew uba shong basah shaphang mihngi; ngan wallam ïa u ban tur ïaleh na shaphang shatei. Un ïuh halor ki nongsynshar la kumba dei ka ktieh, kum u nongthaw khiew uba ïuh ïa ka dewbyrtha.

²⁶ Uno na phi uba la ïathuhlypa ba kane kan jia, khnang ba ngin lah ban ong ba phi long uba dei? Ym don na phi uba la ong wat shikyntien shaphang jong ka; ym don uba la ïohsngew ïa phi ba phi ong ïa kata.

²⁷ Nga, U Trai, nga long uba nyngkong ban ïathuh ïa ka Seïon ïa ka khubor; nga phah ïa u nonglamktien sha Jerusalem ban ong, ‘Ki briew jong phi ki wan! Ki wan sha ïing!’

²⁸ Haba nga peit napdeng ki blei, ym don na ki uba don ei ei ban ong; ym don uwei u ban jubab ïa ki jingkylli ba nga kylli.

²⁹ Baroh kine ki blei ki long ki bymlarkam; Kim lah ban leh ei ei ruh em — Kine ki bleithaw ki long kiba tlot bad ki bymdonbor.”