ISAÏAH 36 - Khasi CL Bible (BSI)

Ki Assyria ki byrngem ïa ka Jerusalem

¹ Ha ka snem kaba khatsaw ba u Hesekaïah u la long u Syiem ka Judah, u Sennakherib, u patsha ka Assyria u la tur ïaleh ïa ki nongbah ba la ker kynroh jong ka Judah bad u la knieh ïa ki.

² Te u la hukum ïa u rangbah synshar jong u, uba ha khlieh ban leit na Lakhish sha Jerusalem lem bad ka kynhun shipai kaba khraw ban dawa ba u syiem Hesekaïah u dei ban pyndem. U rangbah synshar u ïeng ha ka surok ha kaba ki nongthain jaiñ ki treikam, harud ka nur kaba wanrah um na ka pung kaba haneng.

³ Lai ngut ki nong Judia ki wan ban ïakynduh ïa u; u rangbah synshar uba dei peit ïa ka ïingsyiem, u Eliakim u khun jong u Hilkaïah; u sekretari ka ïingbishar, u Shebna; bad u rangbah synshar ba dei peit ïa ki jingbuh jingthoh, u Joah u khun jong u Asaph.

⁴ U rangbah synshar ki Assyria u ïathuh ha ki ba u Patsha u kwah tip kaei kaba pynlong ïa u syiem Hesekaïah ban sngewskhem.

⁵ U la dawa “Hato phi tharai ba ki ktien ki lah ban shim ïa ka jaka jong ka jingtbit bad ka borbah ki shipai? Mano phi tharai u ban ïarap ïa phi ban ïaleh pyrshah ïa ki Assyria?

⁶ Phi khmih lynti ba ka Ijipt kan ïarap ïa phi, hynrei kata kan long kumba pyndonkam ïa u khah kum u diengduh ban ïaid — un kdiah bad un dung ïa ka kti jong phi. Kata kan long kaei kaba u syiem Ijipt u long haba uno uno u shaniah ha u.”

⁷ U rangbah synshar ki Assyria u ong shuh shuh, “Lane hato phin ïathuh ha nga ba phi shaniah ha U Trai U Blei jong phi? Ki long ki jaka mane blei bad ki duwan jong U Trai ba u Hesekaïah u la pynjot haba u ïathuh ïa ki briew ka Judah bad ka Jerusalem ban mane tang ha kawei ka duwan.

⁸ Ngan pynlong ka jingïathong bad phi ha ka kyrteng u patsha. Ngan ai ïa phi ar hajar tylli ki kulai lada phi lah ban shem katta ngut ki rangbah ki ban shong ha ki.

⁹ Phim ïaryngkat bad wat uwei u rangbah synshar uba rit tam jong ki Assyria bad pynban phi khmih lynti ba ki Ijipt ba kin phah ha phi ïa ki kali ïapom bad ki shipai shong kulai.

¹⁰ Hato phi tharai ba nga la tur ïaleh ïa ka ri jong phi bad pynjot ïa ka khlem ka jingïarap U Trai? U Trai da lade u la ïathuh ha nga ban tur ïaleh pyrshah ïa ka bad pynjot ïa ka.”

¹¹ Te u Eliakim, u Shebna bad u Joah ki la ong ha u rangbah synshar, “Kren ha ngi da ka ktien Aramaik. Ngi sngewthuh ïa ka. Wat kren ha ka ktien Hebru; baroh ki briew ha ka kynroh ki ïa-shahskhor.”

¹² U jubab, “Phi tharai ba ma phi bad u syiem ki long tang kita kiba u patsha u la phah ïa nga ban kren ïa kine kiei kiei baroh? Em, nga kren ruh ha ki briew kiba shong ha ka kynroh, kiba hap ban bam ïa la ka jakhlia bad dih ïa la ka um pynjhieh, kumba phi ruh phi hap ban leh kumta.”

¹³ Te u rangbah synshar u ïeng joit bad u pyrta ha ka ktien Hebru, “To shahshkor ïa kaei kaba u patsha ka Assyria u ïathuh ha phi.

¹⁴ U maham ïa phi ban ym shah ba u Hesekaïah un shukor ïa phi. U Hesekaïah um lah ban pyllait ïa phi.

¹⁵ Bad wat ai ïa u ban pynngeit ïa phi ban shaniah ha U Trai. Wat pyrkhat ba U Trai un pyllait ïa phi bad ba un pynsangeh ïa ki shipai Assyria na kaba knieh noh ïa ka nongbah jong phi.

¹⁶ A wat sngap ïa u Hesekaïah! U patsha ka Assyria u hukum ïa phi ban mihnoh na ka nongbah bad ban pyndem. Ïa phi baroh yn shah ban bam ïa ki sohwaiñ na la ki dieng sohwaiñ bad ki soh Dumbur na ki jong ki dieng jong ki, bad ban dih um na ki pukri jong phi —

¹⁷ haduh ba u patsha un da pynbeit pat ïa phi ha ka ri kaba kum ka jong phi hi, ha kaba don ki bri sohwaiñ ban ai waiñ bad ha kaba don u kew ban shna jingbam.

¹⁸ Wat ai ba u Hesekaïah un pynbieit ïa phi ban pyrkhat ba U Trai un pyllait im ïa phi. Hato ki blei jong kiwei pat ki jaitbynriew ki pyllait ïa ki ri jong ki na u patsha ka Assyria?

¹⁹ Hangno ki don mynta, ki blei jong ka Hamath bad ka Arpad? Hangno don ki blei jong ka Sepharbaim? Hato don uno uno uba pyllait ïa ka Samaria?

²⁰ Mynno na ki blei baroh jong kine ki ri uba la ju pyllait ïa la ka ri na u patsha jong ngi? Te kaei kaba pynlong ïa phi ban pyrkhat ba U Trai u lah ban pyllait ïa ka Jerusalem?”

²¹ Ki briew ki sngap jar, kumba u syiem Hesekaïah u la lah ong ha ki; kim shym la ong shikyntien ruh.

²² Te u Eliakim, u Shebna bad u Joah ki la tar ïa la ki jaiñ ha ka jingsngewsih bad leit bad ïathuh ha u syiem ïa kaei kaba u rangbah synshar Assyria u la ong.