ISAÏAH 38 - Khasi CL Bible (BSI)

Ka jingpang bad ka jingkoit pat u syiem Hesekaïah

¹ Kum ha kane ka por u Syiem Hesekaïah u la kem pang bad u la jan ïap. U Isaïah u nongïathuhlypa u khun jong u Amos u la leit ban jngoh ïa u bad u la ong ha u, “U Trai u ïathuh ïa phi ba phi dei ban buh beit ïa kiei kiei baroh namar phin ym koit shuh. Pynkhreh ban ïap.”

² U Hesekaïah u phai la ka khmat sha ka kynroh bad u duwai:

³ “To kynmaw, A Trai, ba nga la shakri hok bad ïaineh ha me, bad ba nga la pyrshang borabor ban leh ïa kaei kaba me kwah ïa nga ban leh,” bad u sdang ban ïamkthang.

^4-5 Te U Trai u la hukum ïa u Isaïah ban leit pat sha u Hesekaïah ban ong ha u, “Nga, U Trai, U Blei jong u kpa tymmen jong me u Dabid, nga la ïohsngew ïa ka jingduwai jong me bad ïohi ïa ki ummat jong me; ngan shah pat ïa me ban im sa khatsan snem.

⁶ Ngan pyllait im ïa me bad ïa kane ka nongbah Jerusalem na u patsha Assyria, bad ngan ïai bteng ban ïada ïa ka nongbah.”

⁷ U Isaïah u jubab, “U Trai un ai ha me ka dak ban pynshisha ba un bat ïa la ka kular.

⁸ Ha ka lynti mawkyrdon ba la tei da u syiem Ahas, U Trai un pynlong ïa ka syrngiew ban leit shiphew jam shadien.” Bad ka syrngiew ka kynriah shiphew jam shadien.

⁹ Hadien u Hesekaïah u koit pat na ka jingpang jong u, u thoh ïa kane ka jingrwai ïaroh:

¹⁰ Nga pyrkhat ba ha ka jingdap pura ka jingim, nga la leit sha ka pyrthei kiba ïap, ban ym lah ban pynkut ïa ka jingim jong nga.

¹¹ Nga pyrkhat ba ha kane ka pyrthei jong kiba im, ba ngan ym ïohi shuh ïa U Trai lane ïa uno uno u briew uba im.

¹² Ïa ka jingim jong nga la ot noh bad ka la kut, kum ka ïingjaiñ ba la pynkhyllem, kum ka jaiñ ba la khapnoh na ka kor thain jaiñ. Nga pyrkhat ba U Blei u la pynkut ïa ka jingim jong nga.

¹³ Baroh shi miet nga kyang bad ka jingpang, la kumba u sing u pynkheiñ ïa ki shyieng jong nga. Nga pyrkhat ba U Blei u la pynkut ïa ka jingim jong nga.

¹⁴ Ka sur jong nga ka rit bad tlot, bad nga ud kum ka paro. Ki khmat jong nga ki la thait na kaba khmied sha bneng. A Trai, pyllait im ïa nga na kane ka jingjynjar baroh.

¹⁵ Kaei nga lah ban ong? U Trai u la leh ïa kane. Ka dohnud jong nga ka kthang, bad ngam shym lah ïohthiah.

¹⁶ A Trai, ngan im na ka bynta jong me, bad tang ïa me hi; to pynkhiah ïa nga bad ai ngan im.

¹⁷ Ka jingkthang jong nga ka kylla sha ka jingsuk. Me pyllait ïa ka jingim jong nga na ka jingma baroh; me map ïa ki pop jong nga baroh.

¹⁸ Ym don uno uno ha ka pyrthei kiba ïap uba lah ban ïaroh ïa me; uba ïap un ym lah ban shaniah ha ka jinglonghok jong me.

¹⁹ Dei kiba im kiba ïaroh ïa me, kumba nga ïaroh ïa me mynta. Ki kpa ki ïathuh ïa la ki khun katno me long uba ïaineh.

²⁰ A Trai, me la pynkhiah ïa nga. Ngin tem ki duitara bad rwai ka jingïaroh ïa me, ngin rwai ïaroh ha ka Templ jong me katba ngi dang im.

²¹ U Isaïah u ïathuh ha u syiem ban buh ka jingtah ba la shna da ki soh Dumbur ha u tohjaw jong u, bad un sa jem.

²² Te u syiem Hesekaïah u kylli, “Kaei ka dak ban pynshisha ba nga lah ban leit sha ka Templ?”