ISAÏAH 40 - Khasi CL Bible (BSI)

Ki ktien ka jingkyrmen

¹ “Pyntngen ïa ki briew jong nga,” ong U Blei jong ngi. “Pyntngen ïa ki!

² To pynshlur ïa ki briew ka Jerusalem. To ïathuh ha ki ba ki la jynjar slem bha bad ïa ki pop jong ki la map mynta. Nga la pynshitom ïa ki la biang bha na ka bynta ki pop jong ki baroh.”

³ Ka sur ka pyrta jam, “To pynkhreh ha ka ri khlaw ïa ka lynti na ka bynta U Trai! To pynkhuid ïa ka lynti ha ka ri shyiap na ka bynta U Blei jong ngi!

⁴ To pyndap ha man la ka jaka them; to pynmadan ïa man la u lumbah, ki lumrit ki kylla madan, bad ïa ki jaka khohruh khohram yn pynjlih.

⁵ Te ïa ka burom jong U Trai yn sa pynpaw, bad baroh ki briew kin ïohi ïa ka. U Trai da lade u la kular ïa kane.”

⁶ Ka sur ka pyrta jam, “To pynbna ïa ka khubor!” “Ka khubor aïu ngan pynbna?” nga kylli. “To pynbna ba ki briew baroh ki long kum u phlang; kin ym neh skhem ban ïa ki syntiew khlaw.

⁷ U phlang u ïapstai bad ki syntiew ki jlop, haba U Trai u phah ïa ka lyer ban beh halor jong ki. Ki briew kim neh slem ban ïa u phlang.

⁸ Ho-oid, u phlang u ïapstai bad ki syntiew ki jlop, hynrei ka ktien jong U Blei jong ngi ka neh bymjukut.”

⁹ Ko Jerusalem, leit kiew sha u lumbah bajrong bad to pynbna ïa ka khubor babha! To kyang da ka sur bajam, ko Seïon; to pynbna ka khubor babha! To kren bad wat sheptieng. Ïathuh ïa ki shnong ka Judah ba U Blei jong ki u la wan!

¹⁰ U Trai Nongsynshar u wan ban synshar da ka bor, u da wallam bad u ki briew ba u la pyllait im.

¹¹ Un sumar ïa ka kynhun jong u kum u nongaplangbrot; un lumlang ïa ki khunlangbrot bad un rah ïa ki ha ki ksang'ti jong u; un ïalam jai jai ïa ki kmie jong ki.

U Blei ki Israel u bym lah ban ïanujor

¹² Don uno uno uba lah ban thew ïa ka duriaw-bah da ki lynghoh kti lane ban thew ïa ka sahit bneng da ki kti jong u? Don uno uno uba lah ban bat ïa ka khyndew jong ka pyrthei ha ka khuri lane thew ïa ki lumbah bad lumrit ha ki tarajur?

¹³ Don uno uno uba lah ban ïathuh kaei ba U Trai u leh? Mano ba lah ban hikai ïa u lane ban ai jingmut ïa u?

¹⁴ Badno ba U Blei un ïasyllok khnang ban tip bad sngewthuh bad ban hikai kumno ba ïa kiei kiei dei ban leh?

¹⁵ Ha U Trai ki jaitbynriew kim long ei ei, ym don wat tang shi jaw ka um; ki dewlynnong ba sha jngai ki sting kum u pui pui.

¹⁶ Baroh ki mrad ha ki khlaw jong ka Lebanon kim pat biang na ka bynta ka jingkñia sha U Blei jong ngi, bad ki dieng jong ka ki khyndiat eh ban pynmeh ïa ka ding.

¹⁷ Ki jaitbynriew kim long ei ei satia ha u.

¹⁸ Badno lah ban nujor ïa U Blei? Kumno phi lah ban batai kaei ba u long?

¹⁹ Um long kum i bleithaw ba u nongtrei u shna ba ki kamar ki sop da ka ksiar bad pynshong ha u khiew rupa.

²⁰ U briew u bym lah ïoh rupa ne ksiar u jied da ka dieng ka ban ym pyut. U shem ïa u nongtrei dieng batbit ban shna ïa ka dur ka ban ym kyllon.

²¹ Hato phim tip? Hato ym shym la ïathuh slem mynshuwa? Hato phim shym ïohsngew kumno ka pyrthei ka sdang?

²² La thaw ïa ka da uta uba shong halor ka khet jong u shajrong ka khyndew bad sha lyndet ka sahit bneng; ki briew shapoh ki i rit tang kum ki dkhiew. U pynpyiar ïa ka suiñbneng kum ka pyrda, kum ka ïingjaiñ ha kaba yn shong.

²³ U pynhiar shapoh ïa ki nongsynshar badonbor um pynlong ei ei shuh ïa ki.

²⁴ Ki long tang kum ki jingthung ba dang lung, ba dang shu mih bad bym pat suhthied, haba U Trai u phah ïa ka lyer, ki tyrkhong noh bad kit noh kum u phlangïap.

²⁵ Badno lah ban ïanujor ïa U Blei bakhuid? Don uno uno ba kum ma u?

²⁶ A to khmied sha ka sahit bneng! Mano ba thaw ïa ki khlur ba phi ïohi? Uta uba ïalam ïa ki shabar kum ka kynhun shipai, u tip katno ki don bad u khot ïa uwei uwei da ka kyrteng! Ka bor jong u ka khraw katta katta — Ym don uwei na ki u ban jah noh.

²⁷ Ko Israel, balei te ba me mudui ba U Trai um tip ïa ki jingjynjar jong me lane ïa ki jingkhuslai lada me shahshitom bymdei?

²⁸ Hato phim tip? Phim pat ïohsngew? U Trai u long U Blei bymjukut; u thaw ïa ka pyrthei baroh. Um ju sngewthait ne sngewlwait. Ym don uba sngewthuh ïa ki jingpyrkhat jong u

²⁹ U pynshaitbor ïa kito kiba tlot bad kiba thait.

³⁰ Wat kito kiba dang samla ki sngewtlot; ki rangsamla ki lah ban kyllon ha ka jingthait.

³¹ Hynrei kito kiba shaniah ha U Trai ban ïoh jingïarap kin shem ba la pynthymmai ïa ka jingkhlaiñ jong ki. Kin ïeng joit ha ki thapniang kum ki pukni; kin mareh bad kin ym sngewlwait; kin ïaid bad kin ym sngewthait.