ISAÏAH 39 - Khasi CL Bible (BSI)

Ki nonglamktien na Babilonia

¹ Hamar kaba kum kane ka por, u syiem ka Babilonia, u Merodakh Baladan, u khun jong u Baladan, u la ïohsngew ba u syiem Hesekaïah u pang, kumta u la phah sha u ïa ka shithi bad ka jingai sngewbha.

² U Hesekaïah u pdiang sngewbha ïa ki nonglamktien bad u pyn-i ha ki ïa la ka spah — ka rupa bad ka ksiar jong u, ki musli musla bad ki jingiwbih jong u, bad ïa ki tiar ïapom baroh. Ym don shuh ha ki ïing jingkynshew ne hangno hangno ha ka hima jong u ïa kaba um shym la pyn-i ha ki.

³ Te u Isaïah u nongïathuhlypa u la leit sha u syiem Hesekaïah bad u la kylli, “Nangno kine ki briew ki wan bad kaei kaba ki ong ïa phi?” U Hesekaïah u la jubab, “Ki wan na ka ri kaba jngai bha, na Babilonia.”

⁴ “Kaei ba ki la ïohi ha ka ïing syiem?” “Ki la ïohi ïa baroh. Ym don kaba ngam shym la pyn-i ha ki ha ki ïing jingkynshew.”

^5-6 U Isaïah nangta u la ïathuh ha u syiem, “U Trai Badonbor Baroh u ong ba ka por kan poi ba baroh kaba ha ka ïingsyiem jong me, baroh kaba ki kpa tymmen jong me ki la lum haduh kane ka sngi, yn sa kit noh sha Babilonia. Yn ym don shuh ka ban sah.

⁷ Khyndiat na ki khun ki ksiew jong me hi yn sa ïalam noh bad ban pynlong ki ïunukh ban shakri ha ka ïingsyiem jong u syiem ka Babilonia.”

⁸ U syiem Hesekaïah u la sngewthuh ïa kane kaba mut ba kan don ka jingsuk bad ka jingskhem bha ha ka por ka jingim jong u, kumta u jubab, “Ka khubor ba la ai ha nga na U Trai ka long kaba bha.”