ISAÏAH 37 - Khasi CL Bible (BSI)

U Syiem u pan jingmut na u Isaïah

¹ Mar ïa ïohsngew ïa kane ka khubor, u syiem Hesekaïah u la tar ïa la ki jaiñ ha ka jingsngewsih, u la phong ki jaiñ khain, bad u la leit sha ka Templ jong U Trai.

² U la phah ïa u Eliakim, u rangbah synshar ba dei peit ïa ka ïingsyiem, ïa u Shebna, u sekretari ka ïingbishar, bad ki lyngdoh ba rangbah sha u Isaïah u nongïathuhlypa, u khun jong u Amos. Ki ruh ki phong da ki jaiñ khain.

³ Kane ka long ka khubor ba u ïathuh ha ki ban ai ha u Isaïah; “Mynta ka long ka sngi jong ka jingjynjar; ngi la shah pynshitom bad ngi long ha ka jinglehrain. Ngi long kum ka kynthei kaba la suh kha, hynrei kaba tlot katta katta ba kam lah ban kha.

⁴ U patsha ka Assyria u la phah ïa u rangbah synshar jong u, uba ha khlieh ban ñiewbeiñ ïa U Blei ba-im. Ai ba U Trai U Blei jong phi un ïohsngew ïa kine ki jingkrenbeiñ bad pynshitom ïa kito kiba kren ïa ki. Kumta to duwai ha U Blei na ka bynta kito ki briew jong ngi kiba lait im.”

⁵ Haba u Isaïah u ïohpdiang ïa ka khubor jong u syiem Hesekaïah, u phah pat ïa kane ka jubab:

⁶ “U Trai u ïathuh ha phi ban ym shah ba ki Assyria kin pynkhaw-eit ïa phi da ki jingkob jong ki ba um lah ban pyllait ïa phi.

⁷ U Trai un pynlong ba u patsha un ïohsngew ïa ka jingbna wer wer ka ban pynlong ïa u ban leit phai pat sha la ka jong ka ri, bad U Trai un shah ba yn pynïap ïa u hangta.”

Ki Assyria ki phah ïa kawei pat ka jingbyrngem

⁸ U rangbah synshar ki Assyria u la tip ba u patsha u la leit sha Lakhish bad u dang ïaleh pyrshah ïa ka Libnah ka nongbah ba-marjan; kumta u leit shata ban ïasyllok bad u.

⁹ Haba la poi ktien ha ki Assyria ba ki shipai Ijipt, ba la ïalam da u syiem Tirhakah jong ka Sudan, u dang wan ban tur ïaleh ïa ki.

¹⁰ Haba u Patsha u ïohsngew ïa kane, u phah ka shithi sha u Hesekaïah u syiem Judah ban ong ïa u, “U Blei ïa uba me shaniah u la ong ha me ba un ym hap ha ki kti jong nga, hynrei wat ai ba kata kan shukor ïa me.

¹¹ Me la ïohsngew kaei ba u patsha Assyria u leh ïa kano kano ka ri kaba u rai ban pynjot. Hato me pyrkhat ba men lait im?

¹² Ki kpa tymmen jong nga ki la pynjot ïa ki nongbah jong ki Gosan, Haran bad Reseph, bad ki pynïap ïa ki briew jong ka Betheden kiba shong ha Telassar, bad ym don uwei ruh na ki blei jong ki uba pyllait im ïa ki.

¹³ Hangno don na ki syiem jong ki nongbah ka Hamath, Arpad, Sepharbaim, Hena bad Ibbah?”

¹⁴ U syiem Hesekaïah u shim ïa ka shithi na ki nongrah-khubor bad pule ïa ka.

¹⁵ Te u la leit sha ka Templ, u buh ïa ka shithi hangta ha khmat ka jingdon ryngkat U Trai, bad u duwai,

¹⁶ “A Trai Badonbor Baroh, U Blei jong ki Israel, uba shong ha ka khet shajrong ki kherub, me marwei me long U Blei, uba synshar ïa baroh ki hima jong ka pyrthei. Me thaw ïa ka pyrthei bad ka sahit bneng.

¹⁷ Mynta, A Trai, to sngap ïa ngi bad to peit ïa kaei kaba la jia ha ngi. To shahshkor ïa baroh kiei kiei kiba u Sennakherib u la ong ban ñiewbeiñ ïa me, U Blei ba-im.

¹⁸ Ngi baroh ngi tip, A Trai, ba ki patsha ka Assyria ki la pynjot ïa kiba bun ki jaitbynriew, bad pynlong ïa ki ri jong ki, ki bym don briew,

¹⁹ bad ki la thang lut ïa ki blei jong ki — ki bym long satia ki blei, tang ki dur jong u dieng bad u maw ba la shna da ki kti briew.

