ISAÏAH 4 - Khasi CL Bible (BSI)

¹ Haba kata ka por ka wan, hynñiew ngut ki kynthei kin bat ïa uwei u briew bad ong, “Ngi lah ban bsa bad pynkup jaiñ ïa lade, hynrei sngewbha shah ïa ngi ban ong ba phi long u tnga jong ngi, ba kumta ngim donkam ban shah ïa ka jinglehrain jong ka jinglong bym pat shongkurim.”

Yn pynbha pat ïa ka Jerusalem

² Ka por ka poi ha kaba U Trai un pynlong ïa uwei pa uwei u jingthung bad u dieng ha ka ri ban long uba heh bad ba-itynnat. Baroh ki paid Israel kiba lait im kin dap da ka jingkmen bad jingsarong ha ki mar rep ba ka ri ka pynmih.

³ Uwei pa uwei uba shah iehnoh ha Jerusalem, uba U Blei u la jied ban ïohlait im, yn khot uba khuid.

⁴ Da la ka bor U Trai un bishar bad pynkhuid ïa ka jaitbynriew bad sait noh ïa ka jingpalat jong ka Jerusalem, bad ïa ka snam kaba la pynmih noh hangta.

⁵ Nangta halor u Lum Seïon bad halor baroh kiba la ïalumlang hangta, U Trai un phah ïa u lyoh ha ka por mynsngi bad ka tdem bad ka thylliej ding baphyrnai ha ka por mynmiet. Ka burom U Blei kan tap bad da ïa ka nongbah baroh kawei.

⁶ Ka burom jong u kan kah ïa ka nongbah na ka jingshit jong ka sngi bad pynlong ïa ka, ka jaka kaba shngain, kaba la da na u slap bad ka 'erïong.