²⁰ Mynta, A Trai U Blei jong ngi, pyllait im ïa ngi na ki Assyria, kumta ba baroh ki jaitbynriew jong ka pyrthei kin tip ba tang ma me hi me long U Blei.”

Ka khubor u Isaïah sha u syiem

²¹ Te u Isaïah u la phah ka khubor ban ïathuh ha u syiem Hesekaïah kaba jubab ïa ka jingduwai u syiem.

²² U Trai u la ong “Ka nongbah Jerusalem ka rkhie ïa me, ko Sennakherib, bad ka ñiewbeiñ ïa me.

²³ Ïano ba me pyrkhat ba me la ñiewbeiñ bad rkhiebeiñ? Me la long uba khlem burom ïa nga, U Blei bakhuid jong ki Israel.

²⁴ Me la phah ïa ki shakri jong me ban kob sarong ïa nga ba da baroh ki kali ïapom jong me men jop ïa ki lum bajrong tam ka Lebanon. Me kob sarong ba hangta me pom lut ïa ki dieng Kedar bajrong tam bad ïa ki dieng Kseh bakynsai tam, bad me la poi sha ki bynta barben tam jong ki khlaw.

²⁵ Me kob sarong ba me la tih ïa ki pukri bad dih um ha ki ri nongwei, bad ba ki kjat jong ki shipai jong me ki la ïuh ha ka wah Nile ba-rkhiang.

²⁶ “Hato mem pat ju ïohsngew ba nga la thmu ïa kane baroh slem mynshuwa? Bad mynta nga pynurlong ïa ka. Nga ai ha me ka bor ban pynkylla ïa ki nongbah ba la ker kynroh sha ki kynton theh ñiut.

²⁷ Ki briew kiba shong hangta ki long ki bymdonbor; ki long kiba khaw-eit bad sah lyngngoh. Ki long kum u phlang ha ka madan ne ki ñiut kiba san halor tnum haba ka lyer khluit na mihngi ka shoh ïa ki.

²⁸ Hynrei nga tip lut shaphang jong me, kaei ba me leh bad shano me leit, bad nga tip kumno ba me bitar shla pyrshah ïa nga.

²⁹ Nga la ïohpdiang ïa ka khubor jong kata ka jingbitar shla bad ka jingsarong jong me, bad mynta ngan buh ïa u khwai ha ka khmut jong me bad u bnoh ha ka shyntur jong me bad ngan pynphai pat na ka lynti ha kaba me la wan.”

³⁰ Te u Isaïah u la ong ha u syiem Hesekaïah, “Kane ka long ka dak ïa kaei ka ban jia. Kane ka snem bad hadien men ïoh tang u symboh kew khlaw ba men bam, hynrei ha ka snem kaba bud me lah ban bet ïa u kew jong me bad ban ot ïa u, bad men thung ki dieng sohwaiñ bad bam ïa ki sohwaiñ.

³¹ Kito kiba lait im ha Judah kin roi kin san kum ki jingthung kiba ngam jylliew ki thied ha ka khyndew bad pynmih soh.

³² Kin don ki briew ha Jerusalem bad halor u lum Seïon ki ban lait im, namar U Trai Badonbor Baroh u la thew ban pynjia ïa kane.

³³ “Kane ka long kaei kaba U Trai u la ong shaphang u patsha Assyria: ‘Un ym ïohrung ha kane ka nongbah lane siat ïa uwei u khnam pyrshah ïa ka. Yn ym don ki shipai lem bad ki stieh ki ban wan hajan ka nongbah, bad yn ym don ka kynton ba la tei ha sawdong jong ka.

³⁴ Un leit phai pat na ka lynti ha kaba u wan, khlem da rung ha kane ka nongbah. Nga, U Trai nga la kren.

³⁵ Ngan ïada ïa kane ka nongbah bad ngan ïada ïa ka, na ka bynta ka burom jong nga hi bad namar ka kular kaba nga la pynlong ha u shakri jong nga u Dabid.’ ”

³⁶ U angel jong U Trai u leit sha ka jaka shong dara ki Assyria bad u pynïap shi lakh phraphew san hajar ngut ki shipai. Dang step phyrngab ka sngi kaba bud hangta ki thiah, baroh ki la ïap!

³⁷ Te u Sennakherib u patsha ka Assyria u iehnoh bad leit phai sha Ninebeh.

³⁸ Ha kawei ka sngi katba u dang mane ha ka Templ jong U Blei jong u, u Nisrokh; ar ngut na ki khun shynrang jong u, u Adrammelekh bad u Shareser, ki la pynïap ïa u da ki waitlam bad nangta ki la phet ban lait im sha ka ri Ararat. Uwei pat na ki khun shynrang jong u, u Esarhaddon u la long u patsha hadien jong u